લોક સુનાવણી રદ્દ / કચ્છમાં GHCL કંપનીના પ્લાન્ટ મુદ્દે યોજાયેલી લોક સુનાવણીમાં ગ્રામજનો આક્રોશમાં આવ્યા, 20 ગામના લોકો કરી રહ્યા છે વિરોધ

• કચ્છમાં GHCL કંપનીના બાડા પ્લાન્ટ મુદ્દે લોક સુનાવણી રદ
• માંડવીના બાડા ગામ સહિત 20 ગામોના વિરોધ બાદ સુનાવણી રદ
• GHCL કંપની પ્રદૂષણ ફેલાવતી હોવાનો ગ્રામજનોનો આક્ષેપ

GHCL કંપનીના વિરોધમાં 20 ગામના લોકો જોડાતા લોક સુનાવણી રદ્દ

કચ્છના માંડવી નજીક આવેલા બાડાગામના સમુદ્રકાંઠા નજીક GHCLના સોડા એશ પ્લાન્ટ સાથે સોડિયમ બાયકાર્બોનેટ (ખાવાનો સોડા) અને કોલસા આધારીત 120 મેગાવોટનો કેપ્ટિવ પાવર પ્લાન્ટ સાથેનો કેમિકલ કોમ્પ્લેક્સ અસ્તિત્વમાં આવશે. કંપનીએ 2017 માં વાયબ્રન્ટ ગુજરાત ઈન્વેસ્ટમેન્ટ સમિટમાં ગુજરાત સરકાર સાથે MoU કર્યાં હતા. અને હાલ કંપનીએ 70 ટકાથી વધુ જમીન સંપાદિત કરી લીધી છે. બીજી તરફ સરકારી નિયમો મુજબ આજે લોક સુનાવણીનું આયોજન કરાયું હતું પરંતુ ગ્રામજનોએ વિરોધ કરતા સુનાવણી રદ કરવી પડી હતી.

બાડા સહિત 20 ગામોમાં સર્જાયો ભારે જનાક્રોશ

લોક સુનાવણીની તારીખ જાહેર થતાં જ સોડા એશ ફેક્ટરીની સામે  માંડવી તાલુકાના મોટા લાયજા, મેરાઉ, બાયઠ, દેઢીયા, ઉનડોઠ, ભીંસરા, ગોધરા, ભોજાય, માપર, બાંભડાઈ, ચાંગડાઈ, મોડકુબા, કોકલીયા, પાંચોટીયા, કાઠડા, ભાડા, જનકપુર અને વિંઢ એમ અન્ય 20 ગામોના જૈન મહાજને એકસૂરે GHCLનો વિરોધ કર્યો છે. મુંબઈ સ્થાયી થયેલાં જૈન મહાજનોએ પણ એકસૂરે કંપનીની એન્ટ્રી સામે અવાજ ઉઠાવ્યો છે.

સાધકો શાંતિ માટે આવે છે બાડા ગામમાં જતા હોય છે

બાડા ગામે આંતરરાષ્ટ્રીય વિપશ્યના કેન્દ્ર આવેલું છે, જ્યાં દેશ-વિદેશમાંથી સેંકડો સાધકો આવે છે. બાડાના સંકુલમાં જ 200થી વધુ મોર છે. આસપાસના ગામોમાં પણ સેંકડો મોર છે. શિયાળે સમુદ્રકાંઠે લાખ્ખો યાયાવર પંખીઓ આવે છે. બાડાના સરપંચ વેલજી કોલી જણાવ્યું હતું કે, અત્યાર સુધી અમે કુદરતના ખોળે રહેતાં હતા. હવે તે ખોળો છીનવાઈ જવાની ભીતિ છે. ગામમાં અશાંતિ સર્જાવાની ચિંતા છે. આમ માંડવી તાલુકામાં ઉઠેલાં જુવાળ સામે સત્તાધારી ભાજપ સરકાર અને નેતાઓએ ધારણ કરી રાખેલાં મૌનથી અનેક સવાલો ઉઠી રહ્યાં છે. 

પ્લાન્ટમાં સમુદ્રનું કરોડો લીટર જળ ઉલેચાશે

ઉલ્લેખનીય છે કે,  ઉત્પાદન માટે કંપનીને ભૂગર્ભ જળ નહીં પણ સમુદ્રી જળનો ઉપયોગ કરવા મંજૂરી મળી છે. કંપની થોડીક માત્રામાં ખારાં પાણીને મીઠું બનાવવા RO પ્લાન્ટ પણ બનાવશે. જેમાં દૈનિક ધોરણે  દૈનિક 16 લાખ ક્યુબિક મીટર સમુદ્રી પાણીના ઉપયોગ સામે દૈનિક 15.80 લાખ ક્યુબિક મીટર પાણીનું જરૂરી શુધ્ધિકરણ કરીને ભૂગર્ભ પાઈપલાઈન વાટે સમુદ્રમાં છોડી દેવાશે. એમોનિયાયુક્ત પાણી સમુદ્રી જીવસૃષ્ટિ માટે ખતરો  સાથે  સમુદ્રમાં છોડાનારું પાણી સંપૂર્ણ શુધ્ધ નહીં જ હોય, તેની PH લેવલ અલગ હશે. 

VTVના સળગતા સવાલ ?

- કચ્છનું મહત્વનું વિપશ્યના કેન્દ્ર કંપનીની નજરમાં ? 
- શુદ્ધ હવા અને શાંતિનું વિપશ્યના કેન્દ્ર પ્રદુષણ ઓકતા ઉદ્યોગની નજરમાં ?
- કચ્છના બાડામાં વિપશ્યના કેન્દ્રની પાસે પ્રદુષણ ફેકટરી GHCLને મંજૂરી કેમ ? 
- વિશ્વપ્રસિદ્ધ બાડા વિપશ્યના કેન્દ્ર પર GHCL કંપનીની નજર કેમ ? 
- માનસિક શાંતિના કેન્દ્રને પ્રદુષિત કેમ બનાવવા માંગો છો ?
- શાંત વિસ્તારમાં ઘોંઘાટની ફેક્ટરીઓની શા માટે જરુર છે ?
- શુદ્ધ પાણી અને પર્યાવરણને આજે આપણે નહીં બચાવીએ તો કોણ બચાવશે ?