અમદાવાદમાં એક તરફી પ્રેમમાં પાગલ યુવકે કિશોરીને કહ્યું તારે મારી સાથે પ્રેમ સંબંધ તો રાખવો જ પડશે. જો તું મારી સાથે પ્રેમ સંબંધ નહીં રાખે તો તને બરબાદ કરી નાખીશ તેમજ તારાં માતા પિતાના ટાંટિયા તોડી નાખીશ આવી ધમકી આપતાં ચકચાર મચી ગઈ હતી.
તું મારી સાથે પ્રેમ સંબંધ નહીં રાખે તો તને બરબાદ કરી નાખીશઃ કિશોરીને ધમકી
છ મહિનાથી કિશોરી સાથે રીતેશ પ્રેમ સંબંધ રાખવાનું દબાણ કરતો હતો
વાડજ પોલીસ સ્ટેશનમાં મહિલાએ નોંધાવી ફરિયાદ
અમદાવાદના વાડજ પોલીસ સ્ટેશનમાં મહિલાએ રીતેશ વિરુદ્ધમાં ફરિયાદ નોંધાવી છે. ફરિયાદમાં જણાવ્યા અનુસાર મહિલાને 15 વર્ષની દીકરી છે. તેમજ તેના ઘરની બાજુમાં અનીલભાઈ રહે છે તેમના ભાણેજ રીતેશને મહિલાની દીકરી સાથે મિત્રતા થઇ હતી. કિશોરી રીતેશ સાથે ક્યારેક ક્યારેક ફોન પર વાતચીત કરતી હતી. ત્યારબાદ રીતેશનો સ્વભાવ સારો ન લાગતાં કિશોરીએ વાતચીત કરવાનું બંધ કરી દીધું હતું, ત્યારબાદ છ મહિનાથી કિશોરી સાથે રીતેશ પ્રેમ સંબંધ રાખવાનું દબાણ કરતો હતો.
જેથી મહિલાએ કિશોરના પિતાને જાણ કરી હતી. પિતાએ રીતેશને સમજાવ્યો હતો. ફરી ત્યારબાદ સમાધાન પણ થઇ ગયું હતું. રીતેશ કિશોરીના ઘર બાજુ આવતો ન હતો.
પરંતુ ગઈકાલે નવ વાગ્યાની આસપાસ મહિલા તેના ઘરે હાજર હતી. મહિલા તેના ઘરની બહાર આવી ત્યારે રીતેશ કહ્યું કે તમારી દીકરીના નામથી મને કોઈ ફોન ઉપર ધમકી આપે છે. જેથી તમે તેને સમજાવી દેજો. આમ કહેતાં મહિલાએ કહ્યું કે અમારા કોઈ સંબંધીએ ફોન કર્યો નથી. આથી રીતેશ એકદમ ઉશ્કેરાઈ ગયો હતો. તેણે મહિલાની દીકરીને કહ્યું કે તારે મારી સાથે પ્રેમ સંબંધ તો રાખવો જ પડશે. જો તું મારી સાથે પ્રેમ સંબંધ નહીં રાખે તો તને બરબાદ કરી નાખીશ આવી ધમકી તેણે તેને આપી હતી. રીતેશ આટલેથી પણ અટક્યો ન હતો, તેણે કહ્યું કે તારાં માતા પિતાનાં પણ ટાંટિયા તોડી નાખીશ તમારાથી થાય તે કરી લો. આમ કહીને રીતેશ ભાગી ગયો હતો ત્યાર બાદ મહિલાએ રીતેશ વિરુદ્ધ વાડજ પોલીસ સ્ટેશનમાં ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.