લો બોલો  / રાત્રી કર્ફ્યૂની ઐસિતૈસી, ખુલ્લેઆમ ગાર્ડનમાં જુગાર રમતા નબીરાઓ ઝડપાયા

• સેટેલાઇટ સર્વેલન્સ સ્ક્વોડની ટીમને બાતમી મળી હતી 
• પોલીસે રેડ કરતાં સ્થળ ઉપર આઠ જણા જુગાર રમી રહ્યા હતા
• જુગારીઓ પાસેથી 33 હજાર રોક્ડા, મોબાઇલ સહિત 43 હજારનો મુદ્દામાલ જપ્ત કર્યો

શહેરમાં હાલ રા‌‌ત્રિ કર્ફ્યુ ચાલી રહ્યો છે તેમ છતાં જુગારિયા ભેગા થઇ મન મૂકીને ગમે ત્યાં જુગાર રમે છે અને પોલીસ પણ આવા જુગારિયાને પકડવા માટે તનતોડ મહેનત કરી રહી છે. શહેરના શ્યામલ ચાર રસ્તા પાસે આવેલ શાર્દૂલ એપાર્ટમેન્ટ નીચે ખુલ્લા ગાર્ડનમાં પોલીસે જુગાર રમતા આઠ જુગારિયાની મુદ્દામાલ સાથે ધરપકડ કરી છે.   

ગોળ કુંડાળું કરી જુગાર રમી રહ્યા હતા
સેટેલાઇટ સર્વેલન્સ સ્ક્વોડની ટીમને બાતમી મળી હતી કે શ્યામલ ચાર રસ્તા પાસે આવેલ શાર્દૂલ એપાર્ટમેન્ટ નીચે ખુલ્લા ગાર્ડનમાં કેટલાક લોકો ગોળ કુંડાળું કરી જુગાર રમી રહ્યા છે. આ માહિતીના આધારે પોલીસે રેડ કરતાં સ્થળ ઉપર આઠ જણા જુગાર રમી રહ્યા હતા. પોલીસે કોર્ડન કરી તમામને ઝડપી લીધા હતા. 

33 હજાર રોક્ડા, મોબાઇલ સહિત 43 હજારનો મુદ્દામાલ જપ્ત
દુષ્યંત શાહ (રહે. વસંતનગર ટાઉન‌િશપ, ગોતા), રાકેશ રાજપૂત   (રહે. કેસરનગર, જૂની કોર્ટ, નારોલ), ધવલ પ્રજાપતિ (રહે. અંબિકાનગર સોસાયટી, જગતપુર), પ્રિન્સ જૈન (રહે. શ્રીનંદનગર સોસાયટી, વેજલપુર), તેજસ પટેલ (રહે. મિલન એપાર્ટમેન્ટ, સેટેલાઇટ), જિંકલ પટેલ (રહે. અંબાજી મંદિર, સરખેજ), મૌલિક ચૌહાણ (રહે. બકેરી ‌સિટી, વેજલપુર), જસવંત પટેલ (રહે. અંબાજી મંદિર, સરખેજ)ની સેટેલાઇટ પોલીસે ધરપકડ કરી છે. પોલીસે જુગારીઓ પાસેથી 33 હજાર રોક્ડા, મોબાઇલ સહિત 43 હજારનો મુદ્દામાલ જપ્ત કર્યો છે.

ઉલ્લેખનીય છે કે કોરોના વાઈરસની દહેશત ચારેય બાજુમાં છે ત્યારે હવે લોકો ઘરે બેસીને કંટાળી ગયા છે. લોકો ટાઇમપાસ કરવા માટે પોતપોતાના ઘરમાં અવનવી પ્રવૃત્તિઓ કરી રહ્યા છે તો કેટલાક લોકો રૂપિયા કમાવવા માટે જુગારિયાને બોલાવી જુગાર રમાડી રહ્યા છે. બીજી તરફ પોલીસ પણ   જુગારિયાને ઝડપી પાડવા ખૂબ એક્ટિવ થઇ હોય તેવું લાગી રહ્યું છે.