અમેરિકાની ટોચની સંસ્થા સેન્ટર્સ ફોર ડિસિઝ કન્ટ્રોલ એન્ડ પ્રીવેન્શને (CDC) આ વાતની જાહેરાત કરતા જણાવ્યું કે ટેક્સાસના નાગરિક તાજેતરમાં નાઈજેરિયામાંથી પાછો ટેક્સાસ આવ્યો હતો. ત્યાં તે મંકીપોક્સથી સંક્રમિત થયો હોવાની શક્યતા છે. હાલમાં મંકીપોક્સના દર્દીને ડલ્લાસની હોસ્પિટલમાં રખાયો છે અને ત્યાં તેની સારવાર ચાલી રહી છે. સીડીસી સ્ટેટ અને લોકલ હેલ્થ એજન્સી સાથે મળીને તેના સહપ્રવાસીઓની ભાળ મેળવવાનો પ્રયાસ કરી રહી છે. સંક્રમિત દર્દીએ બે વાર પ્રવાસ કર્યો હતો અને તે બે ફ્લાઈટમાં જેટલા પણ પ્રવાસીઓના સંપર્કમાં આવ્યો હતો તેને શોધી કાઢવાનો પ્રયાસ થઈ રહ્યો છે.
ઉલ્લેખનીય છે કે આ પહેલા 2003 માં અમેરિકામાં મંકીપોક્સની બીમારી ફાટી નીકળી હતી તે વખતે 47 લોકો સંક્રમિત થયા હતા. સીડીસીએ કહ્યું કે મંકીપોક્સ શ્વાસ્વોચ્છાસ કે નાકમાંથી પડતા ટીંપા દ્વારા એક વ્યક્તિમાંથી બીજી વ્યક્તિમાં ફેલાઈ શકે છે. પરંતુ ફ્લાઈટના કિસ્સામાં તો આવું થવાની શક્યતા ઘણી ઓછી છે કારણ કે ફ્લાઈટમાં માસ્ક ફરજિયાત છે.
શું છે મંકિપોક્સ
મંકીપોક્સ દુર્લભ પરંતુ ગંભીર વાયરસથી ફેલાતી બીમારી છે જે મોટાભાગે સેન્ટ્રલ અને વેસ્ટ આફ્રિકાના અંતરિયાળ વિસ્તારના લોકોને થાય છે. મંકીપોક્સનો વાયરસ પ્રાણીઓ, સ્તનપાયી પ્રાણીઓ અને કોતરી ખાનારા પ્રાણીઓમાં જોવા મળે છે અને ક્યારેક તે પ્રાણીઓમાં લોકોમાં આવી જાય છે.
મંકિપોક્સના લક્ષણો
મંકિપોક્સના લક્ષણોમાં ફ્લૂ જેવી બીમારી, ગ્રંથીઓમાં સોજો, શરીર અને ચહેરા પર મોટી માત્રામાં ચકામા સામેલ છે. મંકીપોક્સથી પીડિત દર્દીઓમાં બે થી ચાર અઠવાડિયા સુધી આ લક્ષણો જોવા મળે છે. મંકિપોક્સ શીતળા (સ્મોલપોક્સ) રોગના કૂળનો વાયરસ છે પરંતુ શીતળા રોગની તુલનામાં તે હળવું ઈન્ફેક્શન સર્જે છે.