પાકિસ્તાન કાચા તેલને લઈને ભારતના માર્ગ પર ચાલવાનું વિચારી રહ્યું છે. પાકિસ્તાનના નાણાપ્રધાન ઈશાક ડારે કહ્યું કે અમેરિકા પાકિસ્તાનને રશિયન તેલ ખરીદવાથી રોકી શકે નહીં
પાકિસ્તાન કાચા તેલને લઈને ભારતના માર્ગ પર
આવનાર સમયમાં પાકિસ્તાન રશિયા પાસે તેલ ખરીદશે
પાકિસ્તાનના મંત્રીએ અમેરિકા પર નિશાન સાધ્યું હતું
પાકિસ્તાન કાચા તેલને લઈને ભારતના માર્ગ પર ચાલવાનું વિચારી રહ્યું છે. પાકિસ્તાનના મંત્રીએ અમેરિકા પર નિશાન સાધતા કહ્યું છે કે તે પાકિસ્તાનને રશિયા પાસેથી તેલ ખરીદવાથી રોકી શકે નહીં. એ વાત જાણીતી છે કે રશિયા-યુક્રેન યુદ્ધના કારણે પશ્ચિમી દેશોએ રશિયા પર કડક પ્રતિબંધો લગાવ્યા છે, પરંતુ આ બધાની વચ્ચે પણ ભારત રશિયા પાસેથી ઓછા ભાવે મોટા પાયે ક્રૂડ ઓઈલ ખરીદી રહ્યું છે. આવી સ્થિતિમાં એક મોટું પગલું ભરતાં પાકિસ્તાને રશિયા પાસેથી તેલ ખરીદવાનું લગભગ નક્કી કરી લીધું છે.
રશિયાથી તેલ ખરીદી કરશે
પાકિસ્તાનના નાણાપ્રધાન ઈશાક ડારે કહ્યું કે અમેરિકા પાકિસ્તાનને રશિયન તેલ ખરીદવાથી રોકી શકે નહીં અને તે ટૂંક સમયમાં શક્ય બનશે. ડારે તાજેતરમાં દુબઈમાં પાકિસ્તાન મુસ્લિમ લીગ-નવાઝ (PML-N)ના કાર્યકરોને સંબોધિત કરતી વખતે આ ટિપ્પણી કરી હતી. સપ્ટેમ્બરમાં યુએસની મુલાકાત દરમિયાન, ડારે પશ્ચિમી પ્રતિબંધો વચ્ચે રશિયા પાસેથી તેલ ખરીદવા અંગે ચર્ચા કરવા માટે યુએસ સ્ટેટ ડિપાર્ટમેન્ટના અધિકારીઓ સાથે બેઠક યોજી હતી.
ભારતના રસ્તે પાકિસ્તાન
સપ્ટેમ્બરમાં તેમની યુએસની મુલાકાતનો ઉલ્લેખ કરતા નાણામંત્રીએ કહ્યું, "અમે યુએસ (રાજ્ય વિભાગ)ના અધિકારીઓને કહ્યું હતું કે યુએસ અમને રશિયા પાસેથી તેલ ખરીદવાથી રોકી શકે નહીં કારણ કે આપણો પાડોશી દેશ ભારત પણ રશિયા પાસેથી તેલ ખરીદી રહ્યું છે."અગાઉ પાકિસ્તાને કહ્યું હતું કે તે રશિયા પાસેથી તેલ ખરીદવામાં રસ ધરાવે છે જો તે ભારતની જેમ જ વ્યાજબી દરે આપવામાં આવે.
પાકિસ્તાન 35મો સૌથી મોટો આયાતકાર દેશ છે.
પાકિસ્તાનના મંત્રીએ પુનરોચ્ચાર કર્યો કે મંત્રાલય ભારત જેવી જ શરતો પર રશિયા પાસેથી તેલ ખરીદવાનો પ્રયાસ કરશે. ડારે કહ્યું, "આગામી કેટલાક મહિનામાં, તમે જોશો કે સરકાર આ સંબંધમાં પાકિસ્તાનની તરફેણમાં મહત્વપૂર્ણ પગલાં લે છે."નોંધનીય છે કે પાકિસ્તાન વિશ્વમાં ક્રૂડ પેટ્રોલિયમનો 35મો સૌથી મોટો આયાતકાર દેશ છે અને 2020-21માં તેણે 1.92 અબજ ડોલરના ક્રૂડ તેલની આયાત કરી હતી. નવેમ્બરની શરૂઆતમાં, પાકિસ્તાન સરકારે તેની સ્થાનિક અછતને પહોંચી વળવા માટે રશિયા પાસેથી 300,000 ટન ઘઉંની આયાત કરવા માટે લગભગ USD 112 મિલિયનના સોદાને મંજૂરી આપી હતી.
ઈમરાન ખાને પણ કરી ભારતની પ્રશંસા
પાકિસ્તાનના પૂર્વ વડાપ્રધાન ઈમરાન ખાને પણ રશિયા પાસેથી ક્રૂડ ઓઈલ ખરીદવાનો મુદ્દો ઉઠાવતા ભારતની પ્રશંસા કરી છે.તાજેતરમાં તેમણે કહ્યું હતું કે અમેરિકાના દબાણ છતાં ભારત રશિયા પાસેથી ઓછી કિંમતે તેલ ખરીદી રહ્યું છે.ઇમરાન ખાને કહ્યું હતું કે, "ક્વોડનો ભાગ હોવા છતાં અને યુએસના દબાણમાં, ભારતે જનતાને રાહત આપવા માટે સબસિડીવાળા રશિયન તેલની ખરીદી કરી હતી. અમારી સરકાર સ્વતંત્ર વિદેશ નીતિની મદદથી આને પ્રાપ્ત કરવા માટે કામ કરી રહી હતી." "આ સાથે જ ઈમરાન ખાને આ મુદ્દે વર્તમાન પાકિસ્તાન સરકાર પર પણ પ્રહારો કર્યા હતા.