દેશના પૂર્વોત્તર વિસ્તારમાં ભારે વરસાદ છે. ભૂસ્ખલન અને પૂરના કારણે જનજીવન પર માઠી અસર પડી છે. આસામમાં બ્રહ્મપુત્રમાં આવેલા પૂરના કારણે 14 લાખ લોકો પ્રભાવિત થયા છે. આસામમાં ધેમાજી, વિશ્વનાથ. જોરહાટ. ડારોંગ, બારપેટા, નલબારી, મજૌલી, ચિરંગ, ડિબ્રૂગઢ અને ગોલાઘાટ સહિત 25 જિલ્લામાં પૂર આવ્યું છે
ઉલ્લેખનીય છે કે, 64થી વધુ માર્ગો અને 19 ગામ પાણીમાં ડૂબેલા છે. તો 16 હજાર હેક્ટર જમીનનો પાક બરબાદ થઈ ગયો. આસામમાં સૌથી વધારે અસર બારપેટમાં થઈ છે. અહીં 85 હજાર લોકો પૂરથી પ્રભાવિત છે. તે સિવાય 800 ગામ અને 41 રેવન્યૂ સર્કલ પૂરમાં ડૂબી ગયા છે.
આપને જણાવી દઇએ કે, કાજીરંગા નેશનલ પાર્ક પણ પૂરથી પ્રભાવિત છે. લોકોને રાહત આપવા માટે કેમ્પની વ્યવસ્થા કરવામાં આવી છે. હાલ બિહારમાં ગતવર્ષની જેમ પૂરનું સંકટ જોવા મળી રહ્યું છે.
નેપાળમાં ભારે વરસાદના કારણે નદીઓ રેલમછેલ થઈ છે અને બિહારની અનેક નદીઓએ ભયજનક સપાટી વટાવી છે. ત્યારે હાલ લોકોનું સ્થળાંતર કરાઈ રહ્યું છે. લોકો હાલ ગત વર્ષની જેમ પૂરની તબાહી આવશે તેવા ભયના ઓથા હેઠળ જીવી રહ્યા છે.
બિહારમાં ભારે વરસાદની આગાહી
બિહારના અનેક જિલ્લામાં હવામાન વિભાગે ભારે વરસાદની આગાહી કરી છે. મોતિહારી, સીતામઢી અને અન્ય 10 જિલ્લામાં ભારે વરસાદની હવામાન વિભાગે આગાહી કરી છએ.. ભારે વરસાદની આગાહીને પગલે સ્કૂલ કોલેજ બંધના આદેશ પણ આપવામાં આવ્યા છે.
બિહારમાં છેલ્લા 24 કલાકમાં 9 ઇંચ વરસાદ નોંધાયો છે. ભારે વરસાદને પગલે ગંડક નદીનું જળસ્તર પણ વધ્યું છે. તંત્રએ બિહારમાં હાઈએલર્ટ પણ જાહેર કર્યુ છે.આ સાથે જ 144ની કલમ પણ લાગૂ કરવામાં આવી છે.