કોરોનાને કારણે છેલ્લા ઘણા સમયથી સ્કૂલો બંધ હતી . પરંતુ હવે સ્કૂલો શરૂ થતા શિક્ષકોનું અને વાલીઓનું કહેવું છે કે બાળકોની લખવાની સ્પીડ ઘટી છે. જેના કારણે તેમની ચિંતા વધી ગઈ છે.
ઓનલાઈન શિક્ષણને કારણે બાળકોની લખવાની સ્પીડ ઘટી
ફરી ઝડપથી લખતા કરવા મોટો પડકાર
વાલીઓ અને શિક્ષકો આ મુદ્દે ટેન્શનમાં
કોરોના સંક્રમણ નિયંત્રણમાં આવતાંની સાથે જ રાજ્ય સરકાર દ્વારા નાનાં ભૂલકાંઓને શાળામાં મોકલવા માટેનો નિર્ણય તાજેતરમાં જ જાહેર કરવામાં આવ્યો છે ત્યારે સોમવારથી શરૂ થયેલી શાળાઓમાં ધીરે ધીરે બાળકોની હાજરીનું પ્રમાણ વધી રહ્યું છે. વિદ્યાર્થીઓ વાલીઓના સંમતિપત્ર સાથે મોટી સંખ્યામાં વર્ગખંડમાં આવી રહ્યા છે ત્યારે તેમને ભણાવવાની સાથે વાલીઓ અને શિક્ષકો માટે વધુ એક જવાબદારી ઊભી થઇ રહી છે.
બાળકોને લખતા કરવાનો નવો ટાસ્ક ઉમેરાયો
શાળામાં જતાની સાથે બાળકો ખૂબ જ શાંત દેખાયાં હતાં. બાળકોમાં લખવાની પ્રેક્ટિસ ખૂબ ઓછી થઈ ગઈ હોવાના કારણે હવે શિક્ષકો અને વાલીઓને તેમને લખતાં કરવાનો નવો ટાસ્ક ઉમેરાયો છે. ઘેર રહીને બાળકો માતા-પિતાની હાજરીમાં ઓનલાઇન ભણી લેતાં હતાં, પરંતુ શાળામાં શાંત પડી જતાં હોવાનું તારણ સામે આવી રહ્યું છે.
બાળકો શાળે ન જતા લખવાનું ભૂલ્યા
દોઢ-બે વર્ષ પછીના સમયગાળા બાદ શાળા શરૂ થતાં વિદ્યાર્થીઓ ખૂબ જ ઉત્સાહથી શાળામાં આવી રહ્યા છે, પરંતુ અત્યાર સુધી બાળકો ઓનલાઇન અભ્યાસ કરતાં હતાં પણ હવે ફરી તેઓ રાબેતા મુજબ ઓફલાઈન અભ્યાસ શરૂ કરી રહ્યાં છે. ઘણા સમયથી તેઓ શાળાએ આવ્યાં ન હોવાથી લખવાનું ભૂલી ગયાં છે. શાળાના વર્ગમાં બાળકોને લખવામાં સૌથી વધુ મુશ્કેલી પડી રહી હોવાનું શિક્ષકો જણાવી રહ્યા છે.
બાળકો ક્લાસમાં મસ્તી કરતા ઓછા જોવા મળ્યા
સામાન્ય રીતે ક્લાસરૂમમાં બાળકો ખૂબ જ મસ્તી કરતાં હોય છે, પરંતુ જે બાળકો શાળામાં આવ્યાં છે તેઓના વર્તનમાં મોટો બદલાવ આવ્યો છે. બાળકો એકબીજા સાથે વાત કરતાં અને મસ્તી કરતાં ઓછાં જોવા મળી રહ્યાં છે.
શિક્ષકો જેટલું લખવાનું કહે બાળકો નથી કરી શકતા પુરુ
ઓનલાઇન અભ્યાસના કારણે બાળકો પોતાના ઘરમાં રહીને વાલીઓ સાથે અભ્યાસ કરતાં હતાં. બાળકો તેમને યોગ્ય લાગે તેવા સમયે લખવાનું પસંદ કરતાં હતાં, જેના પરિણામે ક્લાસરૂમમાં શિક્ષકો જ્યારે જેટલું પણ લખવાનું કહે છે ત્યારે તેઓ પૂરું લખી ન શકતાં હોવાનું ધ્યાનમાં આવી રહ્યું છે, જે શિક્ષકો અને વાલીઓ બંને માટે ચિંતાજનક છે. મોટા ભાગનાં બાળકો યોગ્ય રીતે લખી શકતાં નથી. હવે માત્ર એક જ સત્ર ફાઇનલ પરીક્ષા માટે બાકી રહ્યું છે ત્યારે આ બાળકોને ઝડપથી વિષય પ્રમાણે લખતાં કરવાં એ મોટો પડકાર બની રહ્યો છે.
લખવાની સ્પીડ વધવી જરૂરી
ઉલ્લેખનીય છે કે હવે અગામી દિવોસમાં બાળકોમાં વધુમાં વધુ લખવા માટે રસ ઊભો કરવો ફરિજયાત બન્યો છે. માત્ર લખતાં કરવાનું જ નહીં, લખવાની સ્પીડ વધારવા તેમજ સમયસર લખવાનું પૂરું કરવાનું શિખવાડવાની નવી જવાબદારી વાલીઓ અને શિક્ષકોએ નિભાવવાનો સમય આવ્યો છે.