ડાંગ / Photos: કુદરતી સૌંદર્ય માણવા ગુજરાતના મિની કાશ્મીરમાં પહોંચ્યા પ્રેમી જોડા, તમે પણ જુઓ આહ્લાદક નજારો

• મનમોહક ડાંગ જિલ્લાના ગીરા ધોધની મુલાકાતે સહેલાણીઓ
• વાતાવરણમાં પ્રસરતું ઝરણાનું ધૂમ્મસ
• સ્થાનિક દુકાનદારોને કમાણીની આશા 

ગુજરાતનું મિની કશ્મીર એટલે ડાંગ જિલ્લો. ઘનઘોર જંગલોથી ઘેરાયેલો ડાંગ જિલ્લો વરસાદમાં સોળે કળાએ ખિલી ઉઠ્યો છે અને આ પ્રકૃતિનો લ્હાવો લેવા માટે હવે શહેરીજનોએ જંગલ તરફ દોટ મુકી છે. ડાંગ જિલ્લા અને ઉપરવાસમાં થયેલા ભારે વરસાદ બાદ ગીરા ધોધ સક્રીય થઈ ગયો છે. જેને લઈને સહેલાણીઓનો ગીરા ધોધની મુલાકાતે પહોંચી રહ્યા છે.

પાણીનો પ્રવાહ વધુ હોવાથી ગીરા ધોધ નીચે જવાની મનાઈ 
ગીરા ધોધ સામાન્ય રીતે ચોમાસામાં જ એિક્ટવ હોય છે. ત્યારે હવે પ્રકૃતિ પ્રેમીઓ ધોધની આગળ ઠંડા પાણીની ઉડતી આ છોળને માણવા આવી રહ્યા છે. આ વર્ષે ડાંગમાં ભારે વરસાદને પગલે ગીરા ધોધે રૌદ્ર સ્વરૂપ ધારણ કર્યું હતું. ગીરા ધોધમાં પાણીનો પ્રવાહ વધુ હોવાથી ગીરા ધોધ નીચે જવાની મનાઈ છે. તંત્રએ પણ અહીં સુરક્ષાને ધ્યાનમાં રાખીને પાણીના વહેણ નજીક દોરડા બાંધી દીધા છે. જેથી કોઈ સહેલાણીનો જીવ જોખમમાં ન મુકાય પણ હાલ તો અહીં સહેલાણીઓનો ધસારો વધી રહ્યો છે. કોઈ સેલ્ફી પાડી રહ્યા છે. તો કોઈ રિલ્સ બનાવી રહ્યા છે. એવું નથી કે અહીં માત્ર ગુજરાતીઓ જ પહોંચી રહ્યા છે. પણ છેક મુંબઈથી લોકો આ નજારો માણવા આવ્યા છે. 

સ્થાનિક દુકાનદારોની આશા પણ જીવંત થઈ 
નાના બાળકોથી લઈને મોટેરાઓ અને યુવાનો ગીરા ધોધનો રમણીય નજારો માણવા માટે પહોંચી રહ્યા છે. મુંબઈ અને મહારાષ્ટ્રભરમાંથી લોકો આ નજારો માણવા માટે આવ્યા છે.આ તરફ સાપુતારામાં પણ કુદરતી સૌંદર્ય સોળે કળાએ ખિલી ઉઠયું છે. સાપુતારા રોડ પર શિવઘાટ ધોધ પણ સક્રીય થયો હતો. પહાડો પરથી રોડ પર ધોધનું પાણી પડતાં આહલાદક દ્રશ્ય સર્જાયા હતા. સાપુતારમાં સહેલાણીઓ ઉમટતા હવે સ્થાનિક લોકોને રોજગારી મળવાની આશા જીવંત થઈ છે. કેમ કે ધોધમાર વરસાદથી અનેક માર્ગો ભૂસ્ખલન અને નદીમાં પૂર આવવાના કારણે બંધ હતા. જેથી સહેલાણીઓનો ધસારો ઘટયો હતો. જોકે હવે માર્ગો ખુલતા પ્રવાસીઓ ઉમટી રહ્યા છે.જેના પગલે સ્થાનિક દુકાનદારોની આશા પણ જીવંત થઈ છે. તો સહેલાણીઓ પણ આ ખુશનુમા વાતાવરણની મજા માણી રહ્યા છે.