પાકિસ્તાનના ભૂતપૂર્વ કેપ્ટન શાહિદ આફ્રિદીની સૌથી મોટી પુત્રી અક્સાની પાકિસ્તાનની ક્રિકેટ ટીમના ફાસ્ટ બોલર શાહિન આફ્રિદી સાથે સગાઈ થશે.
શાહિદ આફ્રિદીનો જમાઈ બનશે શાહિન આફ્રિદી
પાકિસ્તાનનો આશાસ્પદ બોલર છે શાહીન આફ્રિદી
હાલમાં જ વધુ એક પુત્રીનો પિતા બન્યો છે શાહિદ આફ્રિદી
૨૦૦૧માં જન્મેલ શાહિન હાલની પાકિસ્તાનની ક્રિકેટ ટીમનો આધારભૂત બોલર બની ગયો છે. પાકિસ્તાની મીડિયા અનુસાર શાહિનના પિતા અયાઝખાને આ અંગેની જાણકારી પત્રકારોને આપી હતી. ગઈ કાલે આ વાતની પુષ્ટિ કરતાં શાહિદ આફ્રિદીએ જણાવ્યું હતું કે શાહિન આફ્રિદીના પરિવારે લગ્ન માટે તેમની પુત્રીનો હાથ માંગ્યો છે અને આ માટે તેમણે મારો ઔપચારિક સંપર્ક કર્યો હતો.
પાકિસ્તાની ક્રિકેટર શાહિદ આફ્રિદી પાંચ પુત્રીઓનો પિતા છે
પાકિસ્તાની પ્રસાર માધ્યમોમાં આ વાત બહાર આવતા શાહિદ આફ્રિદીએ ટ્વિટ કર્યું, ''શાહિનના પરિવારને મારા પરિવાર સાથે મારી પુત્રી અંગે વાત કરી. બંનેના પરિવારજનો એકબીજાના સંપર્કમાં છે. સંબંધ તો સ્વર્ગ (જન્નત)માં બને છે. જો અલ્લાહની ઈચ્છા હશે તો આ સંબંધ નક્કી થઈ જશે. મારી દુઆ શાહિન સાથે છે. તે મેદાન અને મેદાનની બહાર સફળતા હાંસલ કરતો રહે તેવી મારી શુભેચ્છા'' નોંધનીય છે કે હાલમાં થોડા સમય પહેલા જ આફ્રિદી વધુ એક પુત્રીનો પિતા બન્યો હતો. તેને કુલ પાંચ પુત્રીઓ છે.
શાહિદ આફ્રિદીના આ ટ્વિટના જવાબમાં શાહિન આફ્રિદીએ લખ્યું, ''અલહમદુલિલ્લાહ, તમારી દુઆઓ માટ શુક્રિયા, લાલા... તમે આખા દેશની શાન છો.'' આ વાતની સાથે જ શાહિનના પિતા અયાઝખાને આ વાતની પુષ્ટિ કરતાં કહ્યું, ''અમે શાહિદ આફ્રિદીના પરિવારને પ્રસ્તાવ મોકલ્યો હતો અને તેનો સ્વીકાર પણ કરી લેવામાં આવ્યો છે. અમે ખૂબ ખુશ છીએ. બંને પરિવારો છેલ્લા થોડા મહિનાથી આને લઈ ચર્ચા કરતા હતા. લગ્નની તારીખ ટૂંક સમયમાં જ જાહેર કરવામાં આવશે.
શાહીન આફ્રિદી પાકિસ્તાનનો આધારભૂત બોલર છે
મહત્વનું છે કે પાકિસ્તાન તરફથી ૧૫ ટેસ્ટમાં શાહિન આફ્રિદી ૪૮ વિકેટ ઝડપી ચૂક્યો છે. આ દરમિયાન તેનો શ્રેષ્ઠ દેખાવ ૭૭ રનમાં પાંચ વિકેટ ઝડવાનો રહ્યો છે. ૨૨ વન ડે મેચમાં તે ૪૫ વિકેટ ઝડપી ચૂક્યો છે. આ ઉપરાંત ૨૧ ટી-૨૦ ઈન્ટરનેશનલ મેચમાં તેણે ૨૫ વિકેટ લીધી છે.