સુરતમાં 12થી 15 જુલાઇ સુધી સુરતમાં અતિભારે વરસાદની આગાહી કરવામાં આવી, આજથી વરસાદની જિલ્લામાં તોફાની બેટિંગ શરૂ
સુરતમાં આજથી બે દિવસ ભારે વરસાદની શકયતા
સુરતમાં રેડ અલર્ટ અપાયું
12 થી 15 જુલાઈએ સુરતમાં રેડ અલર્ટ
ગુજરાતમાં મેઘો 8 જિલ્લામાં મેઘોએ વિનાશ સર્જ્યો છે. ખાસ કરીને દક્ષિણ ગુજરાતમાં અવિરત અતિ ભારે વરસાદથી ગામડાઓ પાણીમાં ગરકાવ થઈ ગયા છે. શહેરો જળમગ્ન બન્યા છે. ત્યારે અમદાવાદ બાદ આજે સુરત શહેર અને જિલ્લામાં સાંબેલાધાર વરસાદની આગાહી કરવામાં આવી છે. આજ સવારથી ઉમરપાડામાં સાંજના 5 વાગ્યા સુધીમાં 15 ઇંચ જેટલો વરસાદ ખાબકી ગયો છે. વરસાદી પાણીના વહેણમાં દુકાનોને વ્યાપક નુકશાન થયું છે. વીજપોલ ધરાશાયી થતા અનેક વિસ્તારમાં વીજળી ગુલ થઈ ગઈ છે.ઉમરપાડા પોલીસ, માર્ગ અને મકાન વિભાગના કર્મીઓ તેમજ રેસ્ક્યૂ ટીમો રાહત બચાવની કામગીરીમાં લાગી ગઈ છે. તાબદા, ભૂતબેડા, ખૈડીપાડા ગામ સંપર્ક વિહોણા બન્યા છે.
સુરતમાં અતિ ભારે વરસાદની હવામાન ખાતાની આગાહી
સુરત જિલ્લામાં 11 અને 12 જુલાઇના રોજ ભારે વરસાદ પડી શકે છે, જેના પગલે ઓરેન્જ અલર્ટ આપવામાં આવ્યું હતું પણ 11 જુલાઇની સાંજે રેડ એલર્ટ જાહેર કરી દેવામાં આવ્યુ છે જેથી હવે 12થી 15 જુલાઇ સુધી સુરતમાં અતિભારે વરસાદની આગાહી કરવામાં આવી છે. અતિભારે વરસાદને લઈને રેડ અલર્ટ આપવામાં આવ્યું છે ત્યારે તંત્ર દ્વારા લોકોને જરૂરી ન હોય તો ઘરમાં જ રહેવા માટે અપીલ કરી છે.
હવામાન ખાતા દ્વારા સુરત જિલ્લામાં તા. 11 થી 12 ભારેથી અતિ ભારે વરસાદ (ઓરેન્જ એલર્ટ) તથા તા. 13 થી 15 ખુબજ ભારે વરસાદ (રેડ એલર્ટ) ની આગાહી કરવામા આવેલ છે. જેથી તમામ નાગરિકો સતર્કતા રાખે તથા બિનજરૂરી પ્રવાસ ટાળે. @CMOGuj@pkumariaspic.twitter.com/AOrXJtgBhJ
તાપી નદી પરનો કોઝ-વે ઓવરફલો
સુરત આસપાસના જિલ્લાઓમાં વધુ વરસાદ પડતાં તાપી નદી પરનો કોઝ-વે ઓવરફલો થયો છે. 6.5 મીટરની ભય સપાટીને પાણી ઓળગી ગયું છે. નદીમાં મોટી માત્રમાં પાણીની આવક થઈ છે. તાપી નદીની આસપાસના વિસ્તારોમાં પણ એલર્ટ જાહેર કરવામાં આવ્યું છે.
એપ્રોચ રોડ ધોવાયો
સુરતના જૂના ઉમરપાડા તરફ જતો બ્રીજ પરનો એપ્રોચ રોડ ધોવાયો વરસાદી પાણીમાં ધોવાઈ ગયો છે.તંત્ર દ્વારા ધોવાયેલ રસ્તાનો કાટમાળ હટાવવાની કામગીરી શરૂ કરવામાં આવી છે. વરસાદની વચ્ચે ગળાડૂબ પાણીમાં વીજકર્મીઓ વીજ-પુરવઠો પૂર્વવત કરવા કામે લાગ્યા છે.
સુરત જિલ્લામાં ભારે વરસાદના કારણે નીચે જણાવેલ રસ્તાઓ પાણી ભરાવાને કારણે બંધ કરેલ હોય તેની સામે દર્શાવેલ વૈકલ્પિક રસ્તા નો ઉપયોગ કરવા વિનંતી છે. @CMOGuj@pkumariaspic.twitter.com/NzzqZ4cuW8
નાણા મંત્રી કનુ દેસાઇ લેશે સુરત અને વલસાડની રૂબરૂ મુલાકાત
રાજ્યમાં આઠ જિલ્લાઓમાં અતિભારે વરસાદથી સરકાર એક્શનમાં આવી ગઈ છે. મંત્રીઓને પ્રભારી જિલ્લાની જવાબદારી સોંપાઈ. જે પગલે કનું દેસાઇ: સુરત અને વલસાડમાં વરસાદી તારાજીની સ્થિતિનો તાગ મેળવવા નીકળી ગયા છે.મંત્રીઓને સ્થાનિક વહીવટી તંત્ર સાથે બેઠક કરી જરુંરી પગલાં તાબડતોબ લેવા સૂચના અપાઈ છે.
ગુજરાતમાં સરેરાશ 41% વરસાદ
રાજ્યમાં વરસાદને લઈને આજે હવામાન વિભાગે નવી આગાહી કરી છે. જે મુજબ આગાહીમાં 3 દિવસનો વધારો કરવામાં આવ્યો છે. આગામી 5 દિવસ વરસાદની સ્થિતિ સાર્વત્રિક રીતે યથાવત રહેશે.દક્ષિણ ગુજરાત, સૌરાષ્ટ્ર, ઉત્તર ગુજરાતમાં અતિ ભારે વરસાદની આગાહી કરવામાં આવી છે. 15 જુલાઈ બાદ વરસાદમાં આંશિક રાહત મળશે તેવા વરતારા પણ થયા છે.આગામી 5 દિવસ માછીમારોને દરિયો ન ખેડવા સૂચના આપી દેવામાં આવી છે. આપને એ પણ જણાવી દઈએ કે ગુજરાતમાં 11 જુલાઇ સુધી સિઝનનો સરેરાશ 41% વરસાદ નોંધાયો છે.