સેમસંગ અને હુઆવેએ ફોલ્ડેબલ ફોન લોન્ચ કર્યા છે પરંતુ હજુ સુધી કેટલીક ટેકનિકલ ખામીઓના કારણે વેચાણમાં મુક્યા નથી. બીજી બાજુ સોની કંપની રોલેબલ એટલે કે વીંટી શકાય તેવા ડિસ્પલે ડેવલપ કરી રહ્યું છે. ત્યારે હવે ફોલ્ડેબલ સ્માર્ટ વોચ પણ ટુંક સમયમાં આવી રહી છે. ભારતમાં લોકપ્રિય ઓપ્પોએ ફોલ્ડેબલ સ્માર્ટવોચની પેટન્ટ વર્લ્ડ ઇન્ટેલેક્ચયુઅલ પ્રોપર્ટી ઓફિસ સમક્ષ ફાઇલ કરી છે.
ઓપ્પો, વીવો અને વનપ્લસ ચાઇનીઝ કંપની બીબીકેની સબસિડરી કંપનીઓ છે. પેટન્ટને વેરેબલ ઇલેકટ્રોનિક ડિવાઇસ નામ આપવામાં આવ્યું છે. જેમાં ફલેકસિબલ સ્ક્રીન સાથેની સ્માર્ટવોચનો પણ સ્પષ્ટ ઉલ્લેખ છે. ઓપ્પોએ તેનો સ્કેચ પણ રજુ કર્યો છે તે મુજબ સ્માર્ટવોચની ડિસ્પ્લે ચોરસ આકારની છે. ફોલ્ડેબલ સ્માર્ટવોચનો ફાયદો એ છે કે તેમાં મોટી સ્ક્રીન ફીટ કરી શકાય છે. જે કાંડા પર ફોલ્ડ થઇને સેટ થઇ જાય છે. તેને ડાબા કે જમણા હાથ પર પહેરી શકાય તે રીતે તેની ડિઝાઇન તૈયાર કરાશે.
સ્માર્ટવોચમાં ફોલ્ડેબલ અને અનફોલ્ડેબલ મોડ હશે. અનફોલ્ડેબલ મોડમાં સ્ક્રીન એરિયા 200 ટકા વધુ મળશે. મોડ ચેન્જ કરો તે પ્રમાણે તેના યુઝર ઇન્ટરફેસમાં પણ ફેરફાર થશે. ફોલ્ડેબલ મોડમાં સ્ક્રીનનો વધારાનો એરિયા વોચ કેસમાં જતો રહેશે. સ્લાઇડિંગ ટેકનિકથી ફોલ્ડ અને અનફોલ્ડની પ્રોસેસ ફુલી ઓટોમેટિક થશે. જોકે ઓપ્પો તેનું પ્રોડકશન કયારે કરશે તે હજુ નક્કી નથી.
એક વાત નક્કી છે કે આગામી એક-બે વર્ષમાં ફોલ્ડેબલ ડિસ્પ્લે સાથેના ડિવાઇસનો જમાનો આવશે, એપલ સહિત અનેક ટોચની કંપનીઓ ફોલ્ડેબલ ડિસ્પ્લે સાથેના ડિવાઇસ પર કામ કરી રહી છે. લેપટોપ અને ટેબલેટ પણ ફોલ્ડેબલ ડિવાઇસ સાથે આવે તે દિવસો પણ દુર નથી.