T20WorldCup / પાકિસ્તાને ભારતનું કામ આસાન કર્યુંઃ હવે કિવીને હરાવીશું તો સેમિમાં સ્થાન નિશ્ચિત

પાકિસ્તાને ભારતનો સેમિફાઇનલમાં પહોંચવાનો રસ્તો કર્યો આસન 
ન્યૂઝીલેન્ડને હરાવીને ભારત સેમિફાઇનલ માટે થઈ શકે છે ક્વોલિફાય 
ટી-૨૦ વિશ્વકપમાં ન્યૂઝીલેન્ડ સામે ક્યારેય જીતી નથી ટીમ ઇન્ડિયા 

હવે ભારતને જરૂર છે ન્યૂઝીલેન્ડની ટીમને હરાવવાની અને ત્યાર બાદ સતત ત્રણ મેચ જીતીને સેમિફાઇનલ માટે ક્વોલિફાય કરી લેવાની. ટીમ ઇન્ડિયા જો ન્યૂઝીલેન્ડ સામે હારી જશે તો તે સેમિફાઇનલની રેસમાંથી લગભગ બહાર ફેંકાઈ જશે. અહીં આપણે એવું માનીને ચાલીએ કે ગ્રૂપ-૨ની મોટી ટીમો- એટલે કે ભારત, પાકિસ્તાન અને ન્યૂઝીલેન્ડ નાની ટીમો એટલેકે અફઘાનિસ્તાન, સ્કોટલેન્ડ અને નામીબિયાને હરાવવામાં સફળ રહેશે.

ભારત સેમિફાઇનલ માટે થઈ શકે છે ક્વોલિફાય 
આ સ્થિતિમાં ટીમ ઇન્ડિયા જો ન્યૂઝીલેન્ડને હરાવી દે તો પાકિસ્તાન ટીમના ૧૦ પોઇન્ટ થશે અને તે ગ્રૂપમાં ટોચના સ્થાને રહેશે. ન્યૂઝીલેન્ડ સહિત ત્રણ નાની ટીમને હરાવીને ભારત આઠ પોઇન્ટ સાથે બીજા સ્થાન પર રહેશે. ન્યૂઝીલેન્ડ ત્રણ નાની ટીમને હરાવીને છ પોઇન્ટ સાથે ત્રીજા સ્થાને રહેશે. આથી પાકિસ્તાન પ્રથમ અને ભારત બીજા સ્થાને રહીને સેમિફાઇનલ માટે ક્વોલિફાય કરી લેશે. આ સ્થિતિમાં ભારતનો સામનો ગ્રૂપ-૧માં ટોચના સ્થાને રહેનારી ટીમ સામે થશે. ગ્રૂપ-૧માં ટોચ પર રહેવાની દાવેદાર ટીમ ઈંગ્લેન્ડ, ઓસ્ટ્રેલિયા અને દક્ષિણ આફ્રિકા છે.

ટી-૨૦ વિશ્વકપમાં ન્યૂઝીલેન્ડ સામે ક્યારેય જીતી નથી ટીમ ઇન્ડિયા 
હવે જો ન્યૂઝીલેન્ડની ટીમ ભારતે હરાવી દે તો પણ પાકિસ્તાનના ૧૦ પોઇન્ટ જ રહેશે, પરંતુ આ સ્થિતિમાં ન્યૂઝીલેન્ડના આઠ પોઇન્ટ હશે અને ભારત ફક્ત છ પોઇન્ટ સાથે ત્રીજા સ્થાને ધકેલાઈ જશે. આ સ્થિતિમાં પાકિસ્તાન અને ન્યૂઝીલેન્ડની ટીમ સેમિફાઇનલમાં પહોંચી જશે અને ભારતીય ટીમ સેમિફાઇનલની રેસમાંથી બહાર ફેંકાઈ જશે. પાક. સામેની મેચ બાદ ભારત હવે ૩૧ ઓક્ટોબરે ન્યૂઝીલેન્ડ સામે, ૩ નવેમ્બરે અફઘાનિસ્તાન સામે, ૫ નવેમ્બરે સ્કોટલેન્ડ સામે અને ૮ નવેમ્બરે નામિબિયા સામે રમવાનું છે. ભારત માટે સૌથી મુશ્કેલ મેચ ન્યૂઝીલેન્ડ સામે રહેવાની છે. ટીમ ઇન્ડિયા ટી-૨૦ વિશ્વકપમાં ન્યૂઝીલેન્ડ સામે ક્યારેય જીતી શકી નથી.

હંમેશાં અપસેટ સર્જતી રહે છે અફગાનિસ્તાન
આ ઉપરાંત ગ્રૂપ-૨માં એક ટીમ એવી છે, જે હંમેશાં અપસેટ સર્જતી રહે છે. એ ટીમ છે અફગાનિસ્તાન છે. અફઘાનિસ્તાનની ટીમ ૨૯ ઓક્ટોબરે પાકિસ્તાન સામે, ૩૧ ઓક્ટોબરે નામીબિયા સામે, ૩ નવેમ્બરે ભારત સામે અને ૭ નવેમ્બરે ન્યૂઝીલેન્ડ સામે ટકરાશે. અફઘાનિસ્તાને સુપર-૧૨ની પોતાની પ્રથમ જ મેચમાં નામીબિયાને ૧૩૪ રને હરાવીને પોતાનો નેટ રનરેટ ખૂબ જ ઊંચો બનાવી લીધો છે. હવે વધુ એક અપસેટ સર્જીને અફઘાનિસ્તાનની ટીમ પણ સેમિફાઇનલમાં પહોંચી શકે છે. અફઘાન ટીમના હાલ બે પોઇન્ટ છે અને તેનો રનરેટ પ્લસ ૬.૫૦નો છે. પોઇન્ટ ટેબલમાં હાલ આ ટીમ બીજા સ્થાન પર છે.