રાણપુરમાં વિધર્મી શિક્ષક દ્વારા વિદ્યાર્થિનીની છેડતી કરવામાં આવતા કોળી સમાજનો આક્રોશ જોવા મળી રહ્યો છે. રાણપુર કોળી સમાજ દ્વારા શહેરમાં બોર્ડ મુકી બંધનું એલાન આપવામાં આવ્યું છે.
રાણપુર કોળી સમાજ દ્વારા શહેરમાં બોર્ડ લગાવી બંધનું કર્યું એલાન
વિધર્મી શિક્ષકને કડક સજાની માગ કરવામાં આવી
બોટાદના રાણપુરમાં આવેલી કન્યા શાળામાં અભ્યાસ કરતી વિદ્યાર્થિની પાસે શાળાના લંપટ શિક્ષકે બિભત્સ માંગણી કરીને છેડતી કરતા શિક્ષણજગતમાં ખળભળાટ મચી ગયો છે. આ ઘટનાના સમગ્ર જિલ્લામાં ઘેરા પડઘા પડ્યા છે. શિક્ષણ જગતને કલંકિત કરતી આ ઘટનાને લઈને અનેક સવાલ ઉઠી રહ્યા છે. આ બનાવને પગલે રાણપુર કોળી સમાજમાં પણ આક્રોશ જોવા મળી રહ્યો છે.
મૌન રેલી યોજી મામલતદારને અપાશે આવેદન પત્ર
રાણપુર કોળી સમાજ દ્વારા આવતીકાલે રાણપુર બંધનું એલાન આપવામાં આવ્યું છે. શહેરમાં બોર્ડ મુકીને બંધનું એલાન આપ્યું છે. લંપટ શિક્ષકને કડકમાં કડક સજાની માંગ કરવામાં આવી રહી છે. આવતીકાલે રાણપુર કોળી સમાજ દ્વારા મૌન રેલી યોજી મામલતદારને આવેદનપત્ર આપવામાં આવશે.
શિક્ષણ જગતને લાંછન લગાડતી ઘટના
બોટાદમાં રાણપુરમાં શિક્ષણજગતને શર્મસાર કરતી ઘટના સામે આવી છે. રાણપુરમાં આવેલી કન્યા શાળામાં અભ્યાસ કરતી વિદ્યાર્થિની પાસે શાળાના જાવેદ ચુડેસરા નામના લંપટ શિક્ષકે બિભત્સ માંગણી કરીને છેડતી કરી હતી. વિધર્મી શિક્ષકની કરતૂતનો ભોગ બનેલી વિદ્યાર્થિનીએ તેના પરિવારને આ અંગે વાત કરતા ગતરોજ પરિવારજનો શાળા પર પહોંચતા સમગ્ર મામલાનો ભાંડાફોડ થયો હતો. રોષે ભરાયેલા વિદ્યાર્થિનીના પરિવારજનોએ શાળા પર હોબાળો મચાવ્યો હતો અને બાદમાં પોલીસ સ્ટેશન પહોંચ્યા હતા.
લંપટ શિક્ષક વિરુદ્ધ કડક કાર્યવાહીની માંગ
છેડતીને પગલે પરિવારે આરોપી શિક્ષક વિરુદ્ધ પોસ્કો અને છેડતીની ફરિયાદ નોંધાવી હતી અને લંપટ શિક્ષક વિરુદ્ધ કડક કાર્યવાહી કરવાની માંગ કરી હતી. વિદ્યાર્થીનીના પરિવારની ફરિયાદને આધારે રાણપુર પોલીસે આરોપીની ધરપકડ કરી વધુ તપાસ હાથ ધરી છે.