અમદાવાદ સિવિલ હોસ્પિટલમાં છેલ્લા એક મહીનામાં 6 બ્રેઇન ડેડ યુવક યુવતીઓના અંગોના દાનથી અન્યને નવજીવન અપાયું
સિવિલમાં બ્રેઈન ડેડ યુવકના અંગોનું દાન
ખંભાળીયાના બ્રેઈન ડેડ યુવકના 3 અંગનું દાન
અંગદાનથી 3 લોકોને મળશે નવજીવન
મરતા મરતા પણ મદદ કરતાં જાય એનું નામ ગુજરાતી, અમદાવાદ સિવિલ હોસ્પિટલ ખાતે બ્રેઇન ડેડ યુવક યુવતીઑના અંગોનું અવિરત દાન કરવામાં આવી રહ્યું છે છેલ્લા એક મહીનામાં 6 બ્રેઇન ડેડ વ્યક્તિઓના પરિવાર જનોએ અન્યની જિંદગીમાં સુવાસ ફેલાવવા અંગદાનનો નિર્ણય કર્યો છે. આજે 23 વર્ષીય યુવક અજય સિંહના અંગો 3 લોકોને અપાયા છે.
અકસ્માતમાં ગંભીર ઈજાઑ થતાં અજયસિંહ થયા હતા બ્રેઇન ડેડ
અકાળે અકસ્માતનો ભોગ બનેલા ખંભાળીયાના યુવક અજય સિંહ સિવિલ ખાતે સારવાર લઈ રહ્યા હતા, જ્યાં તેમણે બ્રેઇન ડેડ ઘોષિત કરવામાં આવ્યા હતા. જે બાદ પરિવારને સિવિલ હોસ્પિટલ દ્વારા અંગદાન માટે પ્રેરવામાં આવ્યા હતા. 23 વર્ષીય યુવક અજય સિંહના પરિવારે અંગદાન કરવાનો મહા નિર્ણય લીધો હતો. અને આજે અંગોનું દાન કરી અન્ય 3 લોકોની જિંદગીમાં ઉજાસ કરવાનું કામ કરવામાં આવ્યુ છે.કહેવાય છે કે અંગદાન મહાદાન છે અને એ વાતને સાર્થક કરતાં સિવિલ હોસ્પિટલમાં અંગદાનની 15મી ઘટના હતી. અને છેલ્લા એક મહિનામાં 6 બ્રેઇન ડેડ વ્યક્તિઓએ અંગદાન કરતાં પરિવારજનો સહિત સિવિલ સ્ટાફની મહેનતના પણ વખાણ થઈ રહ્યા છે.
અજય સિંહના અંગો તો જીવિત રહેશે: પરિવાર
પરિવાર કહેવું છે કે અમારે તો જે થવાનું હતું તે થઈ ગયું, અન્યની જિંદગી બચાવવાનો નિર્ણય કરી ઓર્ગન ડોનેટ કર્યા, આ નિર્ણયમાં સંબધીઓને અને ડોકટરોનો ખૂબ સપોર્ટ મળ્યો. આથી અંગ રૂપે અજય સિંહને જીવતો જોવા માટે પરિવારે અન્ય જિંદગી બચાવવાનો નિર્ણય કર્યો હોવાની વાત કરી હતી.
આ પહેલા બ્રેઇન ડેડ મિત્તલ પ્રજાપતિના અંગોનું દાન કરાયું હતું
સિવિલમાં સોટો અંતર્ગતની કાર્ય પધ્ધતિ પ્રમાણે બ્રેઈન ડેડ દર્દીના પરિવારને ઓર્ગન ડોનેટ કરવા સમજણ આપવામાં આવે છે.આમ જ બ્રેઇન ડેડ મિત્તલ પ્રજાપતિના પરિવારે સહમતી આપતા હૃદય, 2 કિડની, લીવર, ફેફસા અને સ્વાદુપિંડનું દાન કરાયું હતું. સિવિલ હોસ્પિટલમાં હ્રદયના ઓર્ગન ડોનેટની આ બીજી ઘટના હતી.સિવિલ હોસ્પિટલથી ગ્રીન કોરિડોર બનાવી હૃદય કલકત્તા ખાતે લઈ જવામાં આવ્યું હતું તે માટે કલકત્તાથી ટીમ આવી હતી. અને 10 મિનિટમાં જ ગ્રીન કોરિડોર બનાવી હૃદયને એરપોર્ટ પહોંચાડવામાં આવ્યું હતું.
કાંકરિયા લેક પાસે ટેમ્પોએ મારી હતી ટક્કર
3 ઓકટોબરના રોજ કાંકરિયા લેક પાસે ભયાવહ અકસ્માત મિત્તલ પ્રજાપતિને નડ્યો હતો. મહિલા કાકરિયા તરફથી આવતી હતી ત્યારે બીજી તરફથી પીધેલી હાલતમાં ડ્રાઈવર પુરપાટ ઝડપે ટેમ્પો હંકારતા ચાર રસ્તા નજીક ટેમ્પો પલટાઈ ગયો હતો જેમાં મિત્તલ પ્રજાપતિ અડફેટે આવી જતાં માથાના ભાગ પર ગંભીર ઈજાઓ થઈ હતી.જે બાદ તેમણે સારવાર અર્થે સિવિલમાં ખસેડવામાં આવ્યા હતા જ્યાં તેમણે 35 વર્ષીય મિત્તલ પ્રજાપતિ બ્રેઈન ડેડ જાહેર કરવામાં આવ્યા હતા. જે બાદ પરિવારે 6 ઓકટોબરના રોજ અંગોનું દાન કર્યું હતું.