તમારા કામનું / Youtube પર વીડિયો લાઈક કરતા પહેલાં સાવધાન! મહિલા સાથે લાખોની ઠગાઇ, તમે પણ ન કરતા આ 5 ભૂલ

• યૂટ્યૂબ વીડિયો લાઈક કરવા બદલ એક મહિલાએ 10 લાખ રૂપિયા ગુમાવ્યા
• રોકાણ પર સારુ રિટર્ન આપવાનો વાયદો કર્યો હતો
• તેણે પોર્ટલ પર 10,75,000 રૂપિયા જમા કરાવ્યા હતા

એક મહિલા ટેલિગ્રામ દ્વારા 10 લાખથી વધુની છેતરપિંડીનો શિકાર બની

ગુરુગ્રામની એક મહિલા સોશિયલ મેસેજિંગ એપ ટેલિગ્રામ દ્વારા 10 લાખથી વધુની છેતરપિંડીનો શિકાર બની છે. પોલીસે જણાવ્યું હતું કે પીડિતને ટેલિગ્રામ એપ પર યૂટ્યૂબ વીડિયો જોવા અને લાઇક કરવાનું કહ્યું હતું. પીટીઆઈના એક અહેવાલ અનુસાર, પીડિતા શાનૂ પ્રિયા વાર્ષ્ણેયએ કહ્યું કે તેને એક ટેલિગ્રામ ગ્રુપમાં સામેલ કરવામાં આવી હતી અને YouTube પર કેટલાક વીડિયો લાઈક કરવા અને રોકાણ પર લાભ મળવાનું કહેવામાં આવ્યું હતું. રોકાણ પર સારુ રિટર્ન આપવાનો વાયદો પણ કર્યો હતો.

વોટ્સએપ પર મેસેજ આવ્યો હતો

મહિલાની ફરિયાદ મુજબ, ખાંડસા રોડ વિસ્તારના રહેવાસીને 1 ફેબ્રુઆરીના રોજ વોટ્સએપ પર મેસેજ આવ્યો હતો જેમાં ડિજિટલ માર્કેટિંગમાં રોકાણ પર સારા રિટર્નની વાત કહેવામાં આવી હતી. 

મહિલાને એક ટેલિગ્રામ ગ્રૂપમાં સામેલ થવા માટે કહેવામાં આવ્યું હતું, જ્યાં તેને YouTube પર કેટલાક વીડિયો જોવા અને તેને લાઈક કરવાનું કહેવામાં આવ્યું હતું. શરૂઆતમાં, જ્યારે તેણે આમ કર્યું તો કમિશનના રૂપમાં તેના એકાઉન્ટમાં કેટલાક પૈસા આવ્યા હતા.

VIP મેમ્બરશિપના નામ પર કરી છેતરપીંડી

પીડિતાએ ફરિયાદમાં જણાવ્યું કે 2 ફેબ્રુઆરીએ મારી પાસે વીઆઈપી મેમ્બરશિપના નામે આઠ હજાર રૂપિયા માંગવામાં આવ્યા હતા. મારું એકાઉન્ટ બીજી વેબસાઈટ પર રજીસ્ટર હતું અને મેં રોકાણ કરવાનું શરૂ કરી દીધું. 4 ફેબ્રુઆરીના રોજ મેં સુપર VIP મેમ્બરશિપના નામે વધુ પૈસા ટ્રાન્સફર કર્યા હતા.

આમ કરી તેણે પોર્ટલ પર 10,75,000 રૂપિયા જમા કરાવ્યા અને જ્યારે તેણે પૈસા પરત માંગ્યા અથવા રિટર્ન આપવા કહ્યું ત્યારે સ્કેમ કરનારાએ તેને 4 લાખ રૂપિયા ચૂકવવાનું કહ્યું. તેની ફરિયાદ બાદ અજાણ્યા આરોપીઓ સામે સાયબર ક્રાઈમ વેસ્ટ પોલીસ સ્ટેશનમાં IPC કલમ 419 અને 420 (છેતરપિંડી) હેઠળ FIR નોંધવામાં આવી હતી.

ઓનલાઈન સેફ્ટી માટે 5 બાબતો ખાસ યાદ રાખો 

1. પ્રથમ વાત એ કે સામાન્ય સમજનો ઉપયોગ કરો અને આકર્ષક સ્કિમમાં પડશો નહીં. હંમેશા યાદ રાખો કે પૈસા કમાવવાનો કોઈ સરળ રસ્તો અથવા શોર્ટકટ નથી હોતો.
2. ક્યારેય પણ તમારી અંગત જાણકારી એટલે કે તમારુ સરનામું પણ અજાણ્યા લોકો સાથે ક્યારેય શેર કરશો નહીં. 
3. તમારા સોશિયલ મીડિયા એકાઉન્ટ્સને પ્રાઈવેટ રાખો. નવી ફ્રેન્ડ રિક્વેસ્ટ સ્વીકારતા પહેલા હંમેશા થોડો વિચાર કરો. ખાસ કરીને એવા લોકો જેને તમે જાણતા નથી.
4. અજાણ્યા લોકોની ફ્રેન્ડ રિક્વેસ્ટ સ્વીકારશો નહીં.
5. ઓનલાઈન નાણાકીય વ્યવહારોમાં સામેલ થશો નહીં. તેનાથી તમને પૈસાના નુકસાનનો ખતરો છે.