ગુજરાતમાં સતત વરસી રહેલા ભારે વરસાદના કારણે છોટાઉદેપુરમાં આભ ફાટ્યા જેવી સ્થિતિ સર્જાઇ છે.
ઓરસંગ નદી ઉપર બાંધવામાં આવેલો ચેકડેમ ધરાશાયી
સરકારે 22 કરોડનો ખર્ચ કર્યો પણ પાણીમાં ગયો
ચેકડેમ તૂટતા કરોડો ગેલન પાણી નદીમાં વહી ગયું
છોટાઉદેપુર જિલ્લાના સંખેડા, નસવાડી અને બોડેલીમાં વરસાદે તારાજી સર્જી છે. ત્યારે સતત વરસાદના કારણે ઓરસંગ નદીમાં પૂર આવ્યું છે. ઓરસંગ નદીમાં પૂર આવતા નદી ઉપર બાંધવામાં આવેલો ચેકડેમ ધરાશાયી થયો છે.
ઉનાળામાં જ ચેકડેમનું બાંધકામ થયું હતું
22 કરોડના ખર્ચે તૈયાર કરવામાં આવેલો ચેકડેમ ધરાશાયી થઇ જતા ભારે વિકટ પરિસ્થિતિ સર્જાઇ છે. ચેકડેમ તૂટતા કરોડો ગેલન પાણી નદીમાં વહી ગયું છે. તેમજ બોડેલીના નીચાણવાળા વિસ્તારોમાં પાણી ભરાઇ ગયા છે. જણાવી દઇએ કે, ઉનાળામાં જ ચેકડેમનું બાંધકામ થયું હતું.
આ ઘટનામાં ભ્રષ્ટ્રાચાર કરનાર કોન્ટ્રાક્ટરની વિરૂદ્ધ કાર્યવાહી કરવાની માંગ કરવામાં આવી રહી છે. બેદરકારી દાખવનાર અધિકારીઓ સામે કાર્યવાહીની માંગ કરવામાં આવી છે. સિંચાઇ અને પીવાના પાણી માટે ચેકડેમ બનાવ્યો હતો. કોન્ટ્રાકટર પાસેથી નાણાં વસૂલવાની માંગ કરવામાં આવી રહી છે.
મહત્વનું છે કે, ગુજરાતમાં સતત વરસી રહેલા અનરાધાર વરસાદ વચ્ચે રાજ્યમાં છોટાઉદેપુરના બોડેલીમાં સૌથી વધુ 22 ઇંચ વરસાદ ખાબક્યો છે. ભારે વરસાદથી જિલ્લાની નદીઓમાં પૂર આવતા ઠેર-ઠેર પાણી ભરાઇ ગયા છે.
સંખેડાના ધારાસભ્ય અભેસિંહ તડવીએ અસરગ્રસ્ત વિસ્તારની મુલાકાત પણ લીધી હતી. તેઓએ જણાવ્યું કે, 'આટલો ભારે વરસાદ 50 વર્ષના ઇતિહાસમાં પહેલી વખત વરસ્યો છે. 600 જેટલા લોકોનું રેસ્ક્યુ કરાયું. પંથકમાં 1500 જેટલા મકાનોને નુકસાન થયું છે. નુકસાની અંગે CM સાથે વાતચીત કરી છે. આથી CMએ દરેક સહાય પહોંચાડાશે તેવું જણાવ્યું છે.'
રાજ્યમાં મેઘરાજાએ ધડબદાટી બોલાવી હોવાથી ઠેર ઠેર વરસાદી પાણી ભરાઈ ગયા છે. આ તરફ ભારે વરસાદને કારણે છોટાઉદેપુર જિલ્લાની હાલત દયનીય બની છે. છોટાઉદેપુરના બોડેલી બોડેલીના વર્ધમાનનગરમાં પાણી ભરાઈ જતાં લોકો પોતાની મકાનની સફાઈમાં લાગ્યા છે. જેમાં લોકોના જરૂરી દસ્તાવેજ પણ પાણીમાં તણાયા હોવાનું સામે આવ્યું છે.
છોટાઉદેપુરમાં વરસાદે સર્જી તારાજી
છોટા ઉદેપુર જિલ્લામાં ભારે વરસાદને કારણે નીચાણવાળા વિસ્તારો પાણીમાં ગરકાવ થયા છે. આ તરફ છોટાઉદેપુરમાં ભારે વરસાદને કારણે આવતીકાલથી આગામી આદેશ ન મળે ત્યાં સુધી શાળા-કોલેજો બંધ રાખવાનો નિર્ણય લેવામાં આવ્યો છે. આ તરફ છોટા ઉદેપુરના બોડેલી, નસવાડી, ક્વાંટ અને ડભોઇમાં ભારે વરસાદને કારણે તારાજી સર્જાઇ છે.
જીલ્લામાં ભારે વરસાદની પરિસ્થિતી હોવાથી આવતી કાલથી અત્રેના જીલ્લાની શાળાઓ, કોલેજો, ઓદ્યોગિક તાલીમ સંસ્થાઓ, આંગણવાડીઓ બંઘ રાખવાની રહેશે. વહીવટી તંત્ર તરફથી બીજી સૂચના ન મળે ત્યાં સુઘી સદરહુ આદેશનું પાલન કરવાનું રહેશે.@PMOIndia@CMOGuj@pkumarias@EduMinOfGujarat@BureaucratsInd
— Collector Chhotaudepur (@collectorcu) July 10, 2022
બોડેલીના વર્ધમાનનગરમાં પાણી ભરાયા
બોડેલીના વર્ધમાનનગરમાં પાણી ભરાયા હોવાના દ્રશ્યો સામે આવ્યા છે. વર્ધમાન નગરમાં લોકોના મકાનોમાં પાણી ઘૂસી જતાં લોકો પોતાના મકાનની સફાઇ કામ કરવા લાગ્યા હતા. વિગતો મુજબ લોકોના જરૂરી ડોક્યુમેન્ટ પણ પાણીમાં તણાયા હતા.
છોટાઉદેપુરમાં 20 ઇંચથી વધુ વરસાદ
છોટાઉદેપુરમાં 20 ઇંચથી વધુ વરસાદ આવતા બોડેલીમાં વર્ધમાનનગર,રાજનગરમાં પાણી ફરી વળ્યા છે. આ સાથે દીવાન ફળિયા વિસ્તાર બેટમાં ફેરવાયો તો વર્ધમાનનગરના અનેક મકાનોમાં વરસાદી પાણી ઘુસ્યુ હોવાનું સામે આવ્યું છે. આ સાથે ગોલાગામડી સર્કલ પર હજી પાણી યથાવત છે. જેને લઈ ઘુટણસમા પાણીમાં વાહનચાલકો અવરજવર કરવા મજબૂર બન્યા છે.
બોડેલીથી છોટાઉદેપુરને જોડતા મુખ્ય હાઇવે પર પાણી
છોટાઉદેપુરમાં ભારે વરસાદને કારણે ગોલાગામડીથી સંખેડા, ભાદલપુર સુધી જવાનો માર્ગ પણ પાણીમાં ગરકાવ થઈ જતાં ભારે હાલાકી સર્જાઇ છે. આ સાથે ગ્રામ્ય વિસ્તારમાં કમરસમા પાણી ભરાયા હોવાના દ્રશ્યો પણ સામે આવ્યા છે. ગોલાગામડી સર્કલ પર હજી પાણી યથાવત છે. આ તરફ બોડેલીના રાજાનગર વિસ્તારમાં ઘરમાં પાણી ઘૂસી જતાં લોકોની ઘરવખરી પલળી જતાં પરેશાની ઉભી થઈ હતી.
ડભોઈથી છોટાઉદેપુરના રોડ ઉપર ખેતરો પાણીમાં ગરકાવ
ડભોઈથી છોટાઉદેપુરના રોડ ઉપરના ખેતરમાં પાણી ભરાયુ હોવાનું પણ સામે આવ્યું છે. જેને લઈ કપાસ, મકાઈના ઉભા પાક પર પાણી ફરી વળતાં ખેતરો ધોવાઈ ગયા હતા. આ સાથે નસવાડી અને ક્વાંટ વચ્ચે આવેલુ મોટુ કોતર બે કાંઠે હોવાનું સામે આવ્યું છે. જિલ્લામાં અને ઉપરવાસમાં ભારે વરસાદને કારણે ભાખા ગામ નજીક આવેલા કોતરમાં પણ પૂર જેવી સ્થિતિ જોવા મળી છે.