ચોંકાવનારો કિસ્સો / સુરતઃ ઘરમાં એક જ સ્માર્ટફોન હતો તે પિતાનો હોવાથી વિદ્યાર્થીની ઓનલાઇન ક્લાસ જોઇન ન કરી શકતા જીવન ટુંકાવ્યું

• ઓનલાઇન અભ્યાસને લઇ ચોંકાવનારો કિસ્સો
• ઓનલાઇન અભ્યાસથી કંટાળી આપઘાત
• વિદ્યાર્થિનીએ ગળેફાંસો ખાઇ કર્યો આપઘાત

હાલ કોરોના મહામારીને પગલે ગુજરાતમાં શાળાઓ બંધ છે જેને લઇને શાળાઓ દ્વારા ઓનલાઇન એજ્યુકેશનની વ્યવસ્થાઓ ઉભી કરવામાં આવી છે. પરંતુ આ ઓનલાઇન ક્લાસમાં હાજરી ન આપી શકતા સુરતના પાંડેસરા વિસ્તારની 10માં ધોરણની વિદ્યાર્થીનીએ ગળેફાંસો ખાઇને જીવન ટુંકાવ્યું હતું. ઘરમાં માત્ર એક જ સ્માર્ટફોન હતો જે પિતાનો હતો અને તેમાંથી જ વિદ્યાર્થીની ઓનલાઇન ક્લાસ જોઇન કરતી હતી. પરંતુ વિદ્યાર્થીનીને ઓનલાઇન ક્લાસમાં હાજરી આપવામાં મુશ્કેલીનો સામનો કરવો પડી રહ્યો હતો. 

વિદ્યાર્થિનીએ ઓનલાઇન એજ્યુકેશનથી કંટાળીને આપઘાત કર્યો હોવાનો પરિવારજનો દ્વારા આક્ષેપ કરવામાં આવી રહ્યો છે. લૉકડાઉન દરમિયાન ઓનલાઈન અભ્યાસ કરી શકી નહોતી માટે તે ચિંતામાં રહેતી હતી. આવા સંજોગોમાં તે સતત માનસિક તણાવ અનુભવતી હતી. આ કારણે તેણે અંતિમ પગલું ભર્યું હોવાની શક્યતા છે.

વિદ્યાર્થીનીના પિતાએ જણાવ્યું હતું કે, અભ્યાસના મુદ્દે તેણીને શાળામાંથી ફોન આવતો હતો. દરમિયાન શનિવાર આકાંશા શાળાએ ગઈ હતી. જ્યાં તેણીને ઓનલાઈન ક્લાસ બાબતે પુછવામાં આવ્યું હતું. આકાંશાએ ફોન પિતા પાસે રહેતો હોય ભણવામાં ધ્યાન નહીં આપી શકાતું હોવાનું કહ્યું હતું. મોબાઈલ ફોનના અભાવે ભણવામાં યોગ્ય રીતે ધ્યાન નહીં આપી શકતા નાસીપાસ થઈ જઈ આપઘાત કર્યો હોવાની શક્યતા છે.

જોકે આપઘાત મુદ્દે પોલીસની કોઈ પુષ્ટિ નથી કરી. મૃતદેહને પીએમ માટે નવી સિવિલ હોસ્પિટલમાં મોકલી તપાસ હાથ ધરાઈ છે.