ગાંધીનગર / આઉટ સોર્સિંગથી સરકારે 15 વર્ષમાં 39000 કરોડનું કૌભાંડ કર્યું, આરોગ્ય વિભાગમાં 100 કરોડનો ગોટાળોઃ ધાનાણી

• આઉટ સોર્સીગથી સરકારે કૌભાંડ કર્યાનો આક્ષેપ
• નેતા વિપક્ષ પરેશ ધાનાણીએ લગાવ્યો આક્ષેપ 
• 39 હજાર કરોડના આઉટ સોર્સિગથી ગોટાળો સ્વીકાર્યો છેઃ ધાનાણી

આઉટ સોર્સિંગ દ્વારા સરકારે કૌભાંડ કર્યું હોવાનો વિપક્ષના નેતા પરેશ ધાનાણીએ આક્ષેપ કર્યો છે. પરેશ ધાનાણીએ કહ્યું કે, વિધાનસભામાં સરકારે 39 હજાર કરોડના આઉટ સોર્સિંગથી થયેલા ગોટાળાનો સ્વીકાર કર્યો છે.

આ ઉપરાંત પરેશ ધાનાણીએ દાવો કર્યો છે કે, સરકાર દ્વારા 15 વર્ષમાં 6 લાખ 93 હજાર યુવાનોનું શોષણ કરવામાં આવ્યું છે. સરકારે મળતિયાઓની ખાનગી આઉટ સોર્સિંગ કંપનીઓ દ્વારા ગોટાળો કર્યો છે. આરોગ્ય વિભાગમાં જૂની નીતિથી સરકારને 100 કરોડથી વધુનું નુકસાન થયું છે.  

ધાનાણીએ કહ્યું કે, એક વર્ષમાં આરોગ્ય વિભાગમાં જ 100 કરોડનો ગોટાળો એટલે કે 15 વર્ષમાં 1500 કરોડનો ગોટાળો ફક્ત આરોગ્ય વિભાગમાં જ થયો છે. જ્યારે 26 વિભાગોમાં વર્ષે 26 સો કરોડ રૂપિયાનું કૌભાંડ થયું છે.