તમારા કામનું / જો તમને પણ કોઇ આવો ફોન આવે તો થઇ જજો સાવધાન, નહીંતર થઇ શકે છે આવું

• અનલોક વચ્ચે સાયબર ગઠિયા થયાં સક્રિય
• કોઇ તમને છેતરે તો તરત જ પોલીસને કરવો ફોન 
• ઓલનાઇન પેમેન્ટની માહિતી મેળવી પૈસાની કરશે ઉઠાંતરી 

 ત્યારે અનલોક વચ્ચે સાયબર ગઠિયા લોકોને તેમની અલગ અલગ ટેકનિકથી જાળમાં ફસાવવા સક્રિય થયા છે, જેના પગલે સાયબર ક્રાઇમ દ્વારા આવા ગ‌િઠયાઓ કોઈ પણ કારણ આપે કે પછી કોઈ પણ ઓળખ આપે તો તેમની જાળમાં કોઈ ન ફસાય તે માટે સોશિયલ મીડિયા મારફતે લોકોને જાગૃત કરવામાં આવી રહ્યા છે, જેથી સતર્ક રહો, સલામત રહો.  

સાયબર ગઠિયાઓ જાતજાતની તરકીબો અજમાવી રહ્યા છે

અનલોકના સમયગાળામાં સાયબર ગઠિયાઓ જાતજાતની તરકીબો અજમાવીને લોકો સાથે છેતરપિંડીનો પ્રયત્ન કરી રહ્યા હોવાની પોલીસને જાણ થઇ છે અને આ સાયબર ગઠિયાઓની લોકોને ફોન તેમજ મેસેજ કરનારી ટોળકી ખૂબ જ એક્ટિવ છે. ગઠિયાઓ તેમની જાળમાં ફસાવીને તમારા ખાતામાંથી રૂપિયા ટ્રાન્સફર કરી દેશે, જેથી ક્યારેય પણ આવા પ્રકારના ફોન-કોલ કે મેસેજ આવે કે પછી કોઈ પણ કારણ આપે કે પછી કોઈની પણ ઓળખાણ આપે તો એક વાર ચેક કરી લેવું જોઈએ.

કોઇ તમને છેતરે તો તરત જ પોલીસને કરવો ફોન 

હાલમાં સાયબર ક્રાઇમ પોલીસે પણ ટ્વિટરના માધ્યમથી લોકોને જાગૃત કરવા એક પોસ્ટ કરી છે, જેમાં લખ્યું કે જો કોઈ પણ ગઠિયાઓ કોઈ પણ કારણ આપે જેવાં કે કેવાયસી અપડેટ, ક્રેડિટ-ડેબિટકાર્ડની વિગતો, ખાતું બ્લોક, બેન્ક લોન મંજૂર, સ્કોલર‌િશપ, સિલાઈ મશીન, કમ્પ્યૂટર, લકી ડ્રો, ફરી મોબાઈલ ડેટા ૮૦% - ૯૦% ઓફ ફ્રી મેડિકલ સેવા વગેરે તેમજ ગઠિયો કોઈ પણ ઓળખણ આપે, જેમ કે બેન્ક કર્મચારી, ઇન્કમટેક્સ ઓફિસર, એક્સ આર્મીમેન, મોબાઈલ સર્વિસ પ્રોવાઇડરના કર્મચારી, શિક્ષણ વિભાગના કમર્ચારી, સ્વાસ્થ્ય કર્મચારી, વિઝા ઓફિસર વગેરે પર કોઈએ પણ વિશ્વાસ ન કરવો, નહીં તો તે તમારી વિગતો મેળવીને તમને છેતરપિંડીનો ભોગ બનાવશે. વધુમાં પોસ્ટમાં ખાસ નોંધ કરીને લખ્યું કે ઓટીપી, પિન, સીવીવી કે ક્રેડિટ-ડેબિટકાર્ડ જેવી સંવેદનશીલ માહિતી ક્યારેય શેર કરવી નહીં અને કાળજી રાખવી તથા આવા કોઈ ગઠિયા તમને છેતરે તો ૧૦૦ નંબર પર પોલીસને જાણ કરવી, જેથી સાયબર ગઠિયાને પકડીને કડક કાર્યવાહી કરવામાં આવશે. 

ઓલનાઇન પેમેન્ટની માહિતી મેળવી પૈસાની કરશે ઉઠાંતરી 

મહત્ત્વનું છે કે મોટા ભાગના ગઠિયા પેટીએમ કેવાયસી અપડેટ કે પછી તમને ફોન કરીને કહેશે, પેટીએમ બ્લોક થઇ જશે. આમ કહી તે તમારા ઓનલાઇન પેમેન્ટની માહિતી મેળવી પૈસાની ઉઠાંતરી કરી લેશે, જેથી આ પ્રકારનું કંઈ પણ જાણવા મળે તો પહેલાં ચેક કરવું. જો તમને શંકા થાય તો પોલીસને જાણ કરવી, જેથી સાયબર ગઠિયાની જાળમાં ફસાતાં પહેલાં અથવા ભોગ બનતાં અટકાવી શકાય.