સામાન્ય રીતે લોકો પોતાના બાળકોને વધુમાં વધુ શ્રેષ્ઠ સારવાર આપવા ઈચ્છતા હોય છે, જેથી તેઓ સ્વસ્થ રહી શકે. કેટલીક વાર સસ્તી સારવાર તેમના અને બાળકોના જીવન માટે ઘણી મોટી મુશ્કેલી લઈને આવે છે. આવો જ એક ચોંકાવનારો કિસ્સો પાકિસ્તાનના એક શહેરમાં સામે આવ્યો છે, જ્યાં સસ્તી સારવારની લાલચ આપીને એક ડૉક્ટરે 12 વર્ષની વયના લગભગ 900 બાળકોને ખતરનાક જીવલેણ બીમારી એઈડ્સની ભેટ આપી છે.
પાકિસ્તાનમાં ડૉક્ટરે 12 વર્ષની વયના લગભગ 900 બાળકોને જીવલેણ બીમારી એઈડ્સની ભેટ આપી
તબીબી અધિકારીઓ મુજબ, હજી તપાસ હેઠળ રહેલા બાળકોની સંખ્યામાં ઘણો વધારો થઈ શકે
પાકિસ્તાની તબીબી અધિકારીઓએ આ શંકાસ્પદ કેસમાં તપાસ શરૂ કરી
વાત ફક્ત આટલેથી જ અટકતી નથી. શહેરના તબીબી અધિકારીઓ કહે છે કે, હજી તપાસ હેઠળ રહેલા બાળકોની સંખ્યામાં ઘણો વધારો થઈ શકે છે. હાલ આ મામલે સઘન તપાસ ચાલી રહી છે. પાકિસ્તાનના શહેર રેટોડેરોમાં ડૉ.મુઝફ્ફર ઘાંઘરુ જાણીતા બાળરોગ ચિકિત્સક છે. હકીકતમાં, મુઝફ્ફરે શહેરમાં રહેતા ગરીબ પરિવારોને તબીબી સારવારમાં મોટી રાહત આપવાની જાહેરાત કરી હતી. સારવારમાં રાહત મળવાના સમાચાર ફેલાયા બાદ ઘણી મોટી સંખ્યામાં માતા-પિતા તેમના બાળકોને મુઝફ્ફરના ક્લિનિકમાં લાવ્યા હતા અને તેમને ઇન્જેક્શન અપાવ્યું હતું.
આ દરમિયાન જ્યારે પાકિસ્તાની તબીબી અધિકારીઓએ આ શંકાસ્પદ કેસમાં તપાસ શરૂ કરી, ત્યારે તેમને આ બાળકો એચઆઈવી પોઝિટિવ હોવાનું જાણવા મળ્યું હતું. ત્યારબાદ જ્યારે ડૉકટરોએ તપાસ કરી કે, આ બાળકોની અગાઉ ક્યાં સારવાર કરવામાં આવી છે, ત્યારે જાણવા મળ્યું કે આ તમામને મુઝફ્ફરની ક્લિનિકમાં ઇન્જેક્શન આપવામાં આવ્યા હતા. ત્યારબાદ સમગ્ર મામલો બહાર આવ્યો હતો.
પાકિસ્તાનમાં ડૉકટરોએ એપ્રિલ મહિનાથી રેટોડેરોમાં હ્યુમન ઇમ્યુનો ડેફિશિયન્સી વાઈરસ (એચઆઈવી) માટે સકારાત્મક પરીક્ષણ કર્યું છે, જેમાં લગભગ 12 વર્ષથી ઓછી વયના 900 બાળકો સામેલ છે. આ તમામ સકારાત્મક હોવાનું જાણવા મળ્યું છે. આ તબીબી ટીમના સભ્યોનું કહેવું છે કે, બાળકોને આ ઇન્જેક્શન જે રીતે આપવામાં આવ્યા છે તે જોતાં તેમની સંખ્યામાં વધારો થવાની આશંકા છે.
રેટોડેરો શહેરના રહેવાસી ઇમ્તિયાઝ જલબાની 6 બાળકોના પિતા છે. તેણે ઘણા દિવસો સુધી પોતાના પરિવારના સભ્યોને ભૂખ્યા રાખ્યા હતા, જેથી તે બાળકોના ઈન્જેક્શન માટે નાણાં એકઠા કરી શકે. ત્યારબાદ જ્યારે તેમના બાળકોને ઇન્જેક્શન આપવામાં આવ્યા ત્યારે તેમને એઈડ્સ જેવી જીલવેણ બીમારી થઈ. તેમના 6માંથી 4 બાળકો એચઆઈવી પોઝિટિવ છે, જેમાંથી 2નાં મૃત્યુ થઈ ચૂક્યા છે.