J&K / આતંકીઓ સાથે સંપર્કમાં FM ટ્રાંસમિશનનો ઉપયોગ કરે છે પાક. સેનાઃ જાણો કોડવર્ડ

• કમ્યુનિકેશન માટે કોડ વર્ડનો ઉપયોગ કરી રહી છે પાકિસ્તાની સેના
• પાકિસ્તાનના રાષ્ટ્રગીત 'કોમી તરાના'ની મદદથી કરાઈ રહ્યો છે સંવાદ
• મોટી સંખ્યામાં આતંકીઓને ઘૂસાડવાની કોશિશ કરી રહ્યું છે પાકિસ્તાન

પાકિસ્તાન કાશ્મીરમાં અશાંતિ ફેલાવવાના તમામ પ્રયાસ કરી રહ્યું છે. કાશ્મીરમાં પાકિસ્તાનના આતંકીઓ ઘૂસાડવાનો સતત પ્રયાસ કરવામાં આવી રહ્યો છે. ગુપ્તચર એજન્સીએ હાલમાં જ પાકિસ્તાનના કોડવર્ડનો ખુલાસો કર્યો છે. સૂત્રોના જણાવ્યા અનુસાર પાકિસ્તાન કાશ્મીરમાં એફએમ ટ્રાન્સમિશનના ઉપયોગ મારફતે આતંકીઓ સાથે સંપર્ક સાધી રહ્યું છે. PoKમાં લગાવવામાં આવેલા  FM ટ્રાન્સમિશનની મદદથી સંદેશા મોકલવામાં આવે છે. જૈશ એ મોહમ્મદ માટે 66/88, લશ્કર એ તૈયબા માટે A/3 અને આતંકી સમૂહ અલ બદ્ર માટે D/9 કોડવર્ડનો ઉપયોગ થઈ રહ્યો છે.  

આ તમામ સંવાદ પાકિસ્તાનના રાષ્ટ્રગીત 'કોમી તરાના'ની મદદથી કરવામાં આવી રહ્યો છે. 5 ઓગસ્ટે જ્યારે આર્ટિકલ 370ને હટાવી દેવામાં આવ્યો ત્યારથી લગભગ એક અઠવાડિયા બાદથી પ્રયાસ શરૂ કરવામાં આવ્યા હતા. ત્યારબાદ આ વિસ્તારોમાં લેન્ડલાઈન, મોબાઈલ ફોન અને ઈન્ટરનેટ નેટવર્કને પણ બંધ કરવામાં આવ્યા હતા. 

ગુપ્ત જાણકારીમાં જાણવા મળ્યું છે કે હાઈ ફ્રીકવન્સીવાળા રેડિયો સ્ટેશનોની મદદથી  'કોમી તરાના' વગાડીને ભારતમાં એલઓસીની નજીકથી સિગ્નલ મોકલવામાં આવી રહ્યા છે. જેનો ઉપયોગ લશ્કર, જૈશ અને અલ બદ્ર દ્રારા જમ્મૂ અને કાશ્મીરમાં સ્થાનીય કેડર્સ સાથે સંવાદ માટે કરવામાં આવી રહ્યો છે.

સૂત્રો જણાવે છે કે એલઓસીની નજીક આતંકવાદીઓ દ્વારા વીએફએફની મદદથી સંદેશા મોકલવામાં આવી રહ્યા છે. આ પ્રકારના સંદેશાથી અને હિંસાના પ્રયાસોથી લોકોને ડરાવવામાં આવે છે. પાકિસ્તાનની સેના પણ પીઓકેના હાલના એફએમ ટ્રાન્સમિશન સ્ટેશનોને એલઓસીની નજીક સ્થાનાંતરિત કરી રહી છે. પાકિસ્તાની સેનાના 10 કોર્પ્સ કમાન્ડર પણ આ કામને માટે સિગ્નલ કોર્પને સોપ્યાં છે. એલઓસી પાસે પાકિસ્તાનના આતંકી કેમ્પ સક્રિય બન્યા છે અને સાથે જ 7 લોન્ચ પેડ પણ તૈયાર કરવામાં આવ્યા છે. 275 આતંકીઓ હાલમાં એક્ટિવ છે. જમ્મૂ કાશ્મીરમાં અશાંતિ ફેલાવવા માટે અફઘાન અને પશ્તૂન સિપાહી પણ તૈનાત કરી દેવામાં આવ્યા છે.

સૂત્રો જણાવે છે કે પાકિસ્તાની સેના અને આઈએસઆઈ મળીને ભારતની વિરુદ્ધમાં ષડયંત્ર રચવાની તમામ કોશિશ કરી રહ્યું છે. એલઓસીમાં પાકિસ્તાન મોટી સંખ્યામાં આતંકીઓેને તૈયાર કરી રહ્યું છે અને લોન્ચ પેડ નિર્માણનું કામ કરવામાં આવી રહ્યું છે. આતંકી ઉત્તર કાશ્મીરથી ગુરેજ સેક્ટરની મદદથી ભારતમાં ઘૂસવાની તૈયારી કરી રહ્યા છે. 
 

ફોટો સૌજન્ય -Twitter.com