ભારતમાં પોપ્યુલર ફ્લેગશિપ સ્માર્ટફોન વનપ્લસની વેબસાઇટ ફરી એકવાર હેક થઈ છે. જેના પગલે લાખો યુઝર્સનો વ્યક્તિગત ડેટા લીક થઈ ગયો છે. જો કે વનપ્લસ કંપનીએ હજી સુધી આ હેકિંગ વિશે પુષ્ટિ આપી નથી, પરંતુ એટલી કબુલાત કરી છે કે કેટલાક ગ્રાહકોના ડેટા લીક થયા છે, જેમાં પાસવર્ડ, પેમેન્ટ સંબંધિત માહિતી અને એકાઉન્ટની વિગતોનો સમાવેશ થાય છે.
અગાઉ પણ વનપ્લસની વેબસાઈટ હેક થઈ હતી
રિપોર્ટ અનુસાર હેકર્સે વનપ્લસના ઓનલાઇન સ્ટોરમાં ઘુસણખોરી કરી હતી.આ પહેલીવાર નથી જ્યારે કોઈ હેકર્સે વનપ્લસના ઓનલાઇન સ્ટોરને નિશાન બનાવ્યો હોય. આ અગાઉ, જાન્યુઆરી 2018માં વનપ્લસની સાઇટ હેકિંગનો શિકાર બની હતી, જેમાં લગભગ 40 હજાર યુઝર્સના ક્રેડિટ કાર્ડની માહિતી લીક થઈ હતી.
વનપ્લસ ઓથોરિટીએ કહ્યું યુઝર્સ સુરક્ષિત છે
વનપ્લસે કહ્યું છે કે હેકર્સના એટેકને તરત જ રોકી દેવાયો હતો. આ હેકિંગથી પ્રભાવિત યુઝર્સને ઈ-મેલ દ્વારા જાણ કરવામાં આવી છે. તેમજ આ બનાવમાં કંપનીની ટેકનિકલ ટીમ તપાસ કરી રહી છે. વનપ્લસે એવી પણ સ્પષ્ટતા કરી છે કે જે યુઝરને મેલ ન મળ્યો હોય એનો અર્થ એ કે તેમનો ડેટા સુરક્ષિત છે. વનપ્લસે એમ પણ કહ્યું છે કે તે ઓનલાઇન સ્ટોરને વધુ સિકયોર બનાવવા પર કામ કરી રહ્યું છે જેથી ભવિષ્યમાં કોઇ તેને હેક ન કરી શકે.
અગાઉ ફોટા અને અનેક ડેટા લીક થયો હતો
ગત જુનમાં વનપ્લસની પ્રિલોડેડ એપ “શોટ ઓન વનપ્લસ”માં બગ આવી ગયો હતો. આ એપથી કોઇપણ યુઝર વોલપેપરના બદલે પોતાનો ફોટો કે ફોનના કેમેરાથી લીધેલો ફોટો સર્વર પર અપલોડ કરી શકે છે.આ ફોટોન વન પ્લસના તમામ યુઝર્સ વોલપેપર તરીકે યુઝ કરી શકે છે. આ એપમાં એવો બગ આવી ગયો હતો જેના કારણે અનેક યુઝર્સના ઇ-મેલ આઇડી પણ અપલોડ કરેલા ફોટાની સાથે લીક થઇ ગયા હતા. જોકે વન પ્લસ દ્વારા તરત જ આ બગને દુર સોફટવેર અપડેટ પણ આપવામાં આવ્યું હતું.