શુભારંભ / AMTS બસો બની આધુનિક: શરૂ થઈ એવી સુવિધા કે હવે છૂટા પૈસાની મગજમારી બંધ

• AMCએ AMTSની બસ સુવિધઆમાં કર્યો વધારો
• હવે પે-ટીએમથી મેળવી શકાશે ટિકિટ
• છુટ્ટા પૈસાની નહી રહે માથાકૂટ

AMCએ AMTSની બસ સુવિધામાં વધારો કર્યો છે. હવે કેશ નહી પરંતુ પે ટીમના માધ્યમથી પણ ઓનલાઇન ટિકિટ ખરીદી શકાશે. ટીએમથી ટિકિટ ખરીદનારા પ્રવાસીઓ બસમાં પ્રથમ સવારી નિઃશુલ્ક કરી શકશે. તો સાથે ડિજિટલ અમદાવાદનું ડિજીટલ પરિવહન સાથે  100 નવી CNG બસનું લોકાર્પણ કરવામાં આવ્યું.

 100 નવી CNG બસનું લોકાર્પણ 

તંત્ર દ્વારા વાસણા ડેપોમાં આંતરિક રસ્તો તેમજ ફૂટપાથ વગેરે નવેસરથી તૈયાર કરીને તેને અપ-ડુ-ડેટ કરાયો છે. અત્યાર સુધી પેસેન્જર્સને ડેપો બહારથી બસ પકડવી પડતી હતી, જેમાંથી રાહત મળશે.  શહેરના મેયર કિરીટ પરમારના હસ્તે એએમટીએસમાં મુકાયેલી ૧૦ સીએનજી બસને લીલી ઝંડી અપાઈ હતી. વાસણા ડેપો ખાતે મેયરે કેશલેસ, કોન્ટેક્ટલેસ પેટીએમ ડિજિટલ માધ્યમનો પણ પ્રારંભ કર્યો હતો.

AMTSમાં ડિજિટલ પેમેન્ટ સિસ્ટમ

એક સમયે લાલ બસ તરીકેની દેશભરમાં પ્રતિષ્ઠા મેળવનાર એએમટીએસના જૂના ગૌરવશાળી દિવસો પાછા આવશે કે કેમ એ તો ચર્ચાનો વિષય છે, કેમ કે આજની સ્થિતિએ એએમટીએસ પર અબજો રૂપિયાનું દેવું છે અને તે માત્ર અને માત્ર મ્યુનિ. તંત્રની કાખઘોડીથી ચાલી રહી છે. અગાઉ વિજય માલ્યા તો તેમનાં જંગી દેવાંનાં કારણે દેશભરમાં વિવાદાસ્પદ બન્યા હતા, પરંતુ એએમટીએસ પણ જંગી દેવાનાં મામલે વિજય માલ્યાની સ્પર્ધામાં ઊતરે તેમ છે. તેમ છતાં શાસકો તેને ફરી લોકપ્રિય બનાવવાના પ્રયાસો કરી રહ્યા છે. એએમટીએસના પેસેન્જર્સ માટે ડિજિટલ પેમેન્ટ સિસ્ટમ આજથી લાગુ કરાઈ છે, જે અંતર્ગત પેસેન્જર તેમના મોબાઇલ ફોનની પેટીએમ એપથી જે તે રૂટની ટિકિટ બુક કરીને તેનું ઓનલાઇન પેમેન્ટ ચૂકવી શકશે. આનાથી પેસેન્જરને ટિકિટ મેળવવાની કડાકૂટમાંથી ખાસ્સી એવી રાહત મળશે.

છુટ્ટા પૈસાની નહી રહે રામાયણ 

પેટીએમ દ્વારા ટિકિટ મેળવવાની ડિજિટલ સિસ્ટમ આની પહેલાં બીઆરટીએસમાં અમલમાં મુકાઈ છે. હવે આજથી આ ડિજિટલ પેમેન્ટ સિસ્ટમનો લાભ એએમટીએસના પેસેન્જર્સને અપાશે. પેટીએમથી ટિકિટ મેળવનાર પેસેન્જરે તેની ટિકિટ બસમાં કંડક્ટરને તેમજ ચેકિંગ દરમિયાન ફ્લાઇંગ સ્ક્વોડની ટીમને બતાવવાની રહેશે. ડિજિટલ પેમેન્ટ સિસ્ટમ હેઠળ પેટીએમ પાસે રાતના ૧૨.૦૦ વાગ્યા સુધી તમામ પેસેન્જર્સની ટિકિટ ખરીદાયાની રકમ જમા રહેશે. પેટીએમ રાતના ૧૨.૦૦ વાગ્યે ભાડાની તમામ રકમને તંત્રની તિજોરીમાં જમા કરાવશે એટલે દરરોજ ભાડાની રકમના લાખો રૂપિયા પેટીએમને વગર વ્યાજે વાપરવા મળવાના હોઈ આ બાબત ભારે વિવાદાસ્પદ બની છે.

AMTS બસમાં મુસાફરી કરતાં શહેરના આશરે 3 લાખ મુસાફરો માટે હવે AMTS બસમાં પણ Paytm સુવિધા. Paytm ટિકીટિંગ પર પ્રથમ સવારી ની:શુલ્ક. ડિજીટલ અમદાવાદનું ડિજીટલ પરિવહન સાથે જ કરવામાં આવ્યું 100 નવી CNG બસનું લોકાર્પણ. pic.twitter.com/Jbi0SXKJBL

— Amdavad Municipal Corporation (@AmdavadAMC) March 29, 2022

પ્રથમ મુસાફરી નિઃશુલ્ક

જોકે પેટીએમથી પહેલી વખત ટિકિટ બુક કરાવનાર પેસેન્જરને આ કંપની દ્વારા સો ટકા કેશબેકનો લાભ અપાશે.અલબત્ત પેટીએમ કંપની તો એએમટીએસ તંત્રને પૂરેપૂરી રકમ ચૂકવશે. દરમિયાન આ અંગે એએમટીએસના ચેરમેન વલ્લભ પટેલને પૂછતા તેઓ કહે છે- પેસેન્જર્સ ક્યૂઆર કોડ સ્કેન કરીને અન્ય એપ પરથી પણ ટિકિટ લઈ શકશે, પરંતુ તેની રકમ પેટીએમમાં જમા થશે. 

કોરોના બાદ પેસેન્જર્સ વધ્યા 

ગત ફેબ્રુઆરી મહિનામાં એએમટીએસ તંત્ર દ્વારા રોજની ૫૬૬ બસ રોડ પર ફરતી મુકાઈ હતી. એએમટીએસમાં દરરોજ આશરે ૨,૫૩,૧૮૪ પેસેન્જર્સ નોંધાયા હતા, જેનાથી તંત્રને દૈનિક રૂ. ૧૫,૦૮,૭૨૨ની આવક થઈ હતી. કોરોનાનો ખોફ જવાથી એએમટીએસમાં પેસેન્જર્સ વધ્યા હતા. દરરોજ ૪૪૭ પેસેન્જરે બસદીઠ મુસાફરી કરતા તંત્રને બસદીઠ આશરે રૂ. ૨૬૬૬નો વકરો થયો હતો.     

એએમટીસના વધશે ભાડા ? 

એએમટીએસનાં ભાડાં લાંબા સમયથી યથાવત જળવાઈ રહ્યાં છે, પરંતુ પેટ્રોલ, ડીઝલ અને સીએનજી ગેસના ભાવવધારાને જોતાં અન્ય ક્ષેત્રોની જેમ જાહેર પરિવહન સેવા પણ મોંઘી થાય તેવાં એંધાણ છે. આગામી તા. ૧ એપ્રિલથી શરૂ થતાં નવા નાણાકીય વર્ષથી એએમટીએસનાં ભાડાંમાં રૂ. એકથી ચારનો વધારો થાય તેમ ચર્ચાઈ રહ્યું છે. જોકે શાસકોએ તો એએમટીએસના બજેટ દરમિયાન એક પણ રૂપિયાનો વધારો નહીં થાય તેવું લોકોને આશ્વાસન આપ્યું હતું. તેને જોતાં આ વધારો ખરેખર અમલમાં આવે છે કે પછી અટકળોનો વિષય બને છે તે બાબત જોવી રસપ્રદ બનશે.