ક્રિકેટ જગત / પાકિસ્તાનનો કાતિલ ફાસ્ટબોલર છાતીમાં દુઃખાવો થતાં હોસ્પિટલમાં દાખલ, ભારત સામે કરી હતી શાનદાર બોલિંગ

• પાકિસ્તાનના ફાસ્ટ બોલર નસીમ શાહની તબિયત લથડી
• મંગળવારે રાતે તબિયત વધુ બગડતા હોસ્પીટલમાં દાખલ
• નસીમ શાહ ઈંગ્લેન્ડ સામેની ટી-20માં રમી નહી શકે

પાકિસ્તાન ક્રિકેટ ટીમના કેમ્પમાંથી મોટા સમાચાર સામે આવ્યા છે. આ સમાચાર ફાસ્ટ બોલર નસીમ શાહ સાથે જોડાયેલા છે. પાકિસ્તાની મીડિયા રિપોર્ટ્સ અનુસાર નસીમ શાહની તબિયત અચાનક ખરાબ થઈ ગઈ, ત્યારબાદ મંગળવારે તેમને લાહોરની એક હોસ્પિટલમાં લઈ જવામાં આવ્યા. નસીમ શાહ ઈંગ્લેન્ડ સામેની 5મી ટી-20માં રમે તેવી શક્યતા હતી. પરંતુ અચાનક બગડતી સ્થિતિ બાદ તે શ્રેણીની 5મી ટી-20માંથી બહાર થઈ ગયો છે.

અચાનક તબિયત બગડી
હવે સવાલ એ છે કે અચાનક નસીમ શાહનું શું થયું, ત્યારબાદ તેને હોસ્પિટલ લઇ જવામાં આવ્યો. સૂત્રોના જણાવ્યા અનુસાર, તેને સખત તાવ અને પછી છાતીમાં દુખાવો થયો હતો. નસીમની તબિયત સતત લથડતા તેને હોસ્પિટલ લઈ જવામાં આવ્યો હતો. સૂત્રોએ જણાવ્યું હતું કે પાકિસ્તાની પેસરની હાલત એટલી ખરાબ હતી કે તે મંગળવારે આખો દિવસ તેના રૂમમાંથી બહાર પણ નીકળ્યો ન હતો.

હોસ્પીટલમાં દાખલ કરવામાં આવ્યો
મંગળવારે સાંજે નસીમ શાહની તબિયત લથડી હતી અને ત્યાર બાદ સ્થિતિ વધુ ખરાબ થઇ રહી હતી, ત્યાર બાદ તેમને હોસ્પિટલ લઇ જવામાં આવ્યા હતા. નસીમ શાહનો પહેલા હોસ્પિટલમાં ડેન્ગ્યૂનો ટેસ્ટ કરવામાં આવ્યો હતો, ત્યારબાદ તેને સારવાર માટે ખાનગી હોસ્પિટલમાં દાખલ કરવામાં આવ્યો હતો.

નસીમ શાહ 5મી ટી-20માંથી બહાર
નસીમ શાહ પાકિસ્તાન માટે 5મી ટી-20 મેચમાં રમે તેવી શક્યતા હતી. પરંતુ, હવે તે તેમાંથી બહાર નીકળી ગયો છે. એટલું જ નહીં, તે છેલ્લી બે ટી-20 મેચમાં રમશે કે નહીં તેનો નિર્ણય તેની તબિયત જોયા બાદ જ લેવામાં આવશે. નસીમ શાહને કરાંચીમાં રમાયેલી શ્રેણીની પ્રથમ 4 મેચમાંથી આરામ આપવામાં આવ્યો હતો.