સંસદનું ચોમાસું સત્ર ચાલી રહ્યું છે. સંસદમાં કૃષિને લગતા બે બિલ રાજ્યસભામાં ધ્વનિ મત દ્વારા પસાર કરવામાં આવ્યા છે.
આ બિલ પસાર કરતી વખતે વિપક્ષનો જોરદાર વિરોધ થયો હતો. નારાજ વિપક્ષ હવે રાજ્ય સભાના ઉપાધ્યક્ષ હરિવંશ નારાયણ સિંહ સામે અવિશ્વાસ પ્રસ્તાવ લાવવામાં જઈ રહ્યા છે.
આજે કૃષિને લગતા બે વિવાદાસ્પદ બિલ રાજ્યસભામાં પસાર થયા હતા. ધ્વનિ મત દ્વારા બિલ પસાર થયું. આ દરમિયાન વિપક્ષો દ્વારા ભારે હોબાળો મચાવ્યો હતો. જોકે બિલ ઉપલા ગૃહમાંથી પસાર થઈ ગયું છે. હવે વિપક્ષોએ રાજ્યસભાના ઉપાધ્યક્ષ હરિવંશ નારાયણ સિંહ સામે અવિશ્વાસનો પ્રસ્તાવ દાખલ કર્યો છે.
રૂલ બુક ફાડી નાખી
અગાઉ, TMCના સાંસદ ડેરેક ઓ બ્રાયને ડેપ્યુટી ચેરમેન સમક્ષ રુલ બુક ફાડી નાખી હતી. ડેરેક ઓ બ્રાયન અને બાકીના તૃણમૂલ કોંગ્રેસના સાંસદોએ ચેરમેનની ખુરશી પાસે જઈને રુલ બુક દેખાડીને તેને ફાડી નાખી હતી. TMCના સાંસદ ડેરેક ઓ બ્રાયને સરકાર પર છેતરપિંડીનો આરોપ લગાવ્યો હતો.
તેમણે કહ્યું કે સરકારે સંસદના તમામ નિયમો તોડ્યા છે. તેઓ રાજ્યસભાનું ફીડ કાપી નાખે છે. તેમણે રાજ્યસભા TVને સેન્સર કરી દીધું. હમારી પાસે પુરાવા છે.
વેલમાં પહોંચ્યા સાંસદ
રાજ્યસભાની કાર્યવાહી દરમિયાન વિપક્ષી સાંસદો તરફથી નારેબાજી કરવામાં આવી હતી. કૃષિ મંત્રી નરેન્દ્ર સિંહ તોમરના જવાબથી અસંતુષ્ટ કોંગ્રેસ અને આમ આદમી પાર્ટીના સાંસદ વેલ પાસે પહોંચી ગયા. કોંગ્રેસના સાંસદ ગુલામ નબી આઝાદે કહ્યું કે રાજ્યસભાનો સમય વધારવામાં ન આવે. મંત્રીનો જવાબ કાલે લેવામાં આવે કારણ કે મોટા ભાગના લોકો આ જ ઈચ્છે છે.
માઈક તોડ્યું
રાજ્યસભાનો સમય 1 વાગ્યા સુધીનો હોય છે. જો કે સરકાર આજે જ આ બિલને પાસ કરવા માંગતી હતી. આ દરમિયાન વિપક્ષ હંગામો કરી રહ્યા હતા ત્યારે નરેન્દ્ર સિંહ તોમર જવાબ આપી રહ્યા હતા. આન વચ્ચે સભામાં ચાલી રહેલી ધમાલમાં ચેરમેનની ખુરશીનું માઈક તોડી નાખવામાં આવ્યું હતું.