ભારત સહિત દુનિયાભરના અનેક દેશ અત્યારના સમયે કોરોના સામે ઝઝૂમી રહ્યાં છે પરંતુ પાકિસ્તાન ભારતની જાસૂસીમાં લાગ્યું છે. પાકિસ્તાને ભારતની જાસૂસી કરવા માટે એક નવું કાવતરું ઘડ્યું છે. પાકિસ્તાનની ગુપ્તચર એજન્સી ISIએ ભારતીયોની જાસૂસી કરવા માટે નકલી આરોગ્ય સેતુ એપ્લિકેશન બનાવી છે. ઉલ્લેખનીય છે કે PM મોદી સતત તેમના ભાષણમાં આરોગ્ય સેતુ ઍપ ડાઉનલોડ કરવાનો આગ્રહ કરતા રહ્યાં છે.
કોરોના સંકટ વચ્ચે પાકિસ્તાનની નવી ચાલ
આરોગ્ય સેતુની ફેક એપ્લિકેશન બનાવી
કહેવાય છે કે પાકિસ્તાન દ્વારા એપ્રિલ 2020માં આરોગ્ય સેતુની આ ફેક એપ્લિકેશન બનાવવામાં આવી હતી. હવે આ બનાવટી એપનું નવું વર્ઝન લોન્ચ કરવામાં આવ્યું છે.
ISIની મદદથી હેકર્સ બનાવી એપ
ISIની મદદથી હેકર્સ આ એપ્લિકેશનને ભારતીય અમલદારશાહી અને સંરક્ષણ સંબંધિત સંસ્થાઓને ઉપલબ્ધ કરાવવાનો પ્રયાસ કરી રહ્યા છે. આ સિવાય પાકિસ્તાની હેકર્સ પણ આ એપ દ્વારા સામાન્ય ભારતીય નાગરિકોને નિશાન બનાવી રહ્યા છે.ભારત સરકારે કોરોના વાયરસના ચેપને અંકુશમાં રાખવા માટે આરોગ્ય સેતુ એપ શરૂ કરી, જેને ભારતમાં ઘણો સારો પ્રતિસાદ મળ્યો.
ભારત સરકાર દ્વારા બનાવવામાં આવી છે આરોગ્ય સેતુ એપ
દેશમાં કરોડો લોકો આ એપનો ઉપયોગ કરે છે.ભારત સરકાર દ્વારા સરકારી કર્મચારીઓ માટે આરોગ્ય સેતુ એપ ફરજિયાત કરી દેવામાં આવી છે. તેનો ફાયદો ઉઠાવતા ભારતની જાસૂસીના ઇરાદાથી પાકિસ્તાની હેકરોએ બનાવટી આરોગ્ય સેતુ એપ બનાવી છે.
મહારાષ્ટ્ર સાયબર વિભાગના IGનું નિવેદન
પાકિસ્તાન સમર્થિત હેકરો આ નકલી એપ્લિકેશન દ્વારા ભારતના અમલદારો અને સૈન્ય સાથે સંકળાયેલા લોકોને નિશાન બનાવવા માગે છે.જેથી હેકર્સ આ નકલી એપનીને વિભાગો સુધી ફેલાવવાનો પ્રયાસ કરી રહ્યા છે.મહારાષ્ટ્ર સાયબર વિભાગના IG યશસ્વી યાદવે કહ્યું કે, 'મહારાષ્ટ્ર સાયબર વિભાગને ખૂબ જ ખતરનાક જાણકારી મળી છે, જે આપણા દેશના સંવેદનશીલ ડેટાને ચોરી શકે છે. કેટલાક પાકિસ્તાની હેકરોએ ફેક આરોગ્ય સેતુ એપ્લિકેશન બનાવી છે જેથી તેઓ અમલદારો અને સંરક્ષણ અધિકારીઓના ફોન પરથી માહિતી મેળવી શકે.