આજના આધુનિક યુગમાં લોકોની સુખાકારી વચ્ચે ઈન્ટરનેટના જેટલા ફાયદા છે તેટલા જ ગેરફાયદા પણ જોવા મળી રહ્યા છે. છેલ્લા થોડા સમયથી ઈન્ટરનેટ અને સોશિયલ મીડિયાના માધ્યમથી ભેજાંબાજો નીતનવી તરકીબો અજમાવી લોકો સાથે છેતરપિંડી આચરી રહ્યા હોવાના કિસ્સાઓ સામે આવી રહ્યા છે.
શહેરમાં દર મહિને ૯૦૦ કરતાં વધુ લોકો ઇ-વોલેટ તેમજ ડિજિટલ પેમેન્ટ મારફતે પોતાના રૂપિયા ગુમાવીને સાયબર ક્રાઇમનો ભોગ બની રહ્યા છે. ઇ-વોલેટ તેમજ ડિજિટલ પેમેન્ટની અધૂરી જાણકારી તેમજ જાગૃતિના અભાવે લોકોને પોતાની મહેનતની કમાણી ગુમાવવાનો વારો આવે છે.
રામોલ વિસ્તારમાં આવેલ શ્રીનંદ ફ્લેટમાં રહેતા અને રેલવેમાં સિનિયર ક્લાર્ક તરીકે ફરજ બજાવતા ભાવિનભાઇ ચૌહાણ અને તેમનાં પત્ની તરલિકા ચૌહાણનાં બેન્કનાં ખાતાંમાંથી ગૂગલ પે મારફતે રૂપિયાનું ટ્રાન્જેક્શન થઇ જતાં તેમણે સાયબર ક્રાઇમમાં ફરિયાદ કરી છે. ફરિયાદમાં કરેલા આક્ષેપ પ્રમાણે તરલિકાએ તેમની દુકાનનું ચાર હજાર લાઇટ બિલ ૧૨ જૂનના રોજ ગૂગલ પે મારફતે ભર્યું હતું.
સર્વર ડાઉન હોવાથી તરલિકાએ ત્રણ વખત ટ્રાન્જેક્શન ગૂગલ પે મારફતે કર્યું હતું. આઠ હજાર રૂપિયા ગૂગલ પેમાં વધુ જતા રહ્યા હતા. થોડાક સમય પછી ચાર હજાર રૂપિયા રિફંડ થઇ ગયા હતા પરંતુ બીજા ચાર હજાર રૂપિયા રિફંડ નહીં થતાં ભાવિનભાઇએ ગૂગલ પરથી ગૂગલ પેનો કસ્ટમર કેર નંબર શોધ્યો હતો.
ભાવિનભાઇને ગૂગલ પરથી બે કસ્ટમર કેર નંબર મળ્યા હતા. જેમાં તેમણે કોલ કર્યો હતો. જોકે તે વખતે કસ્ટમર કેર પર કોઇએ ફોન ઉપાડ્યો નહીં. ગઇ કાલે બપોરે ગૂગલ પેના કસ્ટમર કેરમાંથી ફોન આવ્યો હતો જેમાં ભાવિનભાઇએ તરલિકાના રિફંડ માટેની વાત કરી હતી. ફોન કરનારે ભાવિનભાઇને કહ્યું હતું કે તમારાં પત્નીના રિફંડના રૂપિયા તમારા એકાઉન્ટમાં ટ્રાન્સફર કરી દઇશું. ફોન કરનારે ગૂગલ પેની એપ્લિકેશન ઓપન કરાવીને ભાવિનભાઇને કેટલીક લિંક પર ક્લિક કરવાનું કહ્યું હતું.
ભાવિનભાઇને શંકા જતાં તેમણે ફોન કાપી નાખ્યો હતો અને તેમણે ભીમ એપથી ચેક કર્યું હતું. જેમાં તેમને જાણવા મળ્યું હતું કે ગૂગલ પેના નામે કોલ કરનાર વ્યકતિએ SBI બેન્કમાંથી ૨૮ હજાર રૂપિયાનું ટ્રાન્જેકશન કર્યું છે. બીજી તરફ તરલિકાના મોબાઇલ ઉપર પણ ગૂગલ પે ના નામે ગઠિયાએ ફોન કર્યો હતો અને ભાવિનભાઇ પાસે જે રીતે પ્રોસેસ કરાવી તેવી પ્રોસેસ તેની પાસે કરાવી હતી. ગઠિયાએ બન્ને જણાંને કોન્ફરન્સમાં વાત કરાવી હતી. તરલિકાને ગઠિયાએ ગૂગલ પે મારફતે ૨૨ હજાર રૂપિયા ટ્રાન્સફર કર્યા હતા.
ગૂગલ પેમાં રિફંડ આપવાના બહાને ગઠિયાઓએ ગઇ કાલે ૨૦ કરતાં વધુ લોકો સાથે છેતરપિંડી આચરી છે. સાયબર ક્રાઇમના ડીસીપી રાજદીપસિંહ ઝાલાએ જણાવ્યું છે કે ગઠિયાઓ લોકોને ફોન કરે છે અને ગૂગલ પે ધરાવો છો મારે તમને ગૂગલ પેથી પેમેન્ટ કરવું છે. ગઠિયો લોકોને ગૂગલ પેની એપ ડાઉનલોડ કરાવે અને તેને બેન્ક સાથે લિંક અપ કરવાનું પણ શીખવાડે છે.
ગૂગલ- પે બેન્ક એકાઉન્ટ સાથે લિંક અપ થઇ ગયા બાદ હું તમને પાંચ હજાર રૂપિયા ટ્રાન્સફર કરું છું. જેમાં એક ઓટીપી આવશે. તે મને આપો તેમ કહીને ગઠિયો ભોગ બનનાર પાસે રૂપિયા પડાવી લે છે. આ સિવાયે પેટીએમ, ઉબેર પે, જેવી અનેજ ડિજિટલ પેમેન્ટની એપ દ્વારા ચીટિંગ થાય છે.
સાયબર ક્રાઇમમાં ડિજિટલ પેમેન્ટ અને ઇ વોલેટની ચીટિંગની દર મહિને ૬૦૦ કરતાં વધુ અરજીઓ આવે છે. આ સિવાય OLX પર આર્મીના જવાનના નામે ચીટિંગ કરનાર ગેંગ પણ સક્રિય થઇ છે. સાયબર ક્રાઇમમાં દર મહિને ૩૦૦ કરતાં વધુ અરજીઓ ઓએલએક્સ પર ભોગ બનેલા લોકોની આવે છે. ગઇ કાલે દસ કરતાં વધુ અરજી સાયબર ક્રાઇમમાં આવી છે.