રાજ્ય સરકારે તમામ સરકારી કચેરીઓમાં મોટા ભાગની કામગીરી પેપરલેસ-ઓનલાઇન કર્યા છતાં આરટીઓમાં અરજદારોને ઓફલાઇન લૂંટવા માટેના અનેક કીમિયા RTO કર્મચારીઓ અને એજન્ટની મિલીભગતે શોધી લીધા છે.
250 રૂા. ચૂકવો એટલે ઓનલાઈન ડોક્યુમેન્ટ દેખાય
પેમેન્ટ ઓનલાઈન પણ તોય રિસીપ્ટ બતાવવાની
1 રૂા.ની ઝેરોક્ષ માટે 250 ફરજિયાત આપવાના
લાઇસન્સ રિન્યૂઅલ કે અન્ય કોઇ પણ પ્રકારની કામગીરી માટે ઓનલાઇન પ્રક્રિયા પૂરી થઇ ગયા બાદ અરજદાર જ્યારે કચેરી પર પહોંચે ત્યારે તમારા ડોક્યુમેન્ટ દેખાતા નથી, બહાર જઇ અપલોડ કરાવી લાવો તેવું કહીને રોજના અનેક અરજદારોનાં ખિસ્સાં ખંખેરી લેવામાં આવે છે.
RTO કર્મચારી અને એજન્ટની મિલિભગત
ખુદ RTO કર્મચારી જ તમામ ડોક્યુમેન્ટ દેખાતા હોવા છતાં અરજદારને એજન્ટ પાસે મોકલે છે. એજન્ટને ઓફલાઇન રૂ.250નું ચૂકવણું થતાં અચાનક સ્ક્રીન પર અરજદારના તમામ ડોક્યુમેન્ટ દેખાવા લાગે છે. અરજદારના ડોક્યુમેન્ટ અપલોડ થયા બાદ ઓનલાઇન પેમેન્ટનો ઓપ્શન આવે છે અને ત્યારબાદ એપોઇન્ટમેન્ટ મળે છે. આ તમામ પ્રક્રિયા પછી ફરી એડિટ કરવાનો કોઇ વિકલ્પ ન હોવા છતાં અરજદારના કમ્પ્યૂટરની જાણકારીનો અભાવનો ગેરફાયદો લઇને અરજદારનાં રૂ.250 પ્રમાણે બેરોકટોક ખિસ્સાં હળવાં કરવામાં આવે છે.
એડિટનો ઓપ્શન ન હોવા છતાં ડોક્યુમેન્ટ દેખાતા નથી
એજન્ટને વધારાનું પેમેન્ટ ચૂકવતાં જ કચેરીમાં બેઠેલા RTO કર્મચારીને અચાનક જ જે તે અરજદારની એપ્લિકેશન અને ડોક્યુમેન્ટ આપોઆપ દેખાવા લાગે છે. ખરેખર તો જે તે અરજદાર ઓનલાઇન એપોઇન્ટમેન્ટ લઇ લે તે પછી એડિટનો એવો કોઇ વિકલ્પ હોતો નથી કે ફરી ડોક્યુમેન્ટ અપલોડ કરવાના હોતા નથી, પરંતુ તમારી અરજી દેખાતી નથી તેવી વાત અરજદારને સમજાવી-ગભરાવીને ફરિજયાત ઓનલાઇન પેમેન્ટ કર્યાની પહોંચ પણ RTO કર્મચારી માગે છે.
પેમેન્ટ ઓનલાઈન રિસીપ્ટ શાની?
પેમેન્ટ ઓનલાઇન તો પછી રિસીપ્ટ શા માટે બતાવવાની હોય? તે પણ એક પ્રશ્ન છે, છતાં દૂરથી આવેલો અરજદાર પ્રિન્ટ કઢાવવા માટે બહાર એજન્ટ પાસે જાય ત્યારે એક રૂપિયામાં જે પ્રિન્ટ નીકળે તેના રૂ.250 આપવા માટે મજબૂર બને છે.
RTOમાંથી એજન્ટ બહાર પણ ગેટ પાસે વાનના ખડકલા
તાજેતરમાં જ RTO કચેરીમાં અડ્ડો જમાવી બેસી રહેતા એજન્ટોને હટાવવા માટે વાહન વ્યવહાર કમિશનરે કડક આદેશ દ્વારા RTO અધિકારીઓને જવાબદાર ઠેરવીને પગલાં લેવાનું જણાવતા એજન્ટો કચેરીમાંથી તો ખસી ગયા, પરંતુ કચેરીના ગેટ પાસે જ વાનમાં બેસીને વેપલો કરતા થઇ ગયા છે.