IPL 2023 / એક હજાર ના ત્રણ હજાર, 31 માર્ચે અમદાવાદમાં રમાનારી મેચમાં ટિકિટની કાળાબજારી કરતો શખ્સ ઝબ્બે, ગજબનું ભેજું વાપર્યુ

• નરેન્દ્ર મોદી સ્ટેડિયમમાં 31 માર્ચે યોજાવાની છે મેચ 
• ટિકિટનાં ચારથી પાંચ ગણા ભાવે વેચી મારતો યુવકનો પર્દાફ્રાશ
• યુવકે પહેલેથી 20 ટિકિટ ઓનલાઈન ખરીદી લીધી હતી

 મોટેરા ખાતે આવેલા નરેન્દ્ર મોદી સ્ટેડિયમમાં જ્યારે પણ મેચ યોજાવાની હોય ત્યારે પહેલેથી ઓનલાઇન ટિકિટ બુક કરીને ચારથી પાંચ ગણા ભાવે વેચી મારતા યુવકનો પર્દાફાશ ઝોન-૨ની લોકલ ક્રાઇમ બ્રાંચે કર્યો છે. ૩૧ માર્ચે આઇપીએલમાં ગુજરાત ટાઇટન્સ અને ચેન્નઇ સુપર કિંગ્સ વચ્ચે મેચ રમાવાની છે, જેમાં યુવકે પહેલેથી ૨૦ ટિકિટ ઓનલાઇન ખરીદી લીધી હતી. એક હજાર રૂપિયામાં ખરીદેલી ટિકિટને યુવક ૨૯૦૦ રૂપિયામાં વેચવાનો હતો જોકે પોલીસે તેના ઇરાદા પર પાણી ફેરવી દીધું છે. 

ગુજરાત ટાઇટન્સ અને ચેન્નઇ સુપર કિંગ્સ વચ્ચે મેચ રમાવવાની
નરેન્દ્ર મોદી સ્ટેડિયમ ખાતે ૩૧ માર્ચના રોજ આઇપીએલ ટી-૨૦ ટૂર્નામેન્ટ અંતર્ગત ગુજરાત ટાઇટન્સ અને ચેન્નઇ સુપર કિંગ્સ વચ્ચે મેચ રમાવવાની છે જેમાં કેટલાક શખ્સ ટિકિટનાં કાળાંબજાર કરતા હોવાની બાતમી ડીસીપી ઝોન ૨ની લોકલ ક્રાઇમ બ્રાંચને મળી હતી. બાતમીના આધારે ઓનલાઇન ટિકિટ બુક કરનાર તત્ત્વ પર નજર રાખીને પોલીસ બેઠી હતી ત્યારે માહિતી મળી હતી કે ઝુંડાલ સર્કલ પાસે આવેલા સર્વિસ રોડ પર એક યુવક મેચની ટિકિટને પોતાના આર્થિક ફાયદા માટે કાળાંબજાર કરી રહ્યો છે. 

લોકલ ક્રાઇમ બ્રાંચની ટીમે શંકાસ્પદ યુવકની અટકાયત કરી
લોકલ ક્રાઇમ બ્રાંચની ટીમ તરત જ ઘટના સ્થળ પર પહોંચી ગઇ હતી અને શંકાસ્પદ યુવકની અટકાયત કરી લીધી હતી. યુવકનું નામ બ્રિજેશ કાપડિયા છે અને તે ચાંદખેડામાં આવેલા વૃંદાવન ગોદરેજ ગાર્ડન સિટીમાં રહે છે. બ્રિજેશ પાસેથી લોકલ ક્રાઇમ બ્રાંચને એક પ્લાસ્ટિકની થેલી મળી હતી. જેમાં આઇપીએલ મેચની વીસ ટિકિટ હતી. લોકલ ક્રાઇમ બ્રાંચે બ્રિજેશની પૂછપરછ કરી તો તેણે કબૂલાત કરી છે કે તે મેચની ટિકિટ પહેલેથી ખરીદીને તેનાં કાળાં બજાર કરી રહ્યો હતો. એલસીબીએ બ્રિજેશ વિરુદ્ધ ચાંદખેડા પોલીસ સ્ટેશનમાં કાળાંબજારમાં ટિકિટ વેચવાનો ગુનો દાખલ કરીને તપાસ શરૂ કરી છે. 

ટિકિટનાં કાળાં બજારમાં અન્ય કોણ કોણ જોડાયેલા છે તે મામલે પોલીસે તપાસ શરૂ કરી
બ્રિજેશનો ૨૦ હજાર રૂપિયાનાં ઇન્વેસ્ટમેન્ટમાં ૩૮ હજાર રૂપિયા કમાવાનો પ્લાન હોવાનું સામે આવ્યું છે. બ્રિજેશે ૨૦ હજાર રૂપિયાની ઓનલાઇન ટિકિટ ખરીદી લીધી હતી અને બાદમાં તેને ૨૯૦૦ રૂપિયામાં વેચવાનો હતો. બ્રિજેશે કેટલી ટિકિટ ખરીદી છે તે મામલે પોલીસ તેમજ એલસીબીએ તપાસ શરૂ કરી છે. પોલીસ સૂત્રોનાં જણાવ્યા અનુસાર જ્યારે પણ અમદાવાદમાં મેચ રમાવવાની હોય ત્યારે બ્રિજેશ પહેલેથી ઓનલાઇન ટિકિટ બુક કરાવી દેતો હતો અને છેલ્લે ચારથી પાંચ ગણા ભાવે વેચી દેતો હતો. ટિકિટનાં કાળાંબજારમાં શાતિર બનેલા બ્રિજેશ સાથે કોણ કોણ જોડાયું છે તે મામલે પણ પોલીસે તપાસ શરૂ કરી છે.