વિશ્વમાં કોરોના વાયરસે હાહાકાર મચાવ્યો છે. કોરોના સંક્રમિતોની સંખ્યા અને કોરોનાથી થનાર મૃત્યુનો આંક પણ વધી રહ્યો છે. વિશ્વમાં કોરોનાથી મૃત્યુ પામનાર લોકોની સંખ્યા 7 લાખને પાર પહોંચી ગઇ છે. પાછલા બે અઠવાડિયાના આંકડા જોઇએ તો કોરોનાથી દર 24 કલાકમાં સરેરાશ 5900 લોકો જીવ ગુમાવી રહ્યાં છે. આ આંકડો પ્રતિ કલાક 247 લોકો અને દર 15 સેકન્ડમાં એક વ્યક્તિ બરાબર છે. ઉલ્લેખનીય છે કે અત્યારે વિશ્વમાં કોરોના સંક્રમિતોનો આંકડો 1.87 કરોડને પાર પહોંચી ગયો છે.
વિશ્વમાં કોરોના સંક્રમિતોનો આંકડો 1.87 કરોડને પાર
કોરોનાથી દર 15 સેકન્ડમાં એક વ્યક્તિનું મૃત્યુ
દર 24 કલાકમાં સરેરાશ 5900 લોકો ગુમાવી રહ્યાં છે જીવ
લેટિન અમેરિકાના દેશોમાં કોરોના ઝડપથી ફેલાઇ રહ્યો છે. અત્યાર સુધીમાં 50 લાખથી વધારે લોકો સંક્રમિત થયા છે તો મૃત્યુઆંક પણ 2 લાખને વટાવી ગયો છે. લેટિન અમેરિકી દેશ બ્રાઝિલ મહામારીથી સૌથી વધારે પ્રભાવિત છે. લગભગ 64 કરોડની વસ્તીવાળા લેટિન અમેરિકામાં બ્રાઝિલ, વેનેઝુએલા, ચિલી અને આર્જેન્ટિના સહિત 33 દેશ છે. અમેરિકામાં કોરોના વાયરસના કારણે મૃત્યુઆંકમાં પણ વધારો થઇ રહ્યો છે. જોકે નવા કેસોમાં સતત બીજા અઠવાડિયામાં પાંચ ટકા ઘટાડો નોંધાયો છે.
મેક્સિકોમાં કોરોનાના સંક્રમિતોની સંખ્યા 449961 થઈ છે અને છેલ્લા 24 કલાકમાં અહીં 6148 નવા કેસ આવ્યા છે. તો જર્મનીમાં કુલ 741 નવા કેસ સાથે કુલ આંક 212033 થયો છે. મૃત્યુઆંક 9168 પહોંચ્યો છે. પાકિસ્તાનની વાત કરીએ તો અહીં અત્યારસુધીમાં 6 હજાર મોત થયા છે. કુલ સંક્રમિતોની સંખ્યા 281136 થઈ છે.
ચીનમાં આવી રહી છે આ નવી સમસ્યા
ચીનના વુહાનમાં જે દર્દીઓ સાજા થઈ ચૂક્યા છે તેમાંથી 90 ટકા દર્દીઓને ફેફસામાં સમસ્યા હોવાનું જાણવા મળી રહ્યું છે. સાજા થયેલા દર્દીઓમાંથી 5 ટકા દર્દીઓને ફરી કોરોના પોઝિટિવ આવ્યો હોવાથી તેમને ક્વૉરન્ટાઈન કરાયા છે. જે દર્દીઓને અત્યારે ફેફસાની સમસ્યા જોવા મળી રહી છે તેમાંથી મોટાભાગનાની ઉંમર 59 વર્ષની આસપાસની છે.