ચેતવણી / સૌરાષ્ટ્રના આ વિસ્તારોમાં ઓરેન્જ એલર્ટ જાહેર, ભારે વરસાદની આગાહીના પગલે NDRF-SDRFની ટીમ સ્ટેન્ડબાય

• સૌરાષ્ટ્રમાં ભારે વરસાદની આગાહીને પગલે તંત્ર એલર્ટ
• શનિવાર સુધી સૌરાષ્ટ્રમાં અપાયું છે ઓરેન્જ એલર્ટ
• NDRF, SDRFની ટીમ સ્ટેન્ડબાય રાખવામાં આવી

ગુજરાતમાં સાર્વત્રિક વરસાદની આગાહી વચ્ચે સૌરાષ્ટ્રમાં ભારે વરસાદની આગાહી આપવામાં આવી છે. સૌરાષ્ટ્રમાં ભારે વરસાદની આગાહીના પગલે તંત્ર એલર્ટ થઇ ગયું છે. શનિવાર સુધી સૌરાષ્ટ્રમાં ઓરેન્જ અલર્ટ અપાયું છે.

ગીર-સોમનાથ, પોરબંદર, દ્વારકા સહિતના વિસ્તારોમાં ભારે વરસાદની આગાહી

સૌરાષ્ટ્રમાં ગીર-સોમનાથ, દીવ અને દ્વારકામાં ભારે વરસાદની આગાહી કરવામાં આવી છે. તો પોરબંદર અને રાજકોટમાં પણ અતિભારે વરસાદ વરસે તેવી શક્યતા છે. જેના લીધે NDRF અને SDRFની ટીમ સ્ટેન્ડબાય કરી દેવામાં આવી છે.

સમગ્ર ગુજરાતમાં હળવાથી અતિભારે વરસાદની આગાહી

મહત્વનું છે કે, લો-પ્રેશર અને મોન્સૂન ટ્રફના કારણે સમગ્ર ગુજરાતમાં હળવાથી અતિભારે વરસાદ વરસી શકે છે. જ્યારે અમદાવાદમાં 5થી 10 જુલાઇ દરમિયાન 5થી 8 ઇંચ વરસાદ પડવાની શક્યતા સેવવામાં આવી રહી છે.

5થી 9 જુલાઈના રોજ ભારેથી અતિભારે વરસાદ વરસવાની શક્યતા

હવામાન વિભાગની આગાહી અનુસાર, રાજ્યમાં તારીખ 5થી 7 જુલાઈના રોજ ભારેથી અતિભારે વરસાદ વરસવાની શક્યતા છે. એમાંય તારીખ 8 અને 9 જુલાઇના રોજ અતિભારે વરસાદની હવામાન વિભાગે આગાહી કરી છે. જેમાં દ્વારકા, પોરબંદર, જૂનાગઢ, અમરેલી, ગીર સોમનાથ, ભાવનગરમાં ભારેથી અતિ ભારે વરસાદ થઈ શકે છે.  વલસાડ, દમણ દાદરા નગર હવેલીમાં અતિ ભારે વરસાદની આગાહી કરાઇ છે. એ સિવાય ઉત્તર ગુજરાતમાં બનાસકાંઠા સાબરકાંઠામાં મહીસાગર દાહોદમાં ભારેથી અતિભારે વરસાદ વરસવાની આગાહી કરાઇ છે. જ્યારે અમદાવાદમાં છૂટા છવાયા વરસાદની આગાહી કરવામાં આવી છે.

રાજ્યમાં સૌથી વધુ દ્વારકાના કલ્યાણપુરમાં સવા 6 ઈંચ વરસાદ વરસ્યો

તમને જણાવી દઇએ કે, રાજ્યમાં છેલ્લા 24 કલાકમાં 187 તાલુકામાં વરસાદ ખાબક્યો છે. જેમાં સૌથી વધુ દ્વારકાના કલ્યાણપુરમાં સવા 6 ઈંચ વરસાદ પડ્યો છે. એ સિવાય કડાણામાં 4.5 ઈંચ, દ્વારકામાં સવા 4 ઈંચ વરસાદ, રાણાવાવમાં સવા 4 ઈંચ, ફતેપુરામાં 4 ઈંચ વરસાદ, જૂનાગઢમાં 4 ઈંચ, કુતિયાણામાં 4 ઈંચ વરસાદ, રાજકોટમાં પોણા 4 ઈંચ, મેંદરડામાં 3 ઈંચ વરસાદ, ખંભાળિયામાં 3 ઈંચ, ગઢડામાં 3 ઈંચ વરસાદ, માંડવીમાં પોણા 3 ઈંચ, ધ્રોલમાં પોણા 3 ઈંચ વરસાદ, વંથલીમાં 2.5 ઈંચ, ઉમરગામમાં 2.5 ઈંચ વરસાદ, પોરબંદરમાં 2.5 ઈંચ અને મોરબીમાં 2.5 ઈંચ વરસાદ વરસ્યો છે.