રહીમ યાર ખાન જિલ્લામાં બસ-ટ્રક વચ્ચે ગમખ્વાર અકસ્માત
અકસ્માતમાં ઇજાગ્રસ્ત પાંચ વ્યક્તિની હાલત અત્યંત નાજુક
પાકિસ્તાનના પંજાબ પ્રાંતમાં બસ અને ટ્રક વચ્ચે સર્જાયેલા ગમખ્વાર અકસ્માતમાં 13 લોકોના મોત થતાં હડકંપ મચી ગયો છે. પ્રાથમિક વિગતો મુજબ શેરડીથી ભરેલો ટ્રક રોંગ સાઈડમાં આવી રહ્યો હોય એક બસ સાથે ધડાકાભેર અથડાઇ હતી. જોકે આ ઘટનામાં બસમાં સવાર 18 મુસાફરો પૈકી ઓછામાં ઓછા 13 લોકોના મોત થયા છે.
પાકિસ્તાનમાં દર્દનાક દુર્ઘટના
પાકિસ્તાનના પંજાબ પ્રાંતમાં શનિવારે સાંજે લાહોરથી લગભગ 400 કિલોમીટર દૂર રહીમ યાર ખાન જિલ્લામાં વિરુદ્ધ દિશામાંથી આવી રહેલી શેરડી ભરેલી ટ્રક સાથે બસ અથડાઈ હતી. બસમાં કુલ 18 મુસાફરો સવાર હતા. સ્થાનિક અધિકારીઓએ જણાવ્યું કે, દુર્ઘટના બાદ સ્થાનિક લોકો સાથે રેસ્ક્યુ ટીમ ઘાયલોને હોસ્પિટલ લઈ ગઈ હતી. જ્યાં 13 લોકોને મૃત જાહેર કરવામાં આવ્યા હતા, જ્યારે બાકીના પાંચ ઘાયલોની હાલત નાજુક હોવાનું કહેવાય છે. મૃતકોમાં મહિલાઓ પણ સામેલ છે.
શું કહ્યું સ્થાનિક અધિકારીએ ?
સ્થાનિક અધિકારીએ જણાવ્યું હતું કે, જ્યાં અકસ્માત થયો હતો તે રસ્તા પર વરસાદનું પાણી જમા થઈ ગયું હતું. અકસ્માત બાદ બસ શેરડીના ઢગલા નીચે દટાઈ ગઈ હતી અને બચાવ ટીમને ઘાયલોને હોસ્પિટલમાં લઈ જવામાં ઘણો સમય લાગ્યો હતો. આ તરફ અકસ્માત અંગે પ્રાપ્ત માહિતી અનુસાર, ટ્રક ચાલક ઘટનાસ્થળેથી ફરાર થઈ ગયો હતો.