દેશના 5 રાજ્યોમાં ચૂંટણી થવા જઈ રહી છે ત્યારે ઓપિનિયન પોલના સર્વે સામે આવી ગયા છે.
બંગાળમાં મમતા ફરી મારી શકે બાજી
અસમમાં સત્તામાં વાપસી કરી શકે NDA!
કેરળમાં પણ ભાજપને માત્ર નિરાશા
પશ્ચિમ, બંગાળ, તમિલનાડુ. અસમ, કેરળ અને પૂડુચેરીમાં વિધાનસભાની ચૂંટણી થવા જઈ રહી છે અને અલગ અલગ રાજ્યોમાં રાજકીય પાર્ટીઓ પોતાનું જોર લગાવી રહી છે. ભાજપ દ્વારા દાવો કરવામાં આવી રહ્યો છે કે બંગાળમાં પરિવર્તન આવવાનો છે પણ આ પાંચ રાજ્યોના ઓપિનિયન પોલ સામે આવ્યા છે જેમાં મોદી-શાહ મમતાનો કિલ્લો ભેદી શકે તેમ જણાતું નથી.
મમતા બચાવી લેશે ગઢ!
પાંચ રાજ્યોમાંથી સૌથી વધારે ચર્ચા પશ્ચિમ બંગાળની થઈ રહી છે. પીએમ મોદી અને અમિત શાહ બંગાળમાં મમતાનો કિલ્લો ફતેહ કરવા માટે પ્રયાસ કરી રહ્યા છે ત્યારે એબીપી ન્યૂઝના સર્વેમાં મમતા બેનર્જીની હેટ્રીક થતી દેખાઈ રહી છે. સર્વે અનુસાર 52 ટકા લોકો સીએમના રૂપમાં મમતા બેનર્જીને પહેલી પસંદ માને છે અને રાજ્યમાં ટીએમસીને 150 -166 બેઠકો મળી શકે છે જ્યારે ભાજપનું કમળ 98થી 114 બેઠકો પર ખિલવાની સંભાવના છે. કોંગ્રેસ-લેફ્ટ ગઠબંધન માત્ર 23-31 સીટો પર સમેટાઇ શકે છે.
અસમમાં સત્તામાં વાપસી કરી શકે ભાજપ ગઠબંધન
સી વોટરના સર્વેમાં અસમમાં પણ સત્તા પરિવર્તનના કોઈ અણસાર દેખાતા નથી. રાજ્યમાં ફરીથી NDA જ સરકાર બનાવતી દેખાઈ રહી છે. અસમમાં NDAને 64થી 72 બેઠકો મળી શકે છે જ્યારે UPAને 52થી 60 બેઠકો પર જીત મળવાનું ઓપિનિયન પોલમાં અનુમાન છે.
તમિલનાડુમાં સત્તા પરિવર્તનના એંધાણ
તમિલનાડુમાં આ વખતે પરિવર્તનના એંધાણ છે. સીવોટરના સર્વે અનુસાર પ્રદેશમાં UPAનો વોટ શેર વધશે. 234માંથી કોંગ્રેસ અને DMK ગઠબંધનને 161-169 બેઠકો પર જીત મળી શકે છે જ્યારે સત્તાધારી NDA 53થી 61 પર સમેટાઇ શકે છે. કમલ હાસનની પાર્ટીને આ ચૂંટણીમાં 2થી 6 બેઠકો મળવાના અણસાર છે.
કેરળમાં ભાજપ શૂન્ય પર પણ રહી શકે :
દક્ષિણના રાજ્ય કેરળમાં પીનરાઈ વિજયન ફરી સત્તામાં આવશે તેવું સર્વેમાં સામે આવ્યું છે. ઓપિનિયન પોલ અનુસાર કેરળમાં સત્તાધારી LDFને 77-85 બેઠકો મળી શકે છે જ્યારે UDFને 54-62 બેઠકો પર જીત હાંસલ થવાનું અનુમાન છે. ભાજપ શૂન્યથી 2 બેઠકો પર સમેટાઇ શકે છે.
પૂડુચેરીમાં NDAની સરકાર બની શકે :
પૂડુચેરીથી NDAને સારા સમાચાર મળી શકે છે. રાજ્યમાં NDAના ખાતામાં 16-20 જ્યારે UPAના ખાતામાં 10-14 બેઠકો જાય તેવું ઓપિનિયન પોલમાં સામે આવ્યું છે.