કેન્દ્ર સરકારે 'એક રાષ્ટ્ર, એક રાશન કાર્ડ'ના અભિયાનને આગળ વધારતા રેશનકાર્ડની એક સ્ટાન્ડર્ડ રૂપરેખા તૈયાર કરી છે. રાજ્યોને કેન્દ્ર દ્વારા આદેશ કરવામાં આવ્યો છે કે નવી રૂપરેખા પ્રમાણેના રેશન કાર્ડ લોકોને ઇશ્યૂ કરવામાં આવે.
સરકારે 'એક રાષ્ટ્ર, એક રાશન કાર્ડ'ના અભિયાનને આગળ વધાર્યું
રેશનકાર્ડની એક સ્ટાન્ડર્ડ રૂપરેખા તૈયાર કરી
રાજ્યોને કેન્દ્ર સરકાર દ્વારા આદેશ કરવામાં આવ્યો
સમગ્ર દેશમાં એક જ પ્રકારના રેશનકાર્ડ ઇશ્યૂ કરવાની પહેલ હેઠળ હાલ છ રાજ્યોમાં પ્રાયોગિક ધોરણે તેનો અમલ કરવામાં આવી રહ્યો છે. કેન્દ્ર સરકાર 'વન નેશન, વન રેશન કાર્ડ' યોજનાને ૧ જૂન, ૨૦૨૦થી સમગ્ર દેશમાં લાગુ કરવા ઇચ્છે છે.
આ યોજના સમગ્ર દેશમાં લાગુ થયા બાદ કોઇ પણ કાર્ડધારક રાષ્ટ્રીય ખાદ્ય સુરક્ષા કાયદા હેઠળ કોઇ પણ રાજ્યની રેશનિંગની દુકાનથી પોતાનું રેશન ખરીદી શકશે. ખાદ્ય મંત્રાલયના એક વરિષ્ઠ અધિકારીએ આ અંગે માહિતી આપતાં જણાવ્યું હતું કે રાષ્ટ્રીય સ્તરે રેશન કાર્ડ પોર્ટેબિલિટીના લક્ષ્યને હાંસલ કરવા આ જરૂરી છે કે વિવિધ રાજ્ય અને કેન્દ્રશાસિત પ્રદેશો જે રેશનકાર્ડ ઈશ્યૂ કરે તે તમામ એક સ્ટાન્ડર્ડ સ્વરૂપમાં હોય તે જરૂરી છે. એટલા માટે રાષ્ટ્રીય ખાદ્ય સુરક્ષા કાયદા હેઠળ રેશન જારી કરવા માટે રેશનકાર્ડનું એક સ્ટાન્ડર્ડ ફોર્મેટ ઇશ્યૂ કરવામાં આવ્યું છે.
અધિકારીએ જણાવ્યું હતું કે વિવિધ રાજ્યોમાં જે પણ રેશનકાર્ડ ઇશ્યૂ કરવામાં આવી રહ્યાં હતાં તે તમામની પદ્ધતિ અને સ્વરૂપને ધ્યાનમાં રાખીને સમગ્ર દેશ માટે રેશનકાર્ડનું એક સ્ટાન્ડર્ડ ફોર્મેટ તૈયાર કરવામાં આવ્યું છે. અધિકારીએ જણાવ્યું છે કે કેન્દ્રએ રાજ્યોને આદેશ કર્યો છે કે તે જ્યારે નવા રેશનકાર્ડ ઇશ્યૂ કરે ત્યારે આ નવા ફોર્મેટ અને રૂપરેખા અનુસાર જ ઇશ્યૂ કરે.
સાથે સાથે કેન્દ્રએ રાજ્યોને જણાવ્યું છે કે સ્ટાન્ડર્ડ રેશનકાર્ડ બે ભાષામાં ઇશ્યૂ કરે. એક સ્થાનિક ભાષાની સાથે સાથે તેમાં બીજી ભાષા હિંદી અથવા અંગ્રેજીનો ઉપયોગ કરે. તેનાથી રાષ્ટ્રીય સ્તરે રેશન કાર્ડ પોર્ટેબિલિટીનો અમલ કરવામાં મદદ મળી રહેશે. રાજ્યોને એવું પણ જણાવાયું છે કે તે ૧૦ આંકડા ધરાવતું રેશનકાર્ડ ઇશ્યૂ કરે જેમાં પ્રથમ બે આંકડા રાજ્યનો કોડ અને પછીના આંકડા રેશનકાર્ડની સંખ્યાને અનુરૂપ હશે.