શરમજનક / પાકિસ્તાનમા 400 લોકો મહિલા ટિકટોકર પર વરૂની જેમ તૂટી પડ્યા, હવામાં ઉછાળીને કપડાં ફાડી નાંખ્યા

ટિકટોકર  છોકરી સાથે દુર્વ્યવહાર 
તાજેતરમાં પાકિસ્તાનના લાહોરનો એક વિડીયો વાયરલ થયો હતો જેમાં પાકિસ્તાનના સ્વાતંત્ર્ય દિવસ નિમિત્તે ચાલી રહેલી ઉજવણીમાં એક ટિકટોકર છોકરી સાથે દુર્વ્યવહાર થતો જોવા મળી રહ્યો છે. 

સેંકડો લોકો હતા હાજર 
આ વિડીયોમાં દેખાઈ રહ્યું છે એ મુજબ 400 થી વધારે લોકો મિનાર એ પાકિસ્તાન નજીક એક ટિકટોકર છોકરી સાથે દુર્વ્યવહાર કરી રહ્યા છે. તેમણે છોકરીને જબરદસ્તી  ઊંચકી લીધી હતી. આ લોકો પોતાની હેવાનિયત પર ઉતરી આવ્યા હતા અને તેમણે છોકરીના કપડાં પણ ફાડી નાખ્યા હોવાની વાત મળી હતી. 

પાકિસ્તાનના લાહોરની ઘટનામાં બાદમાં પોલીસ તપાસ શરૂ કરી હતી. આ મામલે સેંકડો અજ્ઞાત લોકો સામે કેસ નોંધવામાં આવ્યો હતો. આ છોકરી ટિકટોક વિડીયો બનાવે છે અને પાકિસ્તાનના સ્વતંત્રતા દિવસ નિમિત્તે લાહોર સ્થિત મિનાર-એ-પાકિસ્તાન ખાતે છ જેટલા લોકો સાથે તે ગ્રેટર ઇકબાલ પાર્કમાં વિડીયો શુટ કરવા પહોંચી હતી. ત્યારે તેની સાથે આ ભયાનક ઘટના બની હતી. 

ફરિયાદ નોંધવામાં આવી 
લાહોરના લોરી અડ્ડા પોલીસ સ્ટેશનમાં છોકરી દ્વારા ફરિયાદ કરવામાં આવી હતી. જેમાં તેણે જણાવ્યું હતું કે તે અને તેના સાથીઓ સાથે ગર્વવર્તન કરવામાં આવ્યું હતું. યુવતીએ ફરિયાદમાં જણાવ્યું હતું કે ટોળાએ તેને ઉપાડી લીધી  હતી અને તેને છોડાવવાની વિનંતી કરવા છતાં તેને ઉછાળતા રહ્યા અને છોકરીના કપડા પણ ફાડી નાખ્યા હતા. આ દરમિયાન તેના સાથીઓ સાથે પણ ઘણું ગેરવર્તન થયું હતું. ભીડમાં હાજર લોકોએ બળજબરીથી તેની વીંટી અને કાનની બુટ્ટી ઉતારી. તેનો મોબાઈલ ફોન, આઈડી કાર્ડ અને 15,000 રૂપિયા છીનવી લીધા. લાહોર પોલીસે આ મામલે તપાસ શરૂ કરવાનું કહ્યું છે.