રાજનીતિ / રિબડીયાના કેસરિયા બાદ કોંગ્રેસના વધુ એક ધારાસભ્ય પર ભાજપની નજર, સૌરાષ્ટ્રમાં 'ઓપરેશન લોટસ'

• સૌરાષ્ટ્રમાં ભાજપનું 'ઓપરેશન લોટસ'
• સૌરાષ્ટ્રના એક MLA પર ભાજપની નજર
• હર્ષદ રિબડિયા બાદ વધુ એક MLA ભાજપમાં જોડાઈ શકે

ગુજરાત વિધાનસભા ચૂંટણી પહેલા સૌરાષ્ટ્રમાં ભાજપે 'ઓપરેશન લોટસ' તૈયાર કર્યું છે. જેમાં અગાઉ સૌરાષ્ટ્રમાં કોંગ્રેસના 6 MLA ભાજપની રડારમાં હતા. પરંતુ હવે વિસાવદરના MLA પદેથી હર્ષદ રિબડીયાએ રાજીનામું આપ્યા બાદ માત્ર એક જ MLA ભાજપની નજરમાં છે.

કોંગ્રેસના MLAની ટિકિટનો કન્ફર્મનો મુદ્દો ભાજપને નડ્યો

મહત્વનું છે કે, સૌરાષ્ટ્રમાં પહેલા કોંગ્રેસના 6 MLA કેસરિયા કરવાના હતા. પરંતુ હવે સૌરાષ્ટ્રના એક જ કોંગ્રેસ MLAના નિર્ણય પર સૌની મીટ મંડરાયેલી છે. કારણ કે કોંગ્રેસના MLAની ટિકિટનો કન્ફર્મનો મુદ્દો ભાજપને નડ્યો છે. જો કોંગી MLAને ટિકિટ આપે તો ભાજપનું ટિકિટનું જ્ઞાતિ ગણિત બગડી શકે છે.

ભાજપની રડારમાં અગાઉ સૌરાષ્ટ્રમાં કોંગ્રેસના 6 MLA હતા

નોંધનીય છે કે, ગુજરાત વિધાનસભાની ચૂંટણી પહેલા તડજોડની રાજનીતિ સક્રિય થઈ ગઇ છે. કોઈ ભાજપ સાથે છેડો ફાડી રહ્યું છે તો કોઈ કોંગ્રેસનો હાથ છોડવા તૈયાર બેઠું છે. ચૂંટણી નજીક આવે એટલે પક્ષપલટો અને રાજીનામાની મૌસમ ખીલી ઊઠે. ત્યારે તમને જણાવી દઇએ કે, ભાજપની રડારમાં અગાઉ સૌરાષ્ટ્રમાં કોંગ્રેસના 6 MLA હતા. જેમાં કોંગ્રેસના 6 જેટલા ધારાસભ્યો ભાજપમાં જોડાઇ શકે તેવી શક્યતા હતી. જેમાં જામજોધપુરના ચિરાગ કાલરીયા, જંબુસરના સંજયભાઈ સોલંકી, પાલનપુરના મહેશ પટેલ, જાલોદના ભાવેશ કટારા, ધોરાજીના લલિત વસોયા અને વિસાવદરના હર્ષદ રિબડીયા સામેલ હતા. જેમાંથી કોંગ્રેસના વિસાવદરના MLA પદેથી હર્ષદ રિબડીયાએ રાજીનામું ધરી દીધું છે. ત્યારે હવે માત્ર એક જ MLA ભાજપની નજરમાં છે.

વર્ષ 2017 પછી કોંગ્રેસના 15 MLA ભાજપમાં સામેલ થયા

ઉલ્લેખનીય છે કે, 2017ની વિધાનસભાની ચૂંટણીમાં કોંગ્રેસે જૂનાગઢ જિલ્લાની તમામ બેઠકો જીતી હતી.