સાબરમતી સેન્ટ્રલ જેલમાં કુખ્યાત વિશાલ ગોસ્વામીના ખંડણીના રેકેટનો પર્દાફાશ થયા બાદ સાબરમતી સેન્ટ્રલ જેલ સત્તાધીશોની આંખો ખૂલી છે અને વિવાદિત જેલની છાપ સુધારવા માટે ઓપરેશન ક્લીન શરૂ કરી દીધું છે.
હાઈ સિક્યોરિટી સાબરમતી જેલમાં પૈસા ખર્ચતાં ઘર અને હોટલ જેવી સુવિધા મળે છે
વિશાલ ગોસ્વામીના ખંડણી રેકેટના પર્દાફાશ બાદ ઓપરેશન ક્લીન શરૂ કરાયું, પણ સિસ્ટમને ફૂલપ્રૂફ ક્યારે બનાવાશે?
કેદીઓ પાસેથી અવારનવાર મોબાઇલ પકડાય છે છતાં જેલના એક પણ કર્મચારી સામે કોઈ કાર્યવાહી નહીં
જેમાં જેલ સત્તાધીશોએ છેલ્લા દસ દિવસમાં દસેક મોબાઇલ ફોન તેમજ પ્રતિબંધિત ચીજવસ્તુ તમાકુને પકડી પાડ્યાં છે. હાઇ સિક્યોરિટી ધરાવતી જેલમાં એક ટાંકણી પણ લઇ જવી મુશ્કેલ છે તેમ છતાંય મોબાઇલ સહિતની પ્રતિબંધિત ચીજવસ્તુઓ ઘૂસી જતાં જેલના કર્મચારીઓ ભષ્ટ્રાચાર આચરી રહ્યા હોવાનું ફલિત થાય છે. પૈસા ખર્ચો તો જેલમાં હોટલ અને ઘર જેવી સુવિધા મળે તેવી સ્થિતિ છે.
સાબરમતી સેન્ટ્રલ જેલમાં આજે બે મોબાઇલ ફોન ચેકિંગ દરમિયાન મળી આવ્યા છે. નવી જેલના યાર્ડ નં ૧ની બેરેક નં ૧ તથા ભગતસિંગ યાર્ડમાંથી બે મોબાઇલ ફોન અને સીમકાર્ડ મળી આવ્યાં છે. વિશાલ ગોસ્વામીના ખંડણીના પર્દાફાશ બાદ જેલ સત્તાધીશોએ શરૂ કરેલા ઓપરેશન ક્લીન પછી વધારે મોબાઇલ ફોન જપ્ત થયા છે. જેમાં એક વાત તો નક્કી છે કે જેલમાં કોઇ પણ ચીજ વસ્તુ આસાનીથી લઇ જઇ શકાય છે. જેલમાં કાચા અને પાકા કામના કેદીઓને ફાઇવસ્ટાર જેવી સુવિધાઓ મેળવવી હોય તો તેની રકમ ચૂકવવામાં આવે છે.
જેલમાંથી છૂટેલા કેટલાક આરોપીઓના જણાવ્યા પ્રમાણે ઘરનું જમવાનું ટિફિન મંગાવવું હોય તો રૂ.૧૫ હજાર મહિને આપવા પડે છે. જેલમાં ફોન રાખવો હોય તો રૂ.૨૫ હજાર મહિને આપવા પડે છે. દારૂ અને નોનવેજ જેલમાં લાવવું હોય તો રૂ.૫ હજાર ચૂકવવા પડે છે. તમાકુના ૨૦૦, ગાંજાની પુડીના ૧૫૦, બીડીનાં ચાર બંડલ ૫૦૦માં વેચાય છે.
કેદીઓને બેરેક બદલવી હોય તો રૂ.૧૦ હજાર ચૂકવવા પડે છે. નાસ્તાના બે થેલા જેલમાં લાવવા હોય તો રૂ.૫ હજાર, જેલમાં ડી.જે પાર્ટી અને ડાન્સ પાર્ટી કરવી હોય તો રૂ. ૧ લાખનો ભાવ છે. ચરસ ગાંજો, અફીણ જેવા નશીલા ઘાતક પદાર્થો એક ગ્રામ પ્રમાણે કેદીની જરૂરિયાત પ્રમાણે પૈસા લેવામાં આવે છે. કેદીના જામીન માટે કોઈ મળવા આવે તો પૈસા લેવાય છે.
જેલમાં પૈસાદાર વીઆઇપી કેદીઓને સુવિધાઓ પૂરી પાડવામાં આવે છે જે કેદી પૈસાદાર અને વગદાર હોય તો તેના માટે જેલ સ્વર્ગ સમાન છે. સાબરમતી જેલમાંથી વર્ષ ૨૦૧૪ થી ૨૦૧૯માં ૨૦૯ મોબાઈલ અને ૯૯થી વધુ સીમકાર્ડ મળ્યાં છે. વર્ષ ૨૦૧૪માં ૧૮ ગુના નોંધાયા હતા. જેમાં ૨૩મોબાઈલ અને ૮ સીમકાર્ડ કબજે કરી ૪૯ આરોપીની ધરપકડ થઈ હતી.
વર્ષ ૨૦૧૫માં ૨૫ ગુનામાં ૩૫ મોબાઈલ અને ૧૧ સીમકાર્ડ ઝડપાયાં હતાં. જેમાં ૬૨ આરોપીની ધરપકડ થઈ હતી. વર્ષ ૨૦૧૬માં ૨૪ ગુના હતા, જેમાં ૩૦ મોબાઈલ અને પાંચ સીમકાર્ડ ઝડપાયાં હતાં. જેમાં ૫૩ આરોપીની ધરપકડ થઈ હતી. વર્ષ ૨૦૧૭માં ૩૭ ગુના નોંધાયા હતા.
જેમાં ૪૩ મોબાઈલ અને ૨૧ સીમકાર્ડ ઝડપાયાં હતાં. જેમાં ૧૦ આરોપીની ધરપકડ થઈ હતી. વર્ષ ૨૦૧૮માં ૩૪ ગુનામાં ૫૦ મોબાઈલ અને ૪૨ સીમકાર્ડ કબજે કરી ૬૫ આરોપીની ધરપકડ થઈ હતી. જ્યારે ૨૦૧૯માં ૨૨ ગુનામાં ૨૭ મોબાઈલ અને ૧૨થી વધુ સીમકાર્ડ પકડાતાં ૩૩ આરોપીથી વધારેની ધરપકડ થઈ હતી.
ઓપરેશન ક્લીન જેલની છાપ સુધારવા માટે શરૂ કરવામાં આવ્યું છે હવે તેનો અમલ કેટલા સમય સુધી થશે તે જોવું છે. સવાલ એ ઊભો થાય છે કે જેલમાં હાઇ સિક્યોરિટી ઝોન હોવા છતાંય બિન્દાસ લોકો પ્રતિબંધીત ચીજવસ્તુઓ લઇ જાય છે, તો તેની પાછળ જવાબદાર કોણ? થોડાક દિવસ પહેલાં કેદીને તમાકુ અને લાઇટર આપતાં જેલ સહાયક વિરુદ્ધમાં ગુનો દાખલ થયો હતો.