ગુજરાતમાં શ્રાવણ ભાદરવો આવતાની સાથે જ જુગાર રમાડતા અસામાજિક તત્વો સક્રિય થઈ જાય છે. ગરીબ લોકોને પોતાના ખિસ્સા ભરવાની લ્હાયમાં લોકોને જુગાર રમવા પ્રેરે છે તેની સાથે જ પોલીસને પણ પોતાના કરી જુગાર ખુલ્લેઆમ રમાડે છે.
બસ સ્ટેન્ડની જેમ વર્લી મટકા સ્ટેન્ડ
પાટણના રાધનપુરમાં કલ્યાણની ચબરકીથી લોકોનું "કલ્યાણ" થઈ રહ્યું છે. પોલીસ મહેરબાન બની બેઠી છે, RTI એક્ટિવિસ્ટે ખુલ્લે આમ ધમધમતો જુગાર કેમેરામાં કેદ કર્યો છે તમે પણ જુઓ કે પાટણમાં કેવી રીતે બસ સ્ટેન્ડની જેમ વર્લી મટકા સ્ટેન્ડ ખૂલવામાં આવ્યું છે. જ્યાં ખુલ્લેઆમ પૈસાથી ટિકિટ વેચાઈ રહી છે..
RTI એક્ટિવિસ્ટે સોશિયલ મીડિયામાં વીડિયો વાયરલ કર્યો
પાટણના રાધનપુરમાં અસામાજિક તત્વો બેફામ બન્યા છે. રાધનપુર શહેરમાં જાહેરમાં ચાલતું વર્લી મટકાનું સ્ટેન્ડ મોબાઈલ કેમેરામાં કેદ થયું છે. રાધનપુર નગરપાલિકાની આસપાસ જાહેરમાં જુગાર રમાઈ રહી છે. રાધનપુર તંત્ર પાંગળું બની ગયું હોય જુગારીઓને છાવરી રહ્યું છે. તો બીજી તરફ પોલીસ પણ મૂક પ્રેક્ષક બની લોકોને જુગાર રમાતા જોઈ રહી છે. વિક્રમ ઠાકોર નામના RTI એક્ટિવિસ્ટે આ રાધનપુર ચાલતા વર્લી મટકાના સ્ટેન્ડનો વીડિયો સોશિયલ મીડિયામાં વાયરલ કર્યો છે. વીડિયો વાયરલ થતાં જ રાધનપુર પોલીસ તંત્ર અને નગરપાલિકા તંત્ર સામે અનેક સવાલો ઉઠી રહ્યા છે. કલ્યાણ નામનો આ શખ્સ ખુલ્લે આમ લોકોનું કલ્યાણ કરી રહ્યો હોય તેમ "આરામ"થી વર્લી મટકી રમાડી રહ્યો છે. ત્યારે સવાલ એ છે કે આ જુગારથી કોના ખિસ્સા ભરાય છે?