ફ્લેગશીપ કિલર કરીકે ઓળખાતા અને ભારતમાં ધૂમ વેચાતા વન પ્લસના મોબાઇલ વિવાદમાં સપડાયા છે. જો તમે વન પ્લસ મોબાઇલ યુઝ કરતા હો તો તમને ખબર હશે કે તેમાં શોટ ઓન વન પ્લસ નામની પ્રિલોડેડ એપ હોય છે. હવે એક રિપોર્ટમાં એવો દાવો કરાયો છે કે આ એપ દ્વારા હજારો યુઝર્સના ઇ-મેલ આઇડી લીક થઇ ગયા છે.
આ એપથી કોઇપણ યુઝર વોલપેપરના બદલે પોતાનો ફોટો કે ફોનના કેમેરાથી લીધેલો ફોટો સર્વર પર અપલોડ કરી શકે છે. તમે અપલોડ કરેલો ફોટો દુનિયાભરના વન પ્લસના તમામ યુઝર્સ તેનો વોલપેપર તરીકે યુઝ કરી શકે છે. રિપોર્ટમાં કરાયેલા દાવા મુજબ આ એપમાં એવો બગ આવી ગયો છે જેના કારણે અનેકના ઇ-મેલ આઇટી પણ અપલોડ કરેલા ફોટાની સાથે લીક થઇ ગયા છે. વન પ્લસ દ્વારા આ બગને દુર કરવા સોફટવેર અપડેટ પણ આપવામાં આવ્યું હતું.
જોકે હજુ આ બગની સમસ્યા સાવ દુર થઇ શકી નથી. વનપ્લસના મોબાઇલમાં શોટ ઓન વનપ્લસ એપમાં ઇ-મેલથી લોગ ઇન કરવાનું હોય છે. આ એપને open.oneplus.net થી પણ એકસેસ કરી શકાય છે. આ બગ અંગે જોકે હજુ સુધી વનપ્લસ દ્વારા કોઇ સત્તાવાર સ્પષ્ટતા કરવામાં આવી નથી. હજુ સુધી એ પણ જાણકારી બહાર આવી નથી કે આ બગ કેટલા સમયથી છે અને કેટલા લોકોના ઇ-મેલનો ડેટા લીક કર્યો છે.
ઉલ્લેખનીય છે કે વનપ્લસના મોબાઇલમાં અગાઉ પણ આ એપમાં બગ આવી ગયો હતો. ઉલ્લેખનીય છે કે મોબાઇલના સોફટવેર હોય કે એપ તેમાં બગ હોવાનું સામાન્ય છે. જોકે મોબાઇલ કંપનીઓ બગને દુર કરવા તરત જ પગલા ભરતા હોય છે. પરંતુ કેટલાક બગ તમારી પ્રાઇવેસી અને ડેટાને ખતરામાં મુકી શકે છે.