ચોંકાવનારો રિપોર્ટ / સોશિયલ મીડિયા પર ભડકાઉ પોસ્ટોની ભરમાર, FB પર માત્ર મે મહિનામાં શેર કરાઈ 37 લાખ હિંસાત્મક પોસ્ટ 

• ફેસબુકે મે 2022માં કરવામાં આવેલી પોસ્ટ ભડકાવ પોસ્ટનો રિપોર્ટ જાહેર કર્યો 
• ફેસબુકે ભારતમાં 1.75 કરોડથી વધુ વાંધાજનક સામગ્રી પર કરી કાર્યવાહી 
• FB પર  મે મહિનામાં શેર કરાઈ 37 લાખ હિંસાત્મક પોસ્ટ 

સોશિયલ મીડિયા પર ભડકાઉ પોસ્ટોનું બજાર ગરમ છે. આનો પુરાવો ભારતમાં ફેસબુક કન્ટેન્ટ પર કરાયેલી કાર્યવાહી છે. ફેસબુકે ભારતમાં 1.75 કરોડથી વધુ વાંધાજનક સામગ્રી પર કાર્યવાહી કરી છે. આશ્ચર્યની વાત એ છે કે આમાંથી 37 લાખ પોસ્ટ હિંસક છે.

ફેસબુકે મે 2022માં કરવામાં આવેલી પોસ્ટ અંગેરનો રિપોર્ટ જાહેર કર્યો 

જેમાં કહેવામાં આવ્યું છે કે 13 અલગ-અલગ કેટેગરીમાં વાંધાજનક સામગ્રી પર કાર્યવાહી કરવામાં આવી છે. હિંસા, ઉત્પીડન, ગ્રાફિક, જાતીય પ્રવૃતિઓ, નગ્નતા, બાળકોને નુકસાન, તેમને જોખમમાં મૂકવી, ખતરનાક વ્યક્તિઓ અને સંસ્થાઓ અને સ્પામ જેવી પોસ્ટ પર સૌથી કડક કાર્યવાહી કરવામાં આવી છે.આમાં ફેસબુકે હિંસા સંબંધિત 37 લાખ, ઉત્પીડન સંબંધિત 2.94 લાખ, આત્મહત્યા અને ઈજા સાથે સંબંધિત 4.82 લાખ અને આતંક સંબંધિત 1.06 લાખ પોસ્ટ હટાવી છે.

ફેસબુકને કેટલી ફરિયાદો મળી ?

ફેસબુકને 1 થી 31 મે સુધીમાં વાંધાજનક સામગ્રી અંગે 836 ફરિયાદો મળી છે. આ ફરિયાદોને ગંભીરતાથી લેતા ફેસબુકે તેના પર 100 ટકા કાર્યવાહી કરી છે. આ સાથે FB એ એ પણ સ્પષ્ટ કર્યું છે કે તેના પ્લેટફોર્મ પરથી આવી સામગ્રી હટાવવા પાછળનો હેતુ કોઈપણ વ્યક્તિને તમામ પ્રકારના આર્થિક અને સામાજિક નુકસાનથી બચાવવાનો છે. ફેસબુક આ પ્રકારની બાબતને લઈને ખૂબ જ ગંભીર અને સતર્ક છે અને તેના પર તાત્કાલિક પગલાં પણ લઈ રહ્યું છે.

મેટા પ્લેટફોર્મ ઇન્સ્ટાગ્રામ અને ટ્વિટરે પણ કાર્યવાહી કરી છે

ઈન્સ્ટાગ્રામ અને ટ્વિટર પણ ભારતમાં વાંધાજનક પોસ્ટ સામે કાર્યવાહી કરવામાં પાછળ નથી. મેટા પ્લેટફોર્મ ઈન્સ્ટાગ્રામે 12 કેટેગરીમાં લગભગ 41 લાખ કન્ટેન્ટ સામે કડક કાર્યવાહી કરી છે. મેટાએ તેના નિવેદનમાં કહ્યું છે કે તેનો હેતુ તેના પ્લેટફોર્મ પરથી અન્ય હેરાન કરતી સામગ્રીને દૂર કરવાનો છે.બીજી તરફ ટ્વિટરે પણ તેના ભારતના ટ્રાન્સપરન્સી રિપોર્ટમાં જણાવ્યું છે કે 26 એપ્રિલથી 25 મે 2022 સુધીમાં તેને દોઢ હજારથી વધુ ફરિયાદો મળી છે. આ અંતર્ગત, માર્ગદર્શિકાનું પાલન ન કરવા બદલ 46,500 ખાતા સસ્પેન્ડ કરવામાં આવ્યા છે.