ખિતાબ / ઓસ્ટ્રાવા ઓપનઃ ચીનની શુઆઈ ઝાંગ સાથે મળીને સાનિયાએ ડબલ્સનો ખિતાબ જીત્યો

• સાનિયા મિર્ઝાએ વર્ષ (૨૦૨૧ સિઝન)નો પ્રથમ ખિતાબ પોતાના નામે કર્યો
• ઓસ્ટ્રાવા ઓપનની ફાઈનલમાં અમેરિકા અને ન્યૂઝીલેન્ડની જોડીને કરી પરાજીત
• અમેરિકા-ન્યૂઝીલેન્ડની જોડીને ૬-૩, ૬-૨થી હરાવીને જીત મેળવી

સાનિયા અને ઝાંગે ફાઈનલની ટિકિટ કન્ફર્મ કરી

ઉલ્લેખનીય છે કે, શનિવારે 34 વર્ષીય સાનિયા અને ઝાંગે સેમિફાઇનલમાં માકોટો નોનોમિયા અને એરિ હોઝુમીની જાપાની જોડીને સીધા સેટોમાં ૬-૨, ૭-૫થી હરાવીને ફાઇનલની ટિકિટ કન્ફર્મ કરી હતી. ફાઇનલમાં પણ ભારત-ચીનની જોડીએ પોતાનું શાનદાર પ્રદર્શન જારી રાખ્યું હતું અને પ્રથમ સેટ ૬-૩થી પોતાના નામે કર્યા બાદ બીજો સેટ જીતવામાં પણ તેમને કોઈ મુશ્કેલીનો સામનો કરવો પડ્યો નહોતો.

સાનિયા સિઝનમાં બીજી વાર ફાઇનલમાં પહોંચી

સાનિયા સિઝનમાં બીજી વાર ફાઇનલમાં પહોંચી હતી. આ પહેલાં તેણે ગત મહિને અમેરિકામાં ક્રિસ્ટિના મશાલે સાથે મળીને ડબ્લ્યુટીએ-૨૫૦ ક્લિવલેન્ડ ટૂર્નામેન્ટની ફાઇનલમાં એન્ટ્રી મેળવી હતી. જ્યાં આ જોડીને હારનો સામનો કરવો પડ્યો હતો. સાનિયા કરિયરમાં કુલ છ ગ્રાન્ડ સ્લેમ જીતી ચૂકી છે. સાનિયાએ મહિલા ડબલ્સમાં ૨૦૧૬માં ઓસ્ટ્રેલિયન ઓપન, ૨૦૧૫માં વિમ્બલડન અને યુએસ ઓપનનો ખિતાબ જીત્યો હતો. જ્યારે મિક્સ્ડ ડબલ્સમાં સાનિયા ૨૦૦૯માં ઓસ્ટ્રેલિયન ઓપન, ૨૦૧૨માં ફ્રેંચ ઓપન અને ૨૦૧૪માં યુએસ ઓપન જીતી ચૂકી છે.