ઇસ્લામાબાદ: પાકિસ્તાનની ફરી એકવાર મજાક ઉડી રહી છે. આ વખતે મજાકનું કારણ ઘણું રસપ્રદ છે. તાજો કેસ પહેલી વખત ચીન પહોંચેલા પાકિસ્તાની પીએમ ઇમરાન ખાનથી જોડાયેલો છે.
ઘટના એવી છે કે ચીનમાં ઈમરાન ખાનનું લાઈવ પ્રસારણ થઈ રહ્યું હતું. તે સમયે પાકિસ્તાની ન્યૂઝ ચેનલ PTVમાં સ્ક્રીન પર બેઈઝિંગના સ્થાને બેગિંગ લખેલું પ્રસારણ થયું. આ સમયે ઈમરાન ખાન ચીનમાં ભાષણ આપી રહ્યા હતા. તે સમયે 20 સેકન્ડ સુધી આ ક્ષતિ સ્ક્રીન પર રહી. જેના કારણે પાકિસ્તાનની ફરી એકવાર મજાક ઉડી રહી છે..
ઈમરાન ખાન દુનિયાભરમાં પોતાના દેશની ગરીબીના રોતડા રડી રહ્યા છે અને ગરીબી દૂર કરવા ખર્ચામાં ઘટાડો કરવાનો પ્રયાસ કરી રહ્યા છે. એટલું જ નહીં વધારાની કાર અને ભેંસો પણ નીલામ કરી દીધી છે. તેવા સમયે ઈમરાન ખાનના લાઈવ સ્પીચ સમયે ટીવી સ્ક્રીન પર બેગિંગ જવું એ મોટી ભૂલ કહેવાય.
બેગિંગ એટલે ભીખ માગવી થાય છે અને તેના માટે PTVએ દેશની માફી માગવી પડી છે. તો પાકિસ્તાની સૂચના અને પ્રસારણ મંત્રીએ પણ તપાસના આદેશ આપ્યા છે. જોકે આ ક્ષતિની સોશિયલ મીડિયા પર ભારે ટીકા થઈ હતી.