વિરોધ / ગુજરાતભરમાં પરીક્ષાર્થીઓનો આક્રોશ ફૂટ્યો: અનેક બસસ્ટેન્ડ પર ચક્કાજામ-સૂત્રોચ્ચાર, પોલીસ થઈ દોડતી

• જુનિયર ક્લાર્કનું પેપર લીક થતાં પરીક્ષાર્થીઓમાં રોષ
• પરીક્ષાર્થીઓએ ચક્કાજામ કરી સરકાર વિરુદ્ધ સૂત્રોચ્ચાર કર્યો
• પોલીસે હોબાળો કરનારા પરીક્ષાર્થીઓને સમજાવવાનો કર્યો પ્રયાસ
• આરોપીઓ સામે કડકમાં કડક પગલાં લેવાની ઉમેદવારોની માગ

આજે જુનિયર ક્લાર્કની પરીક્ષા રદ્દ થતા અનેક ઉમેદવારોના સપના રોડાયા છે, પેપર લીક કરનારાએ ગુજરાતભરના લાખો બેરોજગારોનું ભવિષ્ય પણ ફોડી નાખ્યું છે. જુનિયર ક્લાર્કની પરીક્ષા આપવા માટે એક જિલ્લામાંથી બીજા જિલ્લામાં આવેલા પરીક્ષાર્થીઓને પેપર લીક થતા મોટો ધ્રાસ્કો પડ્યો છે. પરીક્ષા મોકૂફ રાખવામાં આવતા ઉમેદવારોમાં ભારે રોષ જોવા મળી રહ્યો છે. મોટી સંખ્યામાં ઉમેદવારો રસ્તા ઉપર ઉતરી આવ્યા છે. હાઈવે પર સૂત્રોચ્ચાર અને વિરોધ પ્રદર્શન કરવામાં આવી રહ્યું છે. સમગ્ર ઘટનાની જાણ થતા સ્થાનિક પોલીસ ઘટના સ્થળે દોડી આવી છે. 

બોટાદમાં પરીક્ષાઓમાં આક્રોશ
જૂનિયર ક્લાર્કની પરીક્ષા રદ કરવામાં આવતા રાજ્યભરના પરીક્ષાર્થીઓમાં આક્રોશ જોવા મળી રહ્યો છે. બોટાદ કોળી બોડિગ ખાતે મોટી સંખ્યામાં પરીક્ષાથીઓએ એકઠા થઈ સરકાર વિરોધી સૂત્રોચ્ચાર કર્યા હતા.  અલગ અલગ જિલ્લામાંથી બોટાદ પરીક્ષા આપવા પહોંચેલા ઉમેદવારોએ સરકાર વિરોધી સૂત્રોચાર કરી રોષ વ્યક્ત કર્યો હતો. આ અંગેની જાણ થતાં સ્થાનિક પોલીસની ટીમ દોડી આવી હતી અને ઉમેદવારોને સમજાવવાનો પ્રયાસ કર્યો હતો. 

મહિસાગર જિલ્લામાં હાઈવે પર સૂત્રોચ્ચાર 
આજે યોજાનારી જુનિયર ક્લાર્કની પરીક્ષા મોકૂફ રાખવામાં આવતા મહીસાગરમાં પરીક્ષા આપવા આવેલા ઉમેદવારોએ ચક્કાજામ કર્યો હતો. પરીક્ષાર્થીઓએ લુણાવાડા બસ સ્ટેન્ડ ખાતે બસ રોકી ચક્કાજામ કરી વિરોધ વ્યક્ત કર્યો હતો. આ ઉપરાંત ઉમેદવારોએ હાલોલ-શામળાજી હાઇવે પર ચક્કાજામ કર્યો હતો. પેપર લીક થતા મોટી સંખ્યામાં ઉમેદવારો રસ્તા ઉપર ઉતરી આવ્યા હતા. હાઈવે પર સૂત્રોચ્ચાર અને વિરોધ પ્રદર્શન કર્યું હતું.  આ ઉપરાંત લુણાવાડામાં પરીક્ષાર્થીઓએ કલેક્ટર કચેરી સુધી રેલી કાઢી કલેક્ટર કચેરીની બહાર ધરણાં પર બેઠા છે. તેઓ જવાબદાર સામે કડક કાર્યવાહીની માંગ કરી રહ્યા છે.

ગોધરા બસ સ્ટેન્ડ ખાતે પરીક્ષાર્થીઓનો વિરોધ
પરીક્ષા રદ થતા ગોધરામાં પણ વિરોધ જોવા મળ્યો હતો. જુનિયર ક્લાર્કની પરીક્ષા મોકૂફ થતા પરીક્ષાર્થીઓ પંચમહાલ જિલ્લાના ગોધરા બસ સ્ટેન્ડ ખાતે હોબાળો મચાવ્યો હતો. બસ સ્ટેન્ડ ખાતે મોટી સંખ્યામાં પરીક્ષાર્થીઓ એકઠા થયા હતા. પરીક્ષાર્થીઓએ બસ સ્ટેન્ડના મુખ્ય દરવાજે હોબાળો કરતા ટ્રાફિક જામ થયો હતો. જોકે, પોલીસે પરીક્ષાર્થીઓને સમજાવીને  શાંત કર્યા હતા. 

પાટણમાં પોલીસે ઉમેદવારોને સમજાવ્યા
પરીક્ષા રદ થતાં વિદ્યાર્થીઓની વર્ષોની મહેનત પર છેલ્લી ઘડીએ પાણી ફરી વળ્યું છે. ગોધરા ઉપરાંત પાટણના નવા એસટી બસ સ્ટેશન ખાતે ઉમેદવારોએ હોબાળો હતો. પરીક્ષાર્થીઓ દ્વારા આરોપીઓ સામે કડકમાં કડક પગલાં લેવાની માંગ કરવામાં આવી હતી.  ઘરે પરત જવા માટે પરીક્ષાર્થીઓ દ્વારા ST બસની માગ સાથે હોબાળો મચાવવામાં આવ્યો હતો.  આ અંગેની જાણ થતાં પોલીસની ટીમ ST બસ સ્ટેન્ડ ખાતે દોડી આવી હતી અને મામલો થાલે પાડ્યો હતો. 

ગીતામંદિર બસ સ્ટેન્ડ ખાતે પરીક્ષાર્થીઓ દ્વારા સૂત્રોચ્ચાર
ભાવનગર, જામનગર, સુરેન્દ્રનગર સહિતના જિલ્લાઓમાંથી અમદાવાદ પરીક્ષા આપવા આવેલા પરીક્ષાર્થીઓમાં પણ ભારે આક્રોશ જોવા મળી રહ્યો છે. જુનિયર ક્લાર્કની પરીક્ષા રદ થતા અમદાવાદના ગીતામંદિર બસ સ્ટેન્ડ ખાતે પણ પરીક્ષાર્થીઓએ વિરોધ વ્યક્ત કર્યો છે. બસની ટિકિટનું ભાડું પાછું આપવાની માંગ સાથે પરીક્ષાર્થીઓ દ્વારા સૂત્રોચ્ચાર કરવામાં આવ્યા છે. 

બનાસકાંઠામાં પરીક્ષાર્થીઓ લાલઘુમ 
દૂર-દૂર રહેતા વિદ્યાર્થીઓ કડકડતી ઠંડીમાં ગઈકાલે રાત્રે જ પરીક્ષા કેન્દ્ર પર પહોંચી ગયા હતા. વહેલી સવારે તેમને પરીક્ષા રદ થવાના સમાચાર મળતા જ તેમના સપનાઓ તૂટી ગયા હતા. બનાસકાંઠાના પરીક્ષા કેન્દ્રો પર પરીક્ષા આપવા પરીક્ષાર્થીઓ મોડી રાત્રે જ પહોંચી ગયા હતા. પેપર મોકૂફ રખાતા વિદ્યાર્થીઓમાં ભારે રોષ જોવા મળી રહ્યો છે.  પરીક્ષા કેન્દ્રો પર પરીક્ષાર્થીઓમાં ભારે આક્રોશ જોવા મળી રહ્યો છે. 

તેલંગાણાના પ્રિન્ટિંગ પ્રેસમાંથી જ પેપર લીક થયું હોવાનો ખુલાસો
રાજ્યમાં વધુ એક વખત પેપર લીકની ઘટના બની છે. ગુજરાત પંચાયત પસંદગી મંડળ દ્વારા લેવાનારી જુનિયર ક્લાર્કની પરીક્ષાનું પેપર ફૂટ્યા બાદ પરીક્ષાને મોકૂફ રાખવામાં આવી છે.  જુનિયર ક્લાર્કની પરીક્ષા મોકૂફ રાખવામાં આવતા 9.53 લાખ પરીક્ષાર્થીઓને મોટો ધ્રાસ્કો પડ્યો છે. આ પેપર લીક મામલે ગુજરાત ATSએ તપાસનો ધમધમાટ શરૂ કર્યો છે. જુનિયર ક્લાર્કની પરીક્ષામાં પેપર લીક થવાને લઈને મોટો ખુલાસો, તેલંગાણાના પ્રિન્ટિંગ પ્રેસમાંથી જ પેપર લીક થયું હોવાનો ખુલાસો. સમગ્ર કેસમાં ગુજરાત ATS કરી રહી છે તપાસ, કુલ પાંચ ટીમો ગુજરાત બહાર જવા માટે રવાના. ગુજરાત ATSની ટીમો તેલંગાણા, બિહાર, ઉત્તરપ્રદેશ, મધ્યપ્રદેશ અને દિલ્લી જવા રવાના.

ગુજરાત ATSએ તપાસનો ધમધમાટ શરૂ કર્યો 
ગુજરાત ATSએ વડોદરાથી 12 શંકાસ્પદ લોકોની અટકાયત કરી છે. ગુજરાત ATSની ટીમ દ્વારા તેઓની પૂછપરછ કરવામાં આવી રહી છે. તો સુરતમાં પણ પેપર લીકના નેટવર્કને લઈને તપાસ તેજ કરવામાં આવી છે. જુનિયર ક્લાર્કનું પેપર લીક થવા મામલે વડોદરાથી 12 લોકોની અટકાયત કરવામાં આવી છે. જુનિયર ક્લાર્કના પેપરની ડુપ્લીકેટ નકલ વડોદરાથી વાયરલ કરવામાં આવી હોવાનું કહેવામાં આવી રહ્યું છે. પેપર લીક થવા મામલે ગુજરાત ATSએ વધુ તપાસ હાથ ધરી છે.  વડોદરા ઉપરાંત સુરતમાં પણ ગુજરાત ATS અને સુરત ક્રાઇમ બ્રાન્ચ દ્વારા સંયુક્ત તપાસ હાથ ધરવામાં આવી છે.  સુરતમાં પેપર લીકના નેટવર્કને લઈને તપાસનો ધમધમાટ તેજ કરવામાં આવ્યો છે. ગુજરાત ATS અને સુરત ક્રાઇમ બ્રાન્ચ દ્વારા શંકાસ્પદ લોકોની પૂછપરછ શરૂ કરાઇ છે.

પંચાયત સેવા પસંદગી બોર્ડના સભ્યએ કર્યો આ દાવો
આ મામલે પંચાયત સેવા પસંદગી બોર્ડના સભ્ય રાજીકા કચેરીયાએ દાવો કર્યો છે કે, 'રાજ્ય બહારના તત્વો દ્વારા પેપર લીક કરવામાં આવ્યું છે. વડોદરામાં પેપરના અમુક ભાગો ગુજરાત પંચાયત સેવા પસંદગી બોર્ડને મળી આવ્યા છે. તેના આધારે પેપર રદ કરવાનો નિર્ણય લેવાયો છે. રાજ્ય બહારની ગેંગની સંડોવણી હોવાની પ્રાથમિક વિગતો સામે આવી છે.'