આરોપ / આ સ્ટાર ક્રિકેટરે પાડોશની છોકરીનું ૧૦ વર્ષ શોષણ કર્યું, પ્રેગ્નન્ટ થઈ તો મારી નાખવાની ધમકી આપી હોવાનો આક્ષેપ

પીડિત છોકરીએ પ્રેસ કોન્ફરન્સ કરીને જણાવ્યું કે બાબરે લગ્નનું વચન આપીને ૧૦ વર્ષ સુધી તેનું શોષણ કર્યું છે. પ્રેગ્નન્ટ થઈ તો બાબરે મારપીટ કરી અને જાનથી મારી નાખવાની ધમકી આપી હતી. આ પ્રેસ કોન્ફરન્સને પાકિસ્તાની ન્યૂઝ ચેનલ '૨૪ ન્યૂઝ'એ પ્રસારિત કરી હતી. પાકિસ્તાની મીડિયામાં છોકરીનું નામ હામીઝા જણાવવામાં આવ્યું છે.

"બાબર હંમેશાં મને કહેતો હતો કે આપણે કોર્ટમાં લગ્ન કરીશું"

હામીઝાએ કહ્યું, ''બાબર અને હું એક જ સ્કૂલમાં ભણતાં હતાં. અમે એક જ મહોલ્લામાં રહેતાં હતાં. તેણે મને પ્રપોઝ કર્યું અને મેં તેનો સ્વીકાર કરી લીધો હતો. એ સમયે તેણે હજુ ક્રિકેટ રમવાનું પણ શરૂ કર્યું નહોતું. જેમ જેમ સમય વીતતો ગયો, અમે લગ્નનો પ્લાન કરવા માંડ્યાં હતાં. અમે અમારા પરિવારજનોને જણાવ્યું હતું, પરંતુ તેઓએ ઇનકાર કરી દીધો હતો. આથી ૨૦૧૧માં અમે ઘરેથી ભાગી નીકળ્યાં હતાં. બાબર હંમેશાં મને કહેતો હતો કે આપણે કોર્ટમાં લગ્ન કરીશું. આ દરમિયાન અમે ગુલબર્ગ અને પંજાબ હાઉસિંગ સોસાયટીમાં ભાડાના મકાનમાં રહ્યાં, પરંતુ તેણે લગ્ન કર્યાં નહીં.''

બાબરે કેટલાક મિત્રો સાથે મળીને મારું એબોર્શન કરાવી નાખ્યું

હામીઝાએ જણાવ્યું કે, ''મેં ઘણી વાર બાબરનો ખર્ચ પણ ઉઠાવ્યો હતો. ૨૦૧૪માં બાબર નેશનલ ક્રિકેટ ટીમમાં પસંદ થયો અને ધીમે ધીમે તેનું વર્તન બદલાવા માંડ્યું હતું. ૨૦૧૫માં મેં બાબરને જણાવ્યું કે હું પ્રેગ્નન્ટ છું. આ સાંભળ્યા બાદ તેનો પ્રતિભાવ બહુ જ વિચિત્ર હતો. તેણે મારું શારીરિક શોષણ કર્યું,  જોકે હું મારા ઘેર પાછી ફરી શકી નહીં. બાબરે કેટલાક મિત્રો સાથે મળીને મારું એબોર્શન કરાવી નાખ્યું. ૨૦૧૭માં મેં નાસિરાબાદ પોલીસ સ્ટેશનમાં બાબર વિરુદ્ધ ફરિયાદ નોંધાવી. તે પોલીસ સ્ટેશને તો નહોતો જ આવ્યો, ઉપરથી મારા પર સમાધાન કરવા માટે દબાણ કરવા લાગ્યો હતો.''

હામીઝાએ બાબરને કેપ્ટનપદેથી હટાવવાની માગણી કરતાં કહ્યું,  ''૨૦૧૭માં બાબરે ફોન નંબર પણ બદલી નાખ્યો હતો અને ત્યાર બાદ પણ ત્રણ વર્ષ સુધી તે મારું શોષણ કરતો રહ્યો હતો.''

PCBના સીઈઓ વસીમ ખાને કહ્યું: બાબર કેપ્ટન તરીકે યથાવત રહેશે

બાબરને કેપ્ટનપદેથી હટાવવાની હામીઝાની માગણી અંગે PCBના સીઈઓ વસીમ ખાને કહ્યું, ''બાબર પાકિસ્તાન ક્રિકેટનું ભવિષ્ય છે. તે ત્રણેય ફોર્મેટના કેપ્ટન તરીકે યથાવત્ રહેશે. હું તમને વિશ્વાસ અપાવું છું કે જ્યાં સુધી પાકિસ્તાન બોર્ડમાં એહસાન મની (ચેરમેન) અને હું રહીશ ત્યાં સુધી કેપ્ટન તરીકે બાબર જ રહેશે.''