National Games / નીરજ, રવિ, બજરંગ જેવા ઓલિમ્પિક વિનર્સ આવશે ગુજરાત: અમદાવાદના મોદી સ્ટેડિયમમાં નેશનલ ગેમ્સનો ઉદ્ઘાટન સમારોહ

• નેશનલ ગેમ્સનો ઉદ્ઘાટન સમારોહ
• નીરજ ચોપરા સહિતના ખેલાડીઓ આવશે ગુજરાત
• નરેન્દ્ર મોદી સ્ટેડિયમમાં 1.5 લાખ લોકો રહેશે ઉપસ્થિત 

અમદાવાદઃ  કોરોના સહિતના વિવિધ કારણોસર હવે 7 વર્ષના અંતરાલ પછી નેશનલ ગેમ્સનું આયોજન ગુજરાતમાં થવા જઈ રહ્યું છે. આગામી 27મી સપ્ટેમ્બરે અમદાવાદના નરેન્દ્ર મોદી સ્ટેડિયમ (Narendra Modi Stadium)માં નેશનલ ગેમ્સનો ભવ્ય ઉદ્ધાટન સમારોહ યોજાશે. જેમાં ખ્યાતનામ ખેલાડીઓ અને દોઢ લાખ જેટલા રમતપ્રેમીઓ ઉપસ્થિત રહેશે. 

નેશનલ ગેમ્સના ઉદ્ધાટન સમારોહમાં નીરજ ચોપરા, સાક્ષી મલિક સહિતના ઓલિમ્પિક મેડલ વિનર હાજર રહેશે. સાથે રવિ કુમાર દહીયા, બજરંગ પુનિયા અને અદિતી અશોક પણ હાજર રહેશે.  રમતોત્સવનું સમાપન સુરતના ઇન્ડોર સ્ટેડિયમમાં 12 ઓક્ટોબરે કરાશે. 

6 મહાનગરોમાં યોજાશે વિવિધ સ્પર્ધાઓ

ગુજરાતના ગાંધીનગર, અમદાવાદ, વડોદરા, રાજકોટ, સુરત અને ભાવનગરમાં આ રમતોત્સવની વિવિધ સ્પર્ધાઓ યોજાશે. જેમાં દેશના 36 રાજ્યો અને કેન્દ્રશાસિત પ્રદેશોના અંદાજે 8000 કરતા વધારે ખેલાડીઓ વિવિધ રમતોમાં પોતાનું કૌશલ્ય ઝળકાવશે. 

નેશનલ ગેઈમ્સ એક્ઝિક્યુટીવ કમિટીની રચના

મહાનગરોમાં કુલ મળીને 17 જેટલા સ્થળોએ વિવિધ 36 જેટલી રમતોનું આયોજન સારી રીતે પાર પડે તે માટે એક કમિટીની રચના કરવામાં આવી છે.  નેશનલ ગેઈમ્સ એક્ઝિક્યુટીવ કમિટીનું નેતૃત્વ મુખ્ય સચિવ પંકજકુમાર દ્વારા કરવામાં આવશે. આ ઉપરાંત એક સચિવ કક્ષાના અધિકારીઓને 6 મહાનગરોમાં સિટી કમિટીની જવાબદારી સોંપવામાં આવી છે.

સ્કૂલ અને કોલેજમાં 12 સપ્ટેમ્બરથી ઉજવાશે રમોતોત્સવ

નેશનલ ગેઈમ્સ પહેલા સ્કૂલ અને કોલેજમાં 12 સપ્ટેમ્બરથી રમોતોત્સવ ઉજવાશે. 12 થી 16 સપ્ટેમ્બર સુધી 33 જિલ્લાની સ્કૂલ અને કોલેજમાં રમોતોત્સવ ઉજવાશે. તેમજ  22થી 29 સપ્ટેમ્બર દરમ્યાન મેસ્કોટ રેલી યોજવામાં આવશે.