ડાંગઃ કહેવાય છે કે મજબૂત મનના માનવીને હિમાલય પણ નડતો નથી. આ વાત આપણા ગુજરાતના એ દિવ્યાંગ ખેલાડીને પણ લાગુ પડે છે. જેણે શારીરિક અને પારિવારીક અનેક મુસીબતો વચ્ચે પોતાના વતન અને દેશનું નામ રોશન કર્યું છે. કહેવાય છે કે ઈશ્વર એક રસ્તો બંધ કરે તો અનેક રસ્તા ખોલી આપે છે. ઠીક આવી જ રીતે નીરવ દાકે સાથે પણ બન્યું છે. તેની પાસે આ દુનિયા જઈ શકવા આંખો નથી. પરંતુ તેને કુદરતે એવું ટેલેન્ટ આપ્યું છે કે તેના તરફ આખી દુનિયાનું ધ્યાન ગયુ છે.
કોણ છે આ નીરવ ડાકે અને અનેક મુસીબતો ઓળંગીને કઈ રીતે તેણે કર્યું દેશનું નામ રોશન?
નીરવ ડાકે જેની પાસે આંખોનું રતન નથી. પરંતુ તે રમતક્ષેત્રે પોતાની જાતને અર્પણ કરી પોતાના વતન અને દેશનું રતન બની ગયો છે. આ યુવાનનું નામ છે નીરવ ડાકે. વલસાડ જિલ્લાના પારડી તાલુકાના બરાઈ ગામ જ્યાં મોટે ભાગે આદિવાસી પરિવારો વસવાટ કરે છે. આ આદિવાસી પરિવારોમાં હાલ ઉત્સાહનો માહોલ છે.
કેમ કે ડાકે પરિવારના હોનહાર અને દિવ્યાંગ એવા દીકરા નીરવ ડાકેને ભારતની બ્લાઈન્ડ ફૂટબોલ ટીમ તરફથી રમવાની તક મળી છે. અતિશય ગરીબ આદિવાસી પરિવારમાંથી આવતા નીરવ ડાકે હાલ ભારત અને ઓસ્ટ્રેલિયા વચ્ચે રમાઈ રહેલી બ્લાઈન્ડ ફૂટબોલ સ્પર્ધામાં ભારતનું પ્રતિનિધિત્વ કરી રહ્યો છે. કેરાલા ખાતે રમાઈ રહેલી બે દેશો વચ્ચેની ત્રણ મેચોની સિરિઝમાં ગુજરાતનો એકમાત્ર દિવ્યાંગ ખેલાડી છે. નીરવને આ તક મળતાં પરિવારમાં ઉત્સાહનો ભારે માહોલ છે.
નીરવ ડાકે પણ ફૂટબોલ ટીમમાં પોતાને ભારતીય ટીમ વતી રમવાની તક મળતા અત્યંત ખુશી અનુભવી રહ્યો છે. તેની ખુશી તે છૂપાવી શકતો નથી. પોતાને તિરંગાવાળી ટીશર્ટ પહેરવા મળી તેને ધન્યક્ષણ ગણતાં તે રોમાંચિત થઈ ઊઠ્યો છે. તે પોતાનો આનંદ વ્યક્ત કરતા રોકાઈ શકતો નથી.
આજ દિન સુધી ખેલાડીઓને ઈનામનો એકપણ રૂપિયો મળ્યો નથી
રાજ્ય અને દેશનું નામ રોશન કરનારા નીરવ ડાકેના ઘરની આર્થિક પરિસ્થિતિ ઘણી નાજુક છે. નીરવના પિતાનું થોડા વર્ષો પહેલાં અવસાન થયું છે. માતાએ મજૂરી કરીને દીકરાને ભણાવ્યો છે. નીરવને આટલી મોટી તક મળતાં પરિવાર માં ખુશીનો માહોલ છે. નવાઈની વાત એ છે કે નીરવ ભારતીય બ્લાઇન્ડ ક્રિકેટ ટીમ તરફથી પણ દેશનું પ્રતિનિધિત્વ કરી ચૂક્યો છે. તેણે ક્રિકેટ અને ફૂટબોટ સ્પર્ધામાં અનેક મેડલો પણ મેળવ્યા છે.
પરંતુ કમનસીબે એ વાતની છે કે આ દેશની બ્લાઇન્ડ ક્રિકેટ ટીમનો હિસ્સો બનેલા દિવ્યાંગ નીરવનો પરિવાર અતિશય ગરીબીમાં જીવન ગુજારી રહ્યો છે. અગાઉ જ્યારે ભારતની બ્લાઈન્ડ ક્રિકેટ ટીમે વિશ્વકપ જીતીને દેશનું નામ રોશન કર્યું હતું. ત્યારે જે તે રાજ્યો દ્વારા ભારતીય દિવ્યાંગ ક્રિકેટ ટીમના ખેલાડીઓને રોકડ પુરસ્કાર અને સરકારી નોકરી આપવાની જાહેરાત કરવામાં આવી હતી. ગુજરાતના ખેલાડીઓને પણ ગુજરાત સરકાર દ્વારા રોકડ ઇનામની જાહેરાત તો કરી હતી. પરંતુ આજ દિન સુધી આ ખેલાડીઓને ઈનામનો એકપણ રૂપિયો મળ્યો નથી.
ક્રિકેટની સાથે ફૂટબોલની રમતમાં પણ દેશનું પ્રતિનિધિત્વ કરનાર નીરવનો પરિવાર આર્થિક સંકડામણનો સામનો કરી રહ્યો છે. પરિવાર પાસે હાલ કેરેલા ખાતે ચાલી રહેલી આંતરરાષ્ટ્રીય ટુર્નામેન્ટમાં જવા માટે પૈસા ન હતા. ત્યારે વલસાડનાં બ્લાઈન્ડ ક્રિકેટ એસોસિએશન દ્વારા નીરવને નાણાકીય મદદ કરાઈ હતી. જેની મદદથી નીરવ ભારત-ઓસ્ટ્રેલિયાની ફૂટબોલ મેચનો હિસ્સો બનવા કેરેલા જઈ શક્યો છે. આર્થિક મુશ્કેલીનો સામનો કરી રહેલા એક હોનહાર ખેલાડીની માતા અને તેના પરિવારજનોને એ વાતનો ડર છે કે ક્યાંક આ નાણાંકીય તંગી તેમના દીકરાની ખિલતી ટેલેન્ટને ક્યાંક મુરજાવી ન દે... ત્યારે પરિવાર સરકાર પાસે આર્થિક મદદની આશા રાખી રહ્યો છે.
ખેલે ગુજરાત અંતર્ગત ગુજરાત સરકાર રમતગમત ક્ષેત્રે ખેલાડીઓને પ્રોત્સાહન આપવા લાખો રૂપિયા ખર્ચ કરી રહી છે. ત્યારે આદિવાસી વિસ્તારમાં વસતા ગરીબ ખેલાડીઓને આર્થિક સહાય કરે અને આવા ખેલાડીઓ પ્રત્યે સભાનતા કેળવે તે ખૂબ જરૂરી છે. પોતાના દમ પર એશિયન ઉત્સવમાં ગોલ્ડ મેડલ જીતનાર સરિતા સાથે ફોટો પડાવનારા ભાજપના મંત્રીઓ અને વિવિધ સંસ્થાઓ આવા નીરવ જેવા આદિવાસી ખેલાડીઓ તરફ પણ ધ્યાન આપે તે ખૂબ જરૂરી બન્યું છે.