કચ્છ / ઘૂસણખોરીના એંધાણઃ હરામી નાળાને લઇને પાકિસ્તાને મિત્ર ડ્રેગનને લીઝ પર આપી જમીન!

• કચ્છ બોર્ડર નજીક ચીનનો પાકિસ્તાનની મદદથી પગપેસારો
• ડ્રેગનની ભારતને ચોતરફ ઘેરવાને લઇને નવી ચાલ
• ઇમરાન સરકારે સ્થાનિકના વિરોધની અવગણના કરી

ચીનનો પાકિસ્તાનની મદદથી ભારતને ઘેરવાનો પ્રયાસ

સૂત્રોને મળતી જાણકારી મુજબ પાકિસ્તાને જે જમીન ચીનને લીઝ પર આપી છે તે આંતરરાષ્ટ્રીય બોર્ડરથી માત્ર અંદાજે 10 કિલોમીટર દૂર હોવાનું સામે આવ્યું છે. આમ જો અહેવાલ સાચા હોય તો કચ્છ બોર્ડર નજીક ચીન પાકિસ્તાનની મદદથી પગપેસારો કરી રહ્યું છે. આમ ડ્રેગન પોતાની નવી ચાલ મુજબ ભારતને ચોતરફથી ઘેરવાની પોતાની રણનીતિ પર આગળ વધી રહ્યું હોય તેવુ લાગી રહ્યું છે. 

પાકિસ્તાને ચીનને 55 એકર જમીન લીઝ પર આપી ભાડે

પાકિસ્તાને હરામીનાળા પાસેની ઇન્ટરનેશનલ બોર્ડરની નજીક 10 કિલોમીટરની નજીક 55 એકર જમીન ચીનને લીઝ પર આપી ફરી નાપાક હરકત કરી રહ્યું છે. 

સ્થાનિકોએ પાકિસ્તાન સરકારનો કર્યો વિરોધ

જો કે સૂત્રોના જણાવ્યા અનુસાર પાકિસ્તાનના આ પગલાને લઇને સ્થાનિકોઓએ ભારે વિરોધ દર્શાવ્યો હતો. જો કે તેમ છતાં ઇમરાન સરકારે સ્થાનિકના વિરોધની અવગણના કરી ચીનની કંપનીને લીઝ પર જમીન આપી હોવાના અહેવાલ મળ્યાં છે. 

પાકિસ્તાનનો ચીન પર ભરોસો કાયમ

કાશ્મીર મુદ્દે પાકિસ્તાનને વિશ્વના કોઇ દેશનું સમર્થન ન મળતાં હવે તેઓ એકમાત્ર મિત્ર ચીન પર ભરોસો રાખી રહ્યું છે. જેમાં ઇમરાન ખાનની સરકાર એવું વિચારી રહી છે કે ચીનની અવરજવર આ વિસ્તારમાં વધારતા ભારત કોઇપણ પ્રકારની જવાબી કાર્યવાહી કરી ના શકે. 

ગ્વાદર બંદરનું સંચાલન ચીનને સોંપ્યું

ઉલ્લેખનીય છે કે પાકિસ્તાનમાં આવેલા ગ્વાદર બંદરનું સંચાલન ચીનને સોંપવામાં આવ્યું હતું. જો કે આ મામલાની ભારતે ગંભીરતાથી નોંધ લીધી હતી.

હરામી નાળામાંથી પાકિસ્તાન વારંવાર કરે છે ધૂસણખોરીનો પ્રયાસ

આમ પણ પાકિસ્તાન કચ્છમાં આવેલ હરામી નાળથી ઘૂસણખોરી કરવા વારંવાર  પ્રયત્નસીલ રહે છે. જેમાં ઘણી વખત BSF બિનવારસી બોટ અહીંથી ઝડપે છે. જો કે સૂત્રોને મળતી માહિતી મુજબ ચીનની કંપનીએ હરામી નાળા પાસે લીઝ પર જમીન મળી ગયા બાદ બાંધકામ શરૂ કર્યું છે.