વડોદરાની SSG હોસ્પિટલમાં જુનિયર અને ઈન્ટર્ન ડૉક્ટર હડતાળ પર
પડતર માંગણીને લઇને તબીબોની હડતાળ સતત છઠ્ઠા દિવસે પણ યથાવત
હડતાળ કરતા તબીબો પર મેડિકલ કૉલેજના ડીનને કાર્યવાહી કરવા આદેશ
તબીબી શિક્ષણ અને સંશોધન વિભાગના અધિક નિયામકે મેડિકલ કૉલેજના ડીનને વડોદરાની સયાજી હોસ્પિટલમાં 6 દિવસથી હડતાળ પર ઉતરેલા જુનિયર અને ઈન્ટર્ન ડૉક્ટર વિરૂદ્ધ કાર્યવાહી કરવાનો આદેશ કર્યો છે. તેઓએ હડતાળ પર રહેલા તબીબો અને ઈન્ટર્ન ડૉક્ટર સામે કાર્યવાહી કરવાનો આદેશ આપ્યો છે. આ સાથે તમામ હડતાળ કરતા તબીબોને તાત્કાલિક અસરથી હોસ્ટેલ ખાલી કરવાનો આદેશ કર્યો છે.
દર્દીઓ બે કલાક કરતા વધુ સમયથી લાઈનમાં ઉભા રહેવા મજબૂર
મહત્વનું છે કે, વડોદરામાં SSG હોસ્પિટલના જુનિયર તબીબો હડતાળ પર ઉતર્યા છે. ત્યારે SSG હોસ્પિટલના ઓર્થોપેડિક વિભાગમાં દર્દીઓની લાંબી લાઈન લાગી છે. OPDમાં તબીબની અછત હોવાથી દર્દીઓ બે કલાક કરતા વધુ સમયથી લાઈનમાં ઉભા રહ્યાં. ઓર્થોપેડિકની OPDના ત્રણ તબીબ હડતાળ ઉપર છે.
અમદાવાદની સિવિલમાં પણ 1100 જેટલા તબીબો હડતાળ પર
બીજી બાજુ અમદાવાદની સિવિલ હોસ્પિટલમાં પણ હડતાળનો આજે છઠ્ઠો દિવસ છે. જેમાં 1100 જેટલા તબીબો હડતાળ કરી રહ્યાં છે. રેસિડેન્ટ તબીબો હડતાળ પર રહેતા દર્દીઓ હેરાન-પરેશાન થઈ રહ્યાં છે. સરકાર અને તબીબોની લડાઈમાં દર્દીઓ પરેશાન છે. સરકાર માંગણીઓ સ્વીકારવા તૈયાર નથી. આથી, છ દિવસ થયા બાદ પણ આ મામલે કોઈ જ ઉકેલ આવ્યો નથી.
સરકાર માંગણીઓ સ્વીકારવા તૈયાર નથી
અમદાવાદની સિવિલ હોસ્પિટલમાં ડૉક્ટરોની હડતાળને આજે છઠ્ઠો દિવસ થયો છે. આ ડૉક્ટરોમાં વિદેશથી અભ્યાસ કરીને આવેલા ડૉક્ટરો પણ સામેલ છે. રેસિડેન્ટ ડોક્ટરોની હડતાળમાં વિદેશથી આવેલા ડૉક્ટરો પણ સામેલ થયા છે. તદુપરાંત સિવિલમાં ઇન્ટર્નશિપ માટે આવેલા ડૉક્ટરો પણ આંદોલન કરી રહ્યાં છે.
જુનિયર તબીબી સંગઠનના આગેવાનોનું કહેવું છે કે, 'હડતાળને આજે છઠ્ઠો દિવસ છે છતાંય હજુ સુધી રાજ્યના આરોગ્ય વિભાગના અધિકારીઓ તરફથી કોઈ પણ પ્રકારનો સકારાત્મક જવાબ આપવામાં નથી આવ્યો.' બીજી તરફ સિવિલ હોસ્પિટલમાં હડતાળના કારણે ગરીબ-સામાન્ય વર્ગના દર્દીઓને પારાવાર મુશ્કેલીનો સામનો કરવો પડી રહ્યો છે. સતત ઓપરેશન ઉપર કાપ મુકાઈ રહ્યાં છે, જેના કારણે દર્દીઓને કણસવાનો વારો આવ્યો છે. દર્દીના કેટલાંક પરિવારજનો તો નાછૂટકે ખાનગી હોસ્પિટલમાં સારવાર અર્થે દોડી રહ્યાં છે. મહત્વનું છે કે, દર્દીઓના સગાઓની એવી માંગ છે કે, આ હડતાળનો તાત્કાલિક નિવેડો આવવો જોઈએ.