કરતારપુર કોરિડોર / ભારતે પૂર્વ વડાપ્રધાન માટે માંગી ઝેડ પ્લસ સુરક્ષા, ભારતે આપ્યા છે આતંકી હુમલાના ઇનપુટ

• ભારતે પૂર્વ PM ડૉ. મનમોહન સિંહ માટે પાકિસ્તાન પાસેથી ઝેડ પ્લસ શ્રેણીની સુરક્ષા માંગી 
• પાકિસ્તાને માત્ર બેટરીથી સંચાલિત ખુલ્લી કારનું આયોજન કર્યું
• જાસૂસી એજન્સીઓએ કરતારપુરમાં આતંકી હુમલાના ઇનપુટ આપ્યા છે

નોંધનીય છે કે, શીખોના પહેલા ગુરુ ગુરુનાનક દેવની 550મી જયંતી પર 9 નવેમ્બરે પાકિસ્તાનના કરતારપુરમાં સ્થિત ગુરુદ્વારા સુધી જવા માટે બનાવાયેલ કોરિડોરનું ઉદઘાટન થવાનું છે. ભારતથી ત્યાં જવા વાળા 550 શ્રદ્ધાળુઓની પહેલી ટીમ પણ તૈયાર છે. આ ટીમમાં પૂર્વ વડાપ્રધાન મનમોહન સિંહથી લઇને પજાબના મુખ્યમંત્રી કેપ્ટન અમરિન્દર સિંહ સુધી સામેલ છે. આ ટીમ ગુરુદ્વારા સુધી લગભગ 4 કિલોમીટર પાકિસ્તાનની અંદર જશે. 

બીજી તરફ, ભારત તરફથી વીઆઇપી ટીમ માટે આંતકી હુમલાના ઇનપુટ મળ્યા બાદ પાકિસ્તાન પાસે કડક સુરક્ષા બંદોબસ્તની માંગ કરાઇ છે. સાથે જ ઇન્ટેલિઝન્સ ઇનપુટની જાણકારી શેયર કરવામાં આવી છે. 

પાક. પૂર્વ વડાપ્રધાન માટે કરી આ તૈયારી

પાકિસ્તાને પૂર્વ વડાપ્રધાન મનમોહન સિંહ માટે બેટરીથી ચાલતી અને ચારેય તરફથી ખુલ્લી કારનું આયોજન કર્યું છે. જોકે, આ પૂર્વ પીએમને ભારત દ્વારા અપાતી ઝેડ પ્લસ શ્રેણીની સુરક્ષાના બરાબર નથી. એવામાં ભારતે પાકિસ્તાનને વધુ સુરક્ષા બંદોબસ્ત માટે કહ્યું છે. સાથે જ ભારતની ટીમમાં સામેલ લોકોની સુરક્ષા માટે વિશેષ સુરક્ષાનું આયોજન કરવા પણ કહ્યું છે. 

આટલુ જ નહીં, ભારતે સુરક્ષા વ્યવસ્થાની ચકાસણી માટે પોતાની એક ટીમને પાકિસ્તાનમાં દાખલ થવા દેવાની મંજુરી માંગી છે. જોકે, પાકિસ્તાને તેનો કોઇ જવાબ આપ્યો નથી.