દુષ્કર્મ / યુવતી પર ગેંગ રેપમાં અન્ય યુવકો પણ સંડોવાયા હોવાની આશંકા

આ કેસમાં અન્ય બે આરોપીઓની ભૂમિકા તેમજ અન્ય કેટલા લોકો પણ સંડોવાયેલા છે અને પી‌ડ‌િતાને કઇ હોટલમાં લઇ ગયા હતા તેવા અનેક મામલે તપાસ કરવામાં આવશે. પોલીસે આ ઘટનામાં ગઇ કાલે એબીવીપીના કાર્યકર અંકિત પારેખ તેમજ એમએલટી સ્ટુડન્ટ ચિરાગ વાઘેલાની ધરપકડ કરી છે જ્યારે રાજ તોમર અને હાર્દિક શુક્લા વોન્ટેડ છે. 

અમરાઇવાડી વિસ્તારમાં રહેતી અને કોલેજમાં અભ્યાસ કરતી ૨૦ વર્ષીય યુવતીએ તા. ૧૮ માર્ચના રોજ રામોલ પોલીસ સ્ટેશન ખાતે ફરિયાદ નોંધાવી હતી કે ચાર યુવકોએ એટીકેટી સોલ્વ કરવાની લાલચ આપીને તેની સાથે દુષ્કર્મ આચર્યું હતું. યુવતી કોલેજની પરીક્ષામાં નાપાસ થઇ હતી, જેથી અમરાઇવાડી વિસ્તારમાં તેના પાડોશમાં રહેતા હાર્દિક નરેન્દ્રભાઇ શુકલા અને સરખેજમાં રહેતા અંકિત (અનિકેત) પારેખ તથા રામોલના જનતાનગર ખાતે રહેતા ચિરાગ વાઘેલા તેમજ રાજ નામના ચાર યુવકોએ તેને ૨૦૧૮માં એટીકેટીનું ફોર્મ ભરવા તેમજ એટીકેટી સોલ્વ કરાવવાની લાલચ આપી હતી. 

એટીકેટી સોલ્વ કરવાના બહાને એબીવીપીના કાર્યકર એવા ચારેય યુવકોએ યુવતીનું શોષણ કરવાનું શરૂ કરી દીધું હતું અને રામોલના રિગરોડ પર અલગ અલગ ગેસ્ટ હાઉસમાં તેમજ હોટલમાં લઇ જઇ બળાત્કાર ગુજાર્યો હતો. પ્રથમ વખત યુવતીને કેફી પીણું પીવડાવીને બેભાન કર્યા બાદ બળાત્કાર ગુજાર્યો હતો અને ત્યારબાદ જ્યારે યુવતી એટીકેટીનું ફોર્મ ભરવા માટે આવતી હતી ત્યારે યુવકો બળાત્કાર ગુજારતા હતા. વારંવાર યુવકોએ યુવતી સાથે દુષ્કર્મ આચરતાં તેને ગર્ભ રહેતાં આઠ માસ બાદ મૃત બાળકનો જન્મ થયો હતો. 

રામોલ પોલીસે ચાર શખ્સો સામે સામૂહિક બળાત્કારનો ગુનો નોંધી વધુ તપાસ હાથ ધરી હતી. ગર્ભપાત કરાવવા માટે યુવતીએ લીધેલી દવાઓની અસર થતાં તેની ‌કિડની પર અસર પડી હતી, જેના કારણે તેની એલ.જી. હોસ્પિટલમાં સારવાર લઇ રહી હતી. બે દિવસ પહેલાં ‌કિડની ફેલ થઇ જવાના કારણે યુવતીનું સારવાર દરમિયાન મોત થયું હતું, જેમાં પોલીસે બે આરોપીઓની ધરપકડ કરી છે.